Read Baltic Romani Bible 2019 – Библия - Пэ Балтитко Романи чиб (Романэс) 2019 Е́здра 6 Bible Online

Е́здра 6 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Е́здра 6

¹Тэ́ньци о кра́ли Дариё дыя́ припхэныбэ́н и обродынэ кхэр, дро саво́ ракхнэ архивна свитки, кай сыс чхудэ́ кучипэна кэ Вавило́но.

²И дро Актабано, пэ штэ́то, саво́ сыс дрэ Мидиякири округа, латхнэ́ дасаво зачхиныбэн дро сви́тко:

³“Пэ пэ́рво бэрш, сыр о Кира яця́ крали́са, ёв дыя́ припхэныбэ́н пал Кхэр (Кхангири́) Дэвлэ́скиро кэ Ерусалимо: “Мэк тэ кэрэ́н Кхэр (Кхангири́) Дэвлэ́скиро пэ штэ́то, кэ саво́ ёнэ янэ́на свэ́нта дыибэна́; и мэк лачхэ́ фундаменты тэ чхувэ́н пир кадасавэ́ барипэна: лэ́скиро вучипэ́н тэ явэ́л шовдэша́ куня́, и лэ́скиро буґлыпэ́н тэ явэ́л шовдэша́ куня́;

⁴тэ явэ́н трин ряды барэ́ барэндыр, и екх рядо каштунэ матер΄ялостыр, соб (кай) тэ плэскирэн пал дава́ крали́скирэ кхэрэ́стыр.

⁵И адя́кэ-паць сувнакунэ́ и рупувэ́ кхорэ́ Кхэрэ́стыр Дэвлэскирэстыр, савэ́ о Навуходоносо́ро лыя́ Кхэрэ́стыр и яндя́ кэ Вавило́но, соб (кай) тэ отдэ́н палэ и тэ янэ́н палэ дро кхэр, саво́ исын кэ Ерусалимо, пэ лэ́нгиро штэ́то и, соб (кай) тэ чхувэ́н палэ лэн дро Кхэр (Кхангири́) Дэвлэ́скиро.

⁶Акана́, палдава́, Фафнаё (Фафнаё), тхэмэскиро барыдыро́ пэ округа пал Рэка, и Шэфар-Бознаё, и тумарэ́ дромэскирэ мала́ Пе́рсы, савэ́ исын палэ Рэка, рикирэнпэ дура́л одотхы́р.

⁷Мэк буты́ пэ Кхэр (Кхангири́) Дэвлэ́скиро тэ кэрэ́лпэ дурэды́р; мэк Юдэ́нгирэ-тхэмэскиро шэрало́ и Юдэ́нгирэ пхурыдыра́ тэ чхувэ́н дава́ Кхэр (Кхангири́) Дэвлэ́скиро пэ лэ́скиро штэ́то.

⁸И мэ адя́кэ-паць дава́ припхэныбэ́н пал дова́, со тумэ́нгэ трэй тэ кэрэ́н ваш Юдэ́нгирэ пхурыдырэнгэ пэ Кхэр (Кхангири́) Дэвлэ́скиро: мэк тэ плэскирэн пал дая́ буты́ крали́скирэ бажынятыр, сави́ скэдэлапэ манушэ́ндыр дрэ провинцыя палэ Рэка, дава́ екха́тыр трэй тэ дэн кодолэ́ манушэ́нгэ, соб (кай) тэ на тэрдёл дая́ буты́.

⁹И соб (кай) тэ дэн ада́кицы, кицы́ трэй — тэрнэ́ гуруворэ́н, бакрэ́н и бакрорэ́н тэ янэ́н цэ́ла хачкирибна Дэвлэ́скэ болыбнаскирэскэ, и гивны (парно́ гив), и лонд, и мол (вино). Маслинитко дзэт, сыр пхэнэ́на рашая́, савэ́ исын дро Ерусалимо, соб (кай) тэ дэн лэ́нгэ со дывэ́с би зарикирибнаскиро,

¹⁰соб (кай) ёнэ могиндлэ́ тэ янэ́н гудлэ́-кхандыпнаскирэ свэ́нта дыибэна́ Дэвлэ́скэ болыбнаскирэскэ, и соб (кай) ёнэ тэ мангэ́нпэ Дэвлэ́скэ пал крали́скиро састыпэн и лэ́скирэ-чхавэ́нгиро.

¹¹Мэ адя́кэ-паць припхэндём, со, ко́ли вари-кон парувэла миро чхиндло́ припхэныбэ́н, мэк тэ вытырдэн бэрно лэ́скирэ кхэрэ́стыр, и тэ чхувэ́н лэс упрэ́, и мэк тэ кэрэ́н далэ́ кхэрэ́стыр груда пхагирдэ́-котэрэнгири.

¹²И мэк Дэвэ́л, Саво́ кэрдя́ адя́кэ, соб (кай) Лэ́скиро Лав тэ ячэ́лпэ одо́й, тэ равэл тэлэ́ кажнонэ́ крали́с ци манушэ́н, ко́ли вари-кон лэ́ндыр тэ ґаздэл анги́л васт тэ парувэл ци тэ пхагирэл дая́ Кхангири́, сави́ исын дро Ерусалимо. Мэ, Дариё, дыём дава́ припхэныбнытко стату́то, тэ кэрэ́н добусо́вэс (кучэс) саро́ пир лэ́стэ”.”

¹³Тэ́ньци о Фафэнаё, тхэмэскиро барыдыро́, пир округа, со сыс палэ рэка (лэнь), о Шэфар-Бознаё, и лэ́нгирэ мала́ добусовэс кэрдэ́ саро́ пир дова́, со бичхадя́ тэ кэрэ́н кра́ли Дариё.

¹⁴Адя́кэ кэрдэ́ буты́ пхурыдыра́ Юдэ́нгирэ, и лэ́нгэ удэласпэ кэ миштыпэ́н пир Агеёскиро ангилпхэныбэ́н, кон сыс проро́ко, и сыр ангилпхэнэлас о Заха́рия, чхаво́ Идоскиро. И ёнэ кэрдэ́ буты́ и кончындлэ ла, сыр и припхэндя́ Дэвэ́л Израилёскиро, и сыр припхэндлэ Кира, Дариё, Артаксерксо-кра́лья Персиякирэ.

¹⁵И акэ, Кхэр (Кхангири́) сыс докэрдо пэ три́то дывэ́с дро чхон Адаро, саво́ сыс дро шо́вто бэрш, сыр лыя́ тэ кралинэ́л кра́ли Дариё.

¹⁶И чхавэ́ Израилёскирэ, рашая́ и Леви́ты, и сарэ́ яви́р мануша́, кон рисия́ плено́стыр, свэнкиндлэ радыма́са, со сыс обсвэнцындло Кхэр (Кхангири́) Дэвлэ́скиро.

¹⁷И яндлэ́ ёнэ свэ́нта дыибэна́, ке́ли свэнцынэнас Кхэр (Кхангири́) Дэвлэ́скиро шэл гурува, дуйшэла́ бакрэ́ штаршэла́ бакрорэ, дэшуду́й бузнэ (козлы), сыр свэ́нто дыибэ́н пал Израилё пир дова́, со исын дэшуду́й ро́дыцы Израилёскирэ.

¹⁸И ёнэ чхудэ́ раша́н пир лэ́нгирэ-бутякирэ штэ́ты и Левитэ́н пир бутя́ дрэ лэ́нгирэ групы тэ кэрэ́н буты́ ваш Дэвлэ́скэ дро Ерусалимо, сыр чхиндло́ дрэ Мойзаскири лылвари́.

¹⁹И свэнкиндлэ Патради́ чхавэ́ Юдэ́нгирэ, кон сыс дро пле́но, пэ дэшуштарто дывэ́с дро пэ́рво чхон.

²⁰Пал-дова́ со э рашая́ и Леви́ты жужакирдэ́ (чыстиндлэ) пэс со кэ е́кх ману́ш: ёнэ сарэ́ сыс жужэ́. И ёнэ замардэ́ Патрадитконэ бакрорэ́н пал манушэ́нгирэ чхавэ́ндэ, савэ́ сыс дро пле́но, пал лэ́нгирэ пшалэ́ндэ, пал рашандэ, и пал пэ́стэ.

²¹И ханэ́ чхавэ́ Израилёскирэ, савэ́ рисинэ́ плено́стыр, кхэтанэ́ сарэ́ одолэнца, кон дурия ваш пэ́скэ магирибнастыр, саво́ гия́ Наюдытконэ́ нацые́ндыр пэ пхув, соб (кай) тэ родэ́н древа́н Рас-Дэвлэ́с, Дэвлэ́с Израилёскирэс.

²²И ёнэ кэрдэ́ опреснокэнгиро Свэ́нко пэ эфта́ дывэса́ радыма́са, пал-дова́ со Рай Дэвэ́л обрадындя лэн, и Ёв рискирдя́ ило́ крали́скиро Асириятыр кэ ёнэ, тэ зоралякирэн лэ́нгирэ васта́ дрэ буты́ пэ Кхэр (Кхангири́) Дэвлэ́скиро, Дэвлэ́скирэ Израилёскиро.