Read Baltic Romani Bible 2019 – Библия - Пэ Балтитко Романи чиб (Романэс) 2019 Е́здра 5 Bible Online

Е́здра 5 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Е́здра 5

¹Тэ́ньци проро́ко Аге́ё (Хагаё), и проро́ко Заха́рия, чхаво́ Идоскиро, ракирдэ́ Юдэ́нгэ, со явэ́ла анги́л Дэвлэ́скирэ Израилёскирэ лавэ́стыр, Саво́ сыс пэ лэ́ндэ.

²И о Зоровавелё, чхаво́ Шалтилоскиро, и Ёхошуа́ (Ису́со), чхаво́ Ёзадакоскиро, гинэ́ и лынэ́ тэ кэрэ́н буты́ пэ Кхэр (Кхангири́) Дэвлэ́скиро, саво́ исын дро Ерусалимо, и сыс лэ́нца проро́ки Дэвлэ́скирэ, савэ́ помогинэнас лэ́нгэ.

³Дро до са́мо цы́ро (часо) явнэ́ Фафнае [Татэнаё-ю.о.], тхэмэскиро барыдыро́ пэ доя́ риг округакири и Шэфар-Бознаё, и лэ́нгирэ мала́ пир буты́, и пхучнэпэ лэ́ндыр: “Кон припхэндя́ тумэ́нгэ тэ кэрэ́н Кхэр (Кхангири́), и тэ докончынэн далэ́ ва́нты?”

⁴Тэды, сыр трэй, амэ пхэндям [пхуцям-ю.о.] манушэ́нгирэ лава́, савэ́ кэрэ́нас буты́ пэ кхэр.

⁵Нэ якха́ Дэвлэ́скирэ сыс пэ Юдэ́нгирэ пхурыдырэндэ, и Персиякирэ рая на зачхудэ лэн тэ тэрдякирэн лэ́нгири буты́ анги́л дова́, сыр рэ́ндо явдя́ кэ Дариё, и тэ́ньчи анги́л дова́, сыр ёнэ дорэснэ́ отпхэныбэ́н лылэса пэ дава́ рэ́ндо

⁶Акэ, исын лылэскири копия, саво́ бичхадэ́ о Фафнаё, тхэмэскиро барыдыро́ пэ доя́ риг округакири (пашы́л Рэка Евфрато), и о Шэфар-Бознаё, и лэ́нгирэ мала́ пир буты́, крали́скэ Дариёскэ.

⁷Ёнэ бичхадэ́ дава́ допхэныбнытко лыл лэ́скэ, дро дава́ лыл ёнэ чхиндлэ́ адя́кэ:

⁸“Тэ явэ́л рама́нё (миро) Крали́скэ Дариёскэ дро саро́! Тэ явэ́л джиндло́ Крали́скэ, со амэ гиям дрэ округа Юдэ́я, кэ Кхэр (Кхангири́), Барэ́ Дэвлэ́скиро, саво́ обкэрэлапэ пхарэ́ барэ́нца, и каштуно матеряло чхувэ́лапэ дрэ ва́нты, и дая́ буты́ кэрэ́лапэ кучэс, и джа́ла кэ миштыпэ́н дрэ лэ́нгирэ васта́.

⁹Тэ́ньци амэ пхутямпэ кодолэ́ пхурыдырэндыр, и амэ адя́кэ пхэндям лэ́нгэ: “Кон припхэндя́ тумэ́нгэ тэ кэрэ́н дава́ Кхэр (Кхангири́) и тэ докончынэн далэ́ ва́нты?”

¹⁰Амэ адя́кэ-паць пхуцямпэ лэ́ндыр пал лэ́нгирэ лава́, соб (кай) амэ́нгэ тэ зачхинас лава́ манушэ́нгирэ, савэ́ сыс барыдыра́ пэ лэ́ндэ.

¹¹Акэ, со ёнэ пхэндлэ́ дро отпхэныбэ́н: “Амэ сам писха́рья Дэвлэ́скирэ, Саво́ исын пэ болыбэ́н и пэ пхув, и амэ кэра́са нэвэ́с кхэр, саво́ чхудэ́ бут бэрша́ палэ, саво́ чхудя́ баро́ кра́ли Израилёскиро и ёв докончындя лэс.

¹²Нэ пало́ дова́, сыр амарэ́ дада́ холякирдэ Дэвлэ́с болыбнаскирэс, Ёв выдыя лэн дро Навуходоносороскиро васт, саво́ сыс кра́ли Вавилоно́скиро, кон розмардя́ пэ котэра́ дава́ Кхэр (Кхангири́) и лыджия́ манушэ́н криг кэ Вавило́но.

¹³Нэ пэ пэ́рво бэрш Кираскиро, крали́скиро Вавилоно́скиро, о кра́ли Кира дыя́ упхэныбэ́н тэ кэрэ́л дава́ Кхэр (Кхангири́) Дэвлэ́скиро.

¹⁴И адя́кэ-паць кхорэ́ (сасу́ды) сувнакунэ́ и рупувэ́ кхэрэ́стыр Дэвлэскирэстыр, савэ́ о Навуходоносо́ро лыя́ кхэрэ́стыр Дэвлэскирэстыр, саво́ сыс дро Ерусалимо, и савэ́ ёв яндя́ дро Вавило́но-кодолэ́ сама кхорэ́ о Кра́ли Кира лыя́ кхангирья́тыр дро Вавило́но; и ёнэ сыс дынэ́ екхэ манушэ́скэ пир лав Шэшбацаро, савэ́с кра́ли чхудя́ барыдырэ́са пэ доя́ округа.

¹⁵И пхэндя́ кра́ли лэ́скэ: “Лэ кадалэ́ кхорэ́, джа́ и лы́джа лэн дрэ Кхангири́, со исын дро Ерусалимо, и кэрэ́н нэвэ́с Кхэр (Кхангири́) Дэвлэ́скиро пэ лэ́скиро штэ́то.”

¹⁶Тэ́ньци одова́ са́мо Шэшбацаро явдя́ и чхудя́ фунда́менто тэл Кхэр (Кхангири́) Дэвлэ́скиро, саво́ исын дро Ерусалимо; и долэ́ поратыр кэ акана́ кэрэ́на Кхэр (Кхангири́) Дэвлэ́скиро, и ёв нанэ ишчо (инкэ́) докончындло.”

¹⁷И акана́ палдава́, ко́ли дава́ тэ явэ́л мишто́ ваш крали́скэ, мэк тэ родэ́н дрэ пиралы́, сави́ исын дро крали́скиро кхэр, одо́й дро Вавило́но, ци дава́ исын чачо́, со о кра́ли Кира припхэндя́ тэ кэрэ́н дава́ Кхэр (Кхангири́) Дэвлэ́скиро кэ Ерусалимо, и, ко́ли тэ явэ́л лачхо́ крали́скэ, тэ бичхавэл Лэ́скиро лав амэ́нгэ пал дава́ рэ́ндо.