Read Baltic Romani Bible 2019 – Библия - Пэ Балтитко Романи чиб (Романэс) 2019 Выгиибэн 21 Bible Online

Выгиибэн 21 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Выгиибэн 21

¹И ґа́да, исын зако́ны, савэ́ ту дэ́са тэ джинэ́с лэ́нгэ (Израильтянэнгэ):

²“Ко́ли ту кинэса писхари́с Юдос, мэк ёв тэ кэрэ́л буты́ шов бэрш, а пэ эфта́то (битринэ́нгиро дэ́што) мэк ёв тэ выджа́л пэ во́ля би ловэнгиро;

³ко́ли ёв явдя́ екхджино́, мэк екхджино́ и тэ выджа́л; а ко́ли ёв исын романдуно, мэк тэ выджа́л лэ́са и лэ́скири ромны́;

⁴ко́ли лэ́скиро хула́й дыя́ лэ́скэ ромня́, и ёй бияндя́ лэ́скэ чхавэ́н и чхае́н, тэды ромны́ и ла́кирэ чхавэ́ мэк тэ ячэ́нпэ адалэ́ хуластэ, а ёв выджа́ла екхджино́;

⁵нэ ко́ли писха́ри пхэнэ́ла: ‘Миро хула́й исын дро́го ма́нгэ, миры ромны́ и мирэ́ чхавэ́, мэ на джа́ва пэ во́ля,’ —

⁶тэды мэк лэ́скиро хула́й тэ янэл лэс анги́л сэндарьендэ (дэвлорэндэ), и тэ чхувэ́л лэс кэ вуда́р ци кэ косяко, и лэ́скиро хула́й тэ пропхусавэл лэ́скиро кан ярьяса, и ёв ячэ́лапэ лэ́скирэ писхариса пэ саро́ ве́ко.

⁷Ко́ли вари-кон бикнэла пэскирья́ чха дрэ писхарицатэ, тэды ёй нашты́ (на могинэ́ла) тэ выджа́л, сыр выджа́на писха́рья;

⁸ко́ли ёй на кэрдя́ пир ило́ пэ́скирэ хула́скэ, и ёв ла на обрэнчынэла (ангрустякирэла), мэк ёв тэ дэл во́ля ла́кэ, соб (кай) ла тэ выкинэн; а чужонэ́ манушэ́нгэ нашты́ ла тэ бикнэл лэ́скэ, ке́ли кокоро́ на закамдя́ ла;

⁹ко́ли ёв обрэнчынэла (ангрустякирэла) ла пэ́скирэ чхавэ́скэ, мэк тэ обжалпэ ла́са, сыр пэ́скирэ чхаенца;

¹⁰ко́ли явирья пал лэ́стэ лэ́ла, тэды ёй на банги тэ ячэ́лпэ би хабнаскиро, би идякиро и би романдуно джиибна́скиро;

¹¹а ко́ли ёв далэ́ трин рэ́нды на кэрэ́ла ваш ла́кэ, мэк ёй тэ отджал во́льно, би выкиныбнаскиро.

¹²Кон пэкавэла манушэ́с адя́кэ, со ёв мэрэ́ла, мэк одова́ ману́ш тэ явэ́л отдыно́ пэ мэрибэ́н;

¹³нэ, ко́ли вари-кон на камдя́, а Дэвэ́л домэкця лэ́скэ тэ попэрэл тэл лэ́скирэ васта́, тэды Мэ упхэнава ту́кэ штэ́то, карик тэ нашэ́л о ману́ш, саво́ замардя́;

¹⁴а ко́ли, кон скэдэлапэ тэ замарэ́л пашатунэс, тэды и Мирэ́ алтарёстыр (жэртвеникостыр) лэ лэс пэ мэрибэ́н.

¹⁵Кон пэкавэла пэ́скирэ дадэ́с ци пэ́скирэ да, одолэ́с трэй тэ отдэ́н пэ мэрибэ́н.

¹⁶Кон чорэла манушэ́с и бикнэла лэс; ци ёв латхэлапэ дрэ лэ́скирэ васта́, тэды трэй тэ отдэс лэс пэ мэрибэ́н.

¹⁷Кон кошэла пэ́скирэ дадэ́с ци пэскирья́ да, одолэ́с трэй тэ отдэс пэ мэрибэ́н.

¹⁸Ке́ли кошэнапэ, и екх ману́ш пэкавэла явирэ́с барэса ци бурныкаса (кулакоса), и одова́ на мэрэ́ла, нэ занасвалёла,

¹⁹тэды, ко́ли ёв уштэ́ла и явэ́ла тэ выджа́л кхэрэ́стыр каштэса, кон пэкадя́ лэс, на явэ́ла отдыно́ пэ мэрибэ́н; екх мэк одова́ ману́ш тэ заплэскирэл ловэ́ пал дова́ часо, ци бут ёв на кэрдя́ буты́ и тэ дэл ловэ́ пэ лэ́скиро састякирибэн.

²⁰А ко́ли кон пэкавэла пэ́скирэ писхари́с ци дына́рица каштэса, и ёнэ мэрэ́на тэл лэ́скиро васт, тэды ёв исын банго́ тэ лыджа́л ка́ра;

²¹нэ ко́ли ёнэ екх дывэ́с ци дуй дывэса́ явэ́на джидэ́, тэды нашты́ тэ чхувэ́л ка́ра пэ лэ́стэ, пал-дова́ со ёнэ исын лэ́скиро руп.

²²Ке́ли марэнапэ мануша́, и пэкавэна пэраля джувля́, и ёй счхурдэла, нэ на явэ́ла яви́р дош, тэды трэй тэ лэс бангэ́ манушэ́стыр штрафо, саво́ чхувэ́ла пэ лэ́стэ одолэ́-джувля́киро ром, и ёв исын банго́ тэ заплэскирэл, ци бут лэ́скэ пхэнэ́на сэнда́рья анги́л манушэ́ндэ;

²³а ко́ли явэ́ла дош, тэды отдэ́ ди пал ди,

²⁴якх пал якх, данд пал данд, васт пал васт, ґэро́й пал ґэро́й,

²⁵обхачкирибэн пал обхачкирибэн, рана (дукхады) пал рана (дукхады), пэкаибэн пал пэкаибэн.

²⁶Ко́ли вари-кон пэкавэла пэ́скирэ писхари́с дрэ якх, ци пэскирья́ писхарица дрэ якх, и пошкодынэла ла: мэк тэ отмэкэ́л лэн пэ во́ля пал якх;

²⁷и ко́ли вымарла пэ́скирэ писхари́скэ ци пэ́скирэ писхарицакэ данд, мэк тэ отмэкэ́л пэ во́ля пал данд.

²⁸Ко́ли гурув запхусавэла муршэ́с ци джувля́ кэ мэрибэ́н, тэды гурувэ́с тэ замарэ́н барэ́нца, и лэ́скиро мас тэ на хан; а хула́й гурувэскиро на банго́;

²⁹нэ ко́ли гурув англэды́р пхусадяпэ (бодиндяпэ) и тася́ и пэ три́то дывэ́с, и лэ́скирэ хула́скэ сыс пхэндло́ пал дава́, и ёв на ракхця́ лэс, а гурув замардя́ муршэ́с ци джувля́, тэды гурувэ́с тэ замарэ́н барэ́нца, и лэ́скирэ хула́с тэ отдэ́н пэ мэрибэ́н;

³⁰ко́ли пэ лэ́стэ явэ́ла чхудо выкиныбэ́н, мэк тэ дэл выкиныбэ́н пал пэ́скиро ди, саво́ чхудо явэ́ла пэ лэ́стэ.

³¹Нэ ко́ли ёв запхусавэла ци чхаворэс, ци запхусавэла чхаёрья, — пир дава́-паць зако́но тэ обжанпэ лэ́са.

³²Ко́ли гурув запхусавэла дынари́с ци дына́рица, тэды лэ́скирэ хула́скэ тэ заплэскирэл трия́нда шэкэли руп, а гурувэ́с тэ замарэ́н барэ́нца.

³³Ко́ли кон росчхакирэла ґанби́н (яма), ци, ко́ли кон выганавэла ґанби́н (яма) и на зачхакирэла ла, и пэрэ́ла дрэ ла́тэ гурув ци о́сло (мега́ри),

³⁴тэды хула́й ґанбинакиро исын банго́ тэ заплэскирэл, тэ отдэ́л руп лэ́нгирэ хула́скэ, а мас явэ́ла лэ́скиро.

³⁵Ко́ли конэ́скиро гурув запхусавэла кэ мэрибэ́н лэ́скирэ-суседоскирэ гурувэ́с, мэк тэ бикнэн джидэ́ гурувэ́с и тэ роскэрэн пэ паш лэ́скири тими́н; адя́кэ-паць и замардэ́ гурувэ́с мэк тэ роскэрэн пэ паш;

³⁶а ко́ли исын джиндло́, со гурув пхусавэлапэ (бодинэлапэ) и тася́ и пэ три́то дывэ́с, нэ лэ́скиро хула́й на ракхця́ лэс, тэды ёв исын банго́ тэ заплэскирэл гурувэ́с пал гурувэстэ, а замардо явэ́ла лэ́скиро.