Read Baltic Romani Bible 2019 – Библия - Пэ Балтитко Романи чиб (Романэс) 2019 1 Паралипоменоно 17 Bible Online

1 Паралипоменоно 17 - Baltic Romani Bible 2019 – Библия - Пэ Балтитко Романи чиб (Романэс) 2019 bible

1 Паралипоменоно 17

¹Ке́ли Дави́до дживдя́ дро пэ́скиро кхэр, то тэды пхэндя́ Дави́до Нафаноскэ пророкоскэ: Ѓа́да, мэ джива́ва дро кедрытко кхэр, а Дэвлэ́скирэ-завето́скиро ковчэго исын тэл ша́тра.”

²И пхэндя́ Нафано Давидо́скэ: “Саро́, со ту́тэ исын пэ ило́, кэр; пал-дова́ со ту́са исын Дэвэ́л.”

³Нэ дрэ доя́-паць рат сыс Дэвлэ́скиро лав кэ Нафано:

⁴“Джа́ и пхэн Мирэ́ писхари́скэ Давидо́скэ: ‘Адя́кэ ракирэ́ла Рай Дэвэ́л: на ту кэрэ́са Ма́нгэ кхэр тэ джива́в,

⁵пал-дова́ со Мэ на дживдём дро кхэр долэ́ дывэсэ́стыр, сыр вылыджиём Израилёскирэ чхавэ́н, и кэ дава́ дывэ́с, а псирдём скиниятыр дрэ ски́ния и кхэрэ́стыр дро кхэр.

⁶Кай Мэ на псирдём сарэ́ Израилёса, ци пхэндём Мэ екх лав вари-савэ́скэ Израилёскирэ сэндарьенгэ, савэ́нгэ Мэ пхэндём тэ ракхэ́н Мирэ́ манушэ́н: со́скэ тумэ́ на кэрэ́на Ма́нгэ кхэр кедрытко?’

⁷И акана́ адя́кэ пхэн Мирэ́ писхари́скэ Давидо́скэ: ‘Адя́кэ ракирэ́ла Рай Дэвэ́л, Дэвэ́л болыбна́скирэ-янголэ́нгиро: Мэ лыём тут бакрэ́нгирэ стадатыр, соб (кай) ту явэс шэралэса Мирэ́ Израилёскирэ манушэ́нгэ;

⁸и Мэ со́мас ту́са ўсе́нде (везде́), карик ту на псирдян, и вымардём сарэ́н Тырэ́ вэргэ́н анги́л тыро́ муй, и кэрдём лав тыро́, сыр барэн-манушэ́нгирэ лав, савэ́ исын пэ пхув;

⁹и Мэ кэра́ва штэ́то ваш Мирэ́ Израилёскирэ манушэ́нгэ и Мэ зоралякирава лэн, и явэ́на ёнэ штылэ́с тэ дживэ́н пэ пэ́скиро штэ́то, и на явэ́ла буты́р чиладо, и нажужэ́ на лэ́на буты́р тэ притасавэн лэн, сыр англэды́р,

¹⁰дрэ долэ́ дывэса́, ке́ли Мэ чхудём сэндарьен пэ Мирэ́ Израилёскирэ манушэ́ндэ, и Мэ штылякирдём сарэ́ тырэ́ вэргэ́н, и Мэ да́ва тэ джинэ́с ту́кэ, со Рай Дэвэ́л кэрэ́ла ту́кэ кхэр.

¹¹Ке́ли сполнинэнапэ тырэ́ дывэса́, и ту отджаса кэ тырэ́ дада́, тэды Мэ чхува́ва ро́до тыро́ пало́ (после) ту́тэ, саво́ явэ́ла тырэ́ чхавэ́ндыр, и чхува́ва лэ́скиро кралипэ́н.

¹²Ёв кэрэ́ла Ма́нгэ кхэр и чхува́ва троно лэ́скиро пэ ве́ко.

¹³Мэ ява́ва лэ́скэ дадэ́са, и ёв явэ́ла Ма́нгэ чхавэ́са, — и тангипэ́н (жалима) Миро Мэ на отлава лэ́стыр, сыр Мэ отлыём долэ́стыр, саво́ сыс англэды́р ту́тыр.

¹⁴Мэ чхува́ва лэс дро Миро кхэр и дро Миро кралипэ́н пэ ве́ко, и троно лэ́скиро явэ́ла твардо пэ ве́ко.’”

¹⁵Сарэ́ далэ́ лава́ и сарэ́ дыкхибэна украт (точнэс) пирипхэндя Нафано Давидо́скэ.

¹⁶И явдя́ кра́ли Дави́до, и тэрдия́ анги́л Растэ-Дэвлэ́стэ, и пхэндя́: “Кон мэ сом, Раё Дэ́вла, и со дасаво кхэр миро исын, со Ту адя́кэ чхудя́н упрэ́ ман.

¹⁷Нэ и дава́ ишчо (инкэ́) на́бут сыкадыя́ дрэ Тырэ́ якха́, Дэ́вла; Ту ракирэ́са пал кхэр Тырэ́-писхарискиро дура́л, и дыкхэ́са пэ ма́ндэ, сыр пэ барэ́ манушэ́стэ, Раё Дэ́вла! Дэ́вла!

¹⁸Со ишчо (инкэ́) могинэ́ла тэ дочхувэл анги́л Ту́тэ Дави́до ваш барипэ́н Тырэ́ писхари́скэ? Ту джинэ́са Тырэ́ писхари́с!

¹⁹Раё Дэ́вла! Ваш Тырэ́ писхари́скэ, пир ило́ Тыро́, Ту кэрэ́са саро́ дава́ баро́, соб (кай) тэ сыкавэс кажно райканыпэн.

²⁰Раё Дэ́вла! Нанэ явирэ́с, сыр Ту сан, и нанэ Дэвлэ́с, апри́ч Ту́тэ, пир саро́, со шундя́м амэ пэ́скирэ канэнца.

²¹И кон исын яви́р, сыр Тырэ́ Израилёскирэ мануша́, е́кх мануша́ пэ пхув, кэ савэ́ сыс яви Дэвэ́л, соб (кай) тэ выракхэл лэн Пэ́скэ дрэ манушэ́ндэ, тэ кэрэ́л Пэ́скэ лав барэ́ и даранэ рэндоса — манушэ́нгирэ традыпнаса криг Тырэ́ манушэ́нгирэ мо́стыр, савэ́н Ту зракхця́н Египто́стыр.

²²Ту кэрдя́н Тырэ́ Израилёскирэ манушэ́н, Пэскирэнца манушэ́нца пэ ве́ко, и Ту, Раё Дэ́вла, яця́н лэ́нгирэ Дэвлэ́са.

²³И адя́кэ акана́, о, Раё Дэ́вла, лав, саво́ Ту пхэндя́н пал Тырэ́ писхаристэ и пал лэ́скиро кхэр, кэр твардонэса пэ ве́ко и кэр, сыр Ту пхэндя́н.

²⁴И мэк тэ явэ́л и мэк тэ барьёл лав Тыро́ дро ве́ко, соб (кай) ракирдэ́: “Рай Дэвэ́л, болыбна́скирэ-янголэ́нгиро Дэвэ́л Израилёскиро, исын Дэвэ́л пэ Израилё”; и кхэр Тырэ́ писхарискиро Давидо́скиро, мэк тэ явэ́л твардо анги́л Тыро́ муй.

²⁵Пал-дова́ со Ту, Дэ́вла миро, откэрдян Тырэ́ писхари́скэ, со Ту кэрэ́са лэ́скэ кхэр; палдова́ Тыро́ писха́ри и ячян муршкано́ тэ мангэ́лпэ анги́л Ту́тэ.

²⁶И акана́, Раё Дэ́вла, Ту Дэвэ́л, и Ту пхэндя́н пал Тырэ́ писхаристэ дасаво лачхипэ́н.

²⁷Сыр сыс лачхо́ Ту́кэ лэ тэ бахтякирэс кхэр Тырэ́ писхарискиро, соб (кай) ёв тэ явэ́л пэ ве́ко анги́л Тыро́ муй. Пал-дова́, со ко́ли Ту, Раё Дэ́вла, бахтякирэса, тэды явэ́ла ёв бахтякирдо́ ве́чнэс пэ ве́ки.”