Read Baltic Romani Bible 2019 – Библия - Пэ Балтитко Романи чиб (Романэс) 2019 Выгиибэн 16 Bible Online

Выгиибэн 16 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Выгиибэн 16

¹И гинэ́ Елимостыр, и явдя́ саро́ скэдыибэ́н Израилёскирэ-чхавэ́нгиро пэ чхучи́ (пусто) пхув Сино, со исын машки́р Елимо и машки́р Синаё, пэ дэшупанджто дывэ́с явирэ-чхонэ́скиро пир лэ́нгиро выгиибэн Египто́скирэ пхувья́тыр.

²И лынэ́ тэ жалинэнпэ холя́са (загодлынэ) Израилёскирэ-чхавэ́нгиро скэдыибэ́н пэ Мойзастэ и Аароностэ пэ чхучи́ пхув,

³и пхэндлэ́ лэ́нгэ Израилёскирэ чхавэ́: “Нэ, ко́ли амэ тэ мэрас Ра́скирэ-Дэвлэ́скирэ вастэ́стыр пэ Египто́скири пхув, ке́ли амэ са́мас бэштэ́ пашы́л пирья масэса, и ке́ли амэ хаям маро́ кэ чалыпэн! Палдава́ со вылыджинэ́ тумэ́ амэн пэ дая́ чхучи́ пхув, соб (кай) саро́ дава́ скэдыибэ́н тэ мулякирэ́н бокхаса.”

⁴И пхэндя́ Рай Дэвэ́л Мойза́скэ: “Ѓа́да, Мэ мэкава тэлэ́ тумэ́нгэ сыр брышы́нд маро́ болыбна́стыр, и мэк мануша́ тэ выджа́н и тэ скэдэ́н кажно дывэ́с, ци бут трэй пэ дывэ́с, соб (кай) Ма́нгэ тэ спробинав лэн, ци явэ́на ёнэ тэ кэрэ́н пир Миро Зако́но, ци над;

⁵а пэ шо́вто дывэ́с мэк тэ скэдэ́н, со янэ́на, и явэ́ла дрэ дуй мо́лы буты́р проти дова́, пэ кицы́ скэдэ́на ёнэ дрэ яви́р дывэса́.”

⁶И пхэндлэ́ Мо́йза и Ааро́но сарэ́ Израилёскирэ-чхавэ́нгирэ скэдыибнаскэ: “Бэльвэле́ уджинэна тумэ́, со Рай Дэвэ́л вылыджия́ тумэн Египто́скирэ пхувья́тыр,

⁷и пэ ра́нко (пэ зло́ко) дыкхэ́на Ра́скирэ-Дэвлэ́скири сла́ва, пал-дова́ со шундя́ Ёв тумаро́ холямо́ ракирибэ́н пэ Растэ-Дэвлэ́стэ: а амэ, кон сам адасавэ́, со тумэ́ ракирэ́на пэ амэ́ндэ?”

⁸И пхэндя́ Мо́йза: “Тумэ́ уджинэна, ке́ли Рай Дэвэ́л бэльвэле́ дэ́ла тумэ́нгэ мас дрэ хабэ́н, а пэ ра́нко маро́, кицы́ тумэ́ камэ́на, пал-дова́ со Рай Дэвэ́л шундя́ го́дла тумари́, сави́ тумэ́ ґаздынэ́ проти Лэ́стэ: а амэ со? Тумари́ го́дла на пэ амэ́ндэ, а пэ Растэ-Дэвлэ́стэ.

⁹И пхэндя́ Мо́йза Аароно́скэ: “Пхэн сарэ́ Израилёскирэ чхавэ́нгирэ скэдыибнаскэ: тэрдён анги́л Ра́скирэ-Дэвлэ́скиро муй, пал-дова́ со Ёв шундя́ тумари́ го́дла.”

¹⁰И ке́ли ракирдя́ Ааро́но кэ саро́ Израилёскиро-чхавэ́нгирэ скэдыибэ́н, тэды ёнэ рисинэ́ мо́са пэ чхучи́ пхув, и ґа́да, Раскири-Дэвлэ́скири сла́ва явдя́ дро о́блоко.

¹¹И пхэндя́ Рай Дэвэ́л Мойза́скэ:

¹²“Мэ шундём Израилёскирэ-чхавэнгири го́дла; пхэн лэ́нгэ: ‘Бэльвэле́ явэ́на тэ хан мас, а пэ зло́ко чалёна марэ́са, и уджинэна, со Мэ сом Рай Дэвэ́л (Яхва́), Дэвэ́л тумаро́.’”

¹³Бэльвэле́ приурняндынэ перепёлы и зачхакирдэ ста́но, а пэ ра́нко сыс пашты пахлын (роса) пашы́л ста́но;

¹⁴пахлын ґаздыя́пэ, и ґа́да, упра́л пэ чхучи́ пхув вари-со дробно (хурдо), сыр крупа, дробно, сыр инеё пэ пхув.

¹⁵И дыкхнэ́ Израилёскирэ чхавэ́, и ракирдэ́ екх екхэ́скэ: “Со исын дава́?” Пал-дова́ со ёнэ на джиндлэ́, со сыс дава́. И Мо́йза пхэндя́ лэ́нгэ: “Дава́ исын маро́, саво́ Рай Дэвэ́л дыя́ тумэ́нгэ дро хабэ́н;

¹⁶ґа́да, со пхэндя́ Рай Дэвэ́л: ‘Скэдэ́н лэс кажно ману́ш пэ ада́кицы, ци бут лэ́скэ тэ хал, пир гоморо пэ манушэ́стэ, ци бут исын манушы́тка дия́, дрэ доя́ ша́тра, скэдэ́н ада́кицы.’”

¹⁷И кэрдэ́ адя́кэ Израилёскирэ чхавэ́, и скэдынэ́, кон бут, кон на́бут.

¹⁸И мериндлэ гомороса, и одолэ́стэ, кон скэдыя́ бут, на сыс буты́р мератыр, и кодолэстэ, кон скэдыя́ на́бут, на сыс наухтылыбэн. Кажно скэдыя́ ада́кицы, ци бут трэиндя́ тэ схал лэ́скэ.

¹⁹И пхэндя́ лэ́нгэ Мо́йза: “Нико́н тэ на ячкирэл дава́ кэ ра́нко.”

²⁰Нэ ёнэ на кандынэ́ Мойза́с, и ячкирдэ́ вари-савэ́ котэра́ далэ́стыр кэ ра́нко, — и залыджинэпэ кирмэ, и ёй закхандыя. И холя́сыя пэ лэ́ндэ Мо́йза.

²¹И ёнэ скэдэнас лэс тася́рлэс (ра́нэс) пэ кажно ра́нко, кажно ци бут лэ́скэ тэ схал; нэ ке́ли притатькирэла кхам, ёв маро́, биладыя (таиндя).

²²Пэ шо́вто дывэ́с скэдынэ́ маро́ дрэ дуй мо́лы, пир дуй гоморы пэ кажнонэ́стэ, и явнэ́ сарэ́ барыдыра́ скэдыибнаскирэ, и роспхэндлэ́ Мойза́скэ.

²³И ёв пхэндя́ лэ́нгэ: “Ѓа́да, со пхэндя́ Рай Дэвэ́л: атася́ откхиныбэн, свэ́нто Ра́скирэ-Дэвлэ́скиро са́вато (субо́та); со трэй тэ пэкэн, пэкэн, и со трэй тэ кэравэн, кэравэн ададывэ́с, а со ячэ́лапэ, отчхувэн и зракхэн кэ ра́нко.

²⁴И отчхудэ дова́ кэ ра́нко, сыр пхэндя́ Мо́йза, и ёв на закхандыя, и кирмэн на сыс дрэ лэ́стэ.

²⁵И пхэндя́ Мо́йза: “Хан лэс ададывэ́с, пал-дова́ со ададывэ́с Ра́скирэ-Дэвлэ́скиро са́вато; ададывэ́с на латхэ́на лэс пэ фэ́лда;

²⁶шов дывэсе скэдэ́н лэс, а пэ эфта́то дывэ́с — са́вато, на явэ́ла лэс дро дава́ дывэ́с.”

²⁷Нэ вари-савэ́ манушэ́ндыр выгинэ́ дро эфта́то дывэ́с тэ скэдэ́н, и на латхнэ́.

²⁸И пхэндя́ Рай Дэвэ́л Мойза́скэ: “Ци бут (длу́гэс) тумэ́ явэ́на тэ на кэрэ́н пир Мирэ́ упхэныбэна́ и Мирэ́ зако́ны?

²⁹Дыкхэ́н, Рай Дэвэ́л дыя́ тумэ́нгэ са́вато, пал-дова́ Ёв дэ́ла дрэ шо́вто дывэ́с маро́ пэ дуй дывэса́: ячэ́нпэ кажно пэ́стэ. Нико́н тэ на выджа́л пэ́скирэ штэто́стыр пэ эфта́то дывэ́с.”

³⁰И мангнэпэ мануша́ пэ эфта́то дывэ́с.

³¹И дыя́ Израилёскиро кхэр долэ́ марэскэ лав: манна; ёй сыс сыр кориандрэскиро семё, парно́, смакоса сыр мариклы авгинэса.

³²И пхэндя́ Мо́йза: “Ѓа́да, со пхэндя́ Рай Дэвэ́л: ‘Чхувэ́н пхэрдэ́с маннаса гоморо ваш зракхибэ́н дрэ тумарэ́ ро́ды, соб (кай) тумэ́ тэ дыкхэ́н маро́, савэ́са Мэ чарадём тумэн пэ чхучи́ пхув, сыр вылыджиём тумэн Египто́скирэ пхувья́тыр.’”

³³И пхэндя́ Мо́йза Аароно́скэ: “Лэ екх кхоро́ (сасудо), и чхув дрэ лэ́стэ пхэрдо́ гоморо манна, и чхув лэс анги́л Растэ-Дэвлэ́стэ ваш зракхибэ́н дрэ тумарэ́ ро́ды.”

³⁴И чхудя́ лэс Ааро́но анги́л ковчэго (мохто́) тэ допхэнэл пал зракхибэ́н, сыр пхэндя́ Рай Дэвэ́л Мойза́скэ.

³⁵Израилёскирэ чхавэ́ ханэ́ манна штардэша́ бэрш, пака явнэ́ пэ пхув, пэ сави́ дживдэ́; манна ханэ́ ёнэ, пака явнэ́ пэ Ханааноскирэ-ригакири ме́жа.

³⁶А гоморо исын дэ́што паш эфатыр.