Read Baltic Romani Bible 2019 – Библия - Пэ Балтитко Романи чиб (Романэс) 2019 Эстэр 4 Bible Online

Эстэр 4 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Эстэр 4

¹Ке́ли Мардохе́ё уджиндя́ саро́, со кэрдя́пэ, ёв роскустя пэ́скирэ и́ди, и чхудя́ пэ пэ́стэ балытко гоно́ (вре́тишчо) и пра́ска; и ёв выгия́ пэ машкира́л фо́ро барэ́ и кирконэ ясвэ́нца, и задыя го́дла.

²И догия́ кэ крали́скирэ вудара́; адя́кэ сыр нашты́ сыс тэ заджа́л дрэ крали́скирэ вудара́ дро балытко гоно́.

³Адя́кэ-паць и дро кажно провинцыя и штэ́то, карик догия́ крали́скиро припхэныбэ́н и лэ́скиро упхэныбэ́н, сыс баро́ пиридживипэн Юдэ́нгэ, и посто, и ровибэн, и го́дла; балытко гоно́ и пра́ска сыс чхуибнаса ваш бутэнгэ манушэ́нгэ.

⁴И явнэ́ бутярнэ́ Эстэракирэ и ла́кирэ е́внухи, и роспхэндлэ́ ла́кэ, и древа́н зоралэ́с лыя́ тэ пиридживэл кра́лица. И ёй бичхадя́ и́дя, соб (кай) Мардохе́ё тэ урьявэл лэн и тэ злэл пэ́стыр пэ́скиро балытко гоно́; нэ ёв на прилыя́.

⁵Тэды Эстэ́ра кхардя́ Гафахос, екхэ крали́скирэ евнухэндыр, савэ́с кра́ли чхудя́ кэ ёй, и бичхадя́ лэс кэ Мардохе́ё тэ уджинэл: со сыс дасаво и со́стыр дава́ гия́?

⁶И гия́ Гафахо кэ Мардохе́ё пэ форо́скири форуны́ (пло́шча), сави́ сыс анги́л крали́скирэ вудара́.

⁷И роспхэндя́ лэ́скэ Мардохе́ё пал саро́, со лэ́са кэрдя́пэ, и пал ци бут руп, пал саво́ дыя́ лав Ама́но тэ плэскирэл дрэ крали́скири пиралы́ (казна) пал Юдэ́ндэ, соб (кай) тэ мулякирэ́н лэн.

⁸И подыя лэ́скэ манушэ́нгиро пиричхиныбэн припхэныбнастыр, саво́ сыс пхэндло́ дрэ Сузы, и пал мулякирибэн лэ́нгиро, соб (кай) тэ сыкавэ́л Эстэракэ и тэ дэл джиныбэ́н ла́кэ пал саро́; апри́ч дава́ ёв пхэндя́ ла́кэ, соб (кай) ёй тэ джал кэ кра́ли и древа́н тэ мангэ́л лэс тэ потангинэл (тэ жалинэл) лэн и, соб (кай) ёй мангдя́ лэс пал пэ́скирэ манушэ́ндэ.

⁹И явдя́ Гафахо, и пирипхэндя Эстэракэ Мардохеёскирэ лава́.

¹⁰И пхэндя́ Эстэ́ра Гафахоскэ, и бичхадя́ лэс тэ пхэнэ́л Мардохеёскэ:

¹¹“Сарэ́ мануша́, савэ́ кэрэ́на буты́ пашы́л крали́стэ и дрэ крали́скирэ провинцыи джинэ́на, со кажнонэ́скэ манушэ́скэ, и муршэскэ и джувля́кэ, кон заджа́ла кэ кра́ли дрэ андратуны́ грэ́да, и кон на сыс кхардо, екх сэ́ндо — мэрибэ́н; екх одова́, кэ кон протырдэла кра́ли пэ́скиро сувнакуно́ дэсто́, кодова́ ячэ́лапэ джидо́. А мэ на сом кхарды кэ кра́ли, ґа́да, аж трия́нда дывэса́.”

¹²И пирипхэндлэ Мардохеёскэ Эстэракирэ лава́.

¹³И пхэндя́ Мардохе́ё дрэ отпхэныбэ́н Эстэракэ: “На думин, со ту екхджины зракхэсапэ дро крали́скиро кхэр сарэ́ Юдэндыр.

¹⁴Ко́ли ту дро дава́ часо явэ́са штыл (промолчинэса), тэды васт (помошч) и зракхибэ́н явэ́на ваш Юдэ́нгэ явирэ штэто́стыр, а ту и тырэ́ — дадэ́скиро кхэр, хасёна. И кон джинэ́ла, ци на ваш дава́ часо ту и дорэсцян (долыян) крали́скири паты́в?”

¹⁵И пхэндя́ Эстэ́ра адя́кэ дро отпхэныбэ́н Мардохеёскэ:

¹⁶“Джа́, скэ́дэ сарэ́ Юдэ́н, савэ́ исын дрэ Сузы, и постинэн ваш ма́нгэ, и на хан и на пьен трин дывэса́, ни дывэсэ́, ни раты́, и мэ пэ́скирэ бутярнэнца адя́кэ-паць ява́ва тэ постинав, и коригэды́р (позжэ) мэ джа́ва кэ кра́ли, хоць дава́ исын проти зако́но, и ко́ли трэй явэ́ла тэ хасёвав, то хасёвава.”

¹⁷И гия́ Мардохе́ё, и кэрдя́, сыр припхэндя́ лэ́скэ Эстэ́ра.