Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 10 Bible Online

Псалм 10 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 10

¹[9.22-р.с.] Со́скэ, Раё Дэ́вла, Ту сан адя́кэ дура́л? Со́скэ Ту ґарадёса амэ́ндыр дрэ пхарэ́ дывэса́?

²[23] Фуй мануша́, савэ́ пхутёна пэс, тасавэна чорорэ́ манушэ́с, мэк ёнэ кокорэ́ тэ пэрэ́н зракирибнастыр, со ёнэ придуминдлэ.

³[24] Фуй мануша́ пхутёна пэ́скирэ налачхэ́ камибнаса дро ило́. И мануша́, савэ́ исын ґалка (корысна) кэ чу́жо миштыпэ́н, кошэна и тыкнякирэна Рас-Дэвлэ́с.

⁴[25] Фуй мануша́ пал пэ́скирэ пхутькирибэ́н на дыкхэ́на пэ Лэ́стэ, дрэ лэ́нгири годы́ нанэ штэ́то ваш Дэвлэ́скэ.

⁵[26] Ёнэ доджана кэ саро́ дро пэ́скиро джиибэ́н, лэ́нгэ нанэ пир годы́ тэ ґалён, сыр Ту сэндякирэса, ёнэ дыкхэна бипатыва́кирэс пэ пэ́скирэ вэргэ́ндэ.

⁶[27] Ёнэ думинэ́на пэ́скэ: “Мэ ние́кхвар на пэрава, мэ пир сарэ́ ро́ды на давапэ дукха́.”

⁷[28] Ке́ли ёнэ ракирэ́на, ёнэ кошэна, хохавэна и трашакирэна манушэ́н, лэ́нгири чиб ракирэ́ла чорипэ́н и дошакирэла манушэ́н.

⁸[29] Кадасаво́ ману́ш гарадёла пашы́л гаворо; ёв замарэла бибангипна́скирэ манушэ́с пэ чораханэ штэ́ты. Лэ́скирэ якха́ поддыкхэна пал бизорья́кирэ манушэ́стэ.

⁹[30] Ёв гарадёла и ужакирэ́ла сыр шчэр (ле́во) дрэ хашча (логово); ёв гарадёла и ужакирэ́ла одолэ́н, кон исын бизорья́киро. Ёв ухтылэ́ла лэс и тырдэла лэс дрэ пэ́скири фэлы́ (петля).

¹⁰[31] Ёв бандёла кэ пхув, ёв пасёла, соб (кай) тэ пэрэ́л пэ чорорэстэ сарэ́ зорья́тыр.

¹¹[32] Ёв думинэ́ла пэ́скэ: “Дэвэ́л бистырдя. Ёв гарадя Пэ́скирэ якха́, Ёв на дыкхэ́ла дава́.”

¹²[33] Тэрдёв анги́л, Раё Дэ́вла, пэкав фуе́ манушэ́н. Придыкх пал одолэ́ндэ, савэ́ страдынэна.

¹³[34] Со́скэ фуй ману́ш тыкнякирэла Дэвлэ́с? Со́скэ ёв ракирэ́ла пэ́скэ: ‘Ёв на чхувэ́ла ка́ра пэ ма́ндэ.’

¹⁴[35] Нэ Ту дыкхця́н дава́, пал-дова́ со Ту кокоро́ дыкхэ́са цямкэс пэ одолэ́ндэ, конэ́скэ исын пхаро́ и кон страдынэла. И кажно мо́ло Ту сан скэдыно́ тэ подэл васт. Бизорья́кирэ ману́ш тырдэлапэ кэ Ту, Ту ўса́ды (сак) дэсас васт бидадэскирэскэ.

¹⁵[36] Пхагир зор дрэ васта́ фуе́ и чорэ́ манушэ́ндэ. Чхув ка́ра пэ лэ́ндэ, пака ёнэ пириячэна тэ кэрэ́н чорипэ́н.

¹⁶[37] Рай Дэвэ́л исын Кра́ли пэ сарэ́ бэрша́ и ве́ки. Наюдэнгирэ на́цыи хасёна Лэ́скирэ пхувья́тыр.

¹⁷[38] Раё Дэ́вла, Ту шунэса, пал со мангнэпэ Ту́кэ одолэ́, савэ́ страдынэна явирэндыр, Ту зорьякирдян лэ́нгиро ило́.

¹⁸[39] Ту шунэса мангипэ́н илэ́стыр — бидадэскирэн и чорорэн, соб (кай) ние́кх ману́ш пэ пхув тэ на трашакирэл.