Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 105 Bible Online

Псалм 105 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 105

¹[104-р.с.] Парикирэ́н, тумэ́, Ра́скэ-Дэвлэ́скэ! Кхарэ́н Лэ́скиро лав! Роспхэнэ́н манушэ́нгэ, со Ёв кэрдя́.

²Бага́н Лэ́скэ, бага́н псалмы Лэ́скэ, розлэн сарэ́ Лэ́скирэ ди́вна бутя́.

³Сла́ва Лэ́скирэ свэнтонэ́ лавэ́скэ; мэк тэ радынэ́лпэ ило́ до манушэ́нгиро, кон родэ́ла Рас-Дэвлэ́с.

⁴Родэ́н Рас-Дэвлэ́с и Лэ́скири зор, родэ́н Лэс усады (сак):

⁵рипирэ́н Лэ́скирэ ди́вы, со Ёв кэрдя́, Лэ́скирэ древа́н барэ́ ди́вы и лава́, савэ́нца Ёв сэндякирдя Пэ́скирэ мо́са.

⁶О, тумэ́ сан Аврамоскиро ро́до, Лэ́скирэ-писхарискирэ, тумэ́, Яково́скирэ чхавэ́, савэ́с Ёв выкэдыя́.

⁷Ёв исын Рай Дэвэ́л, амаро́ Дэвэ́л, Ёв сэндякирэ́ла пир сари́ пхув.

⁸Ёв усады (сак) рипирэла Пэ́скиро Зако́но, лава́, савэ́ Ёв припхэндя́ барэнгэ (тысёнцэнгэ) родэ́нгэ,

⁹савэ́ Ёв дыя́ Авраамо́скэ, и пал савэ́ Ёв дыя́ совла́х Исакоскэ,

¹⁰и Ёв чхудя́ зор пэ далэ́ лава́, сыр пэ стату́то Яково́скэ, сыр ве́чно Зако́но Израилёскэ,

¹¹пхэни́: “Мэ да́ва Ханаано́скири пхув ту́кэ, сыр паш тумарэ́ мэкнэ́ миштыпна́стыр”,

¹²ке́ли лэн сыс на́бут, манушэ́н одо́й, древа́н на́бут, и ёнэ сыс чу́жа мануша́ одо́й.

¹³И тумэ́ джа́нас екхэ нацыятыр кэ яви́р, екхэ кралипнастыр кэ яви́р мануша́.

¹⁴Дэвэ́л на дыя́ во́ля никонэ́скэ тэ тасавэл. Дэвэ́л выракирэлас зоралэ́с кралье́н пал лэ́ндэ,

¹⁵ракири́: “На чилавэн Мирэн, Савэ́н Мэ помакхцём. На кэрэ́н чорипэ́н Мирэ́ пророкэнгэ.”

¹⁶И Ёв выкхардя бокх пэ пхув, Ёв хасякирдя́ кажно раслина, со дэ́ла маро́.

¹⁷Ёв бичхадя́ манушэ́с анги́л лэ́ндэ: Ёза (Иосифо) сыс бикиндло сыр писха́ри.

¹⁸Ёнэ дукхадэ Лэ́скирэ ґэра́ зандирьенца, а лэ́скиро ди гия́ дрэ састыра́,

¹⁹анги́л дава́ часо, сыр лэ́скиро лав явдя́: Ра́скирэ-Дэвлэ́скиро лав спробиндя лэс,

²⁰Кра́ли бичхадя́ и вымэкця лэс пэ во́ля, чхудя́ лэс барыдырэ́са пир манушэ́ндэ и мэкця́ лэс пэ во́ля.

²¹Ёв кэрдя́ лэс ра́са пир лэ́скиро кхэр и барыдырэ́са пэ саро́, со сыс лэ́стэ,

²²соб (кай) ёв тэ упхэнэл лэ́скирэ крали́скирэ сэмэнцэнгэ, сыр трэй лэ́скэ, и тэ сыклякирэ́л годыпнаскэ лэ́скирэ пхурэн.

²³Израилё адя́кэ-паць явдя́ дро Еги́пто и Яково адя́кэ-паць притрадыя пэ Хамоскири пхув.

²⁴И Дэвэ́л дыя́ бут чхавэ́н лэ́скирэ манушэ́нгэ, и Ёв кэрдя́ адя́кэ, со ёнэ ячнэ́ зоралэды́р пэ́скирэ вэргэ́ндыр.

²⁵Ёв рискирдя́ Египто́скирэ-манушэ́нгирэ илэ зоралэ́с тэ на дэн паты́в Лэ́скирэ манушэ́нгэ, тэ отлыджанпэ фрэнтымаса Лэ́скирэ дынарье́нца.

²⁶Дэвэ́л бичхадя́ Мойза́с, Пэ́скирэ писхари́с, и Аронос, конэ́с Ёв выкэдыя́,

²⁷ёнэ сыкадэ Лэ́скирэ знаме́нии (ґертыка́) машки́р лэ́ндэ дро Еги́пто, и кэрдэ́ ди́вы пэ Хамоскири пхув.

²⁸Дэвэ́л бичхадя́ калыпэ́н (цямлыпэ́н) и кэрдя́пэ калэс и ёнэ на кэрдэ́ бу́нто проти Лэ́скирэ лава́.

²⁹Ёв пирикэрдя пани́ ратэ́са и хасякирдя́ лэ́нгирэ мачхэн.

³⁰Пхув сыс пхэрды́ цапненца аж дрэ крали́скирэ шту́бы.

³¹Дэвэ́л дыя́ припхэныбэ́н и явнэ́ бут дукханэ матля (насекома) и дзындзарья (комары) пэ сари́ доя́ пхув.

³²Ёв дыя́ градо заме́ст брышы́нд, бичхадя́ яг, со саро́ халас, пэ лэ́нгири пхув.

³³Ёв адя́кэ-паць хасякирдя́ лэ́нгирэ-винаградоскирэ кашта́ и лэ́нгирэ инжыритка кашта́ и роспхарадя вэша́ пэ лэ́нгири пхув.

³⁴Ёв пхэндя́ и явнэ́ пхакитка скочки (саранча) и бут скочкэнгирэ кирморэ, со нашты́ тэ пиригинэн.

³⁵И ёнэ ханэ́ упрэ́ сарэ́ раслины пэ кадая́ пхув и поханэ сарэ́са дова́, со бия́ндыя пэ лэ́нгирэ фэ́лды.

³⁶Дэвэ́л адя́кэ-паць мулякирдя́ сарэ́н пэрвонэ́ биятэ́н, савэ́ бия́ндынэ дро Еги́пто, ра́дыма и зор сэм΄якири.

³⁷Тэ́ньци Ёв лыджия́ лэн криг рупэ́са и сувнака́са, и на сыс нико́н, саво́ тэ явэ́л бизорья́киро машки́р кадалэ́ екхэ́-чиба́кирэ / чанга́ (колены).

³⁸Еги́пто сыс радо, со ёнэ гинэ́, пал-дова́ со пэ лэ́ндэ пыя́ дар Юдэндыр.

³⁹Дэвэ́л росчхудя́ о́блоко тэ гаравэн лэн, и яг тэ явэ́л лоса́са (свэ́то чхонэстыр) лэ́нгэ раты́.

⁴⁰Ёнэ помангнэ и Ёв дыя́ перепёлэн лэ́нгэ и чалякирдя чалэ́с лэн марэ́са болыбна́стыр.

⁴¹Ёв отчхакирдя́ бэ́рга-ска́ла, и паня́ дынэпэ тэ тхадэн, потхадынэ сыр рэка (лэнь) пир шукэ́ штэ́ты.

⁴²Пал-дова́ со Ёв рипирдя лэ́скиро свэ́нто лав, Саво́ Ёв дыя́ Аврамоскэ, Лэ́скирэ дынари́скэ;

⁴³и Ёв вылыджия́ Лэ́скирэ манушэ́н радыма́са, Лэ́скирэ выкэдынэ́ манушэ́н радыма́са;

⁴⁴Ёв дыя́ лэ́нгэ пхувья́ Наюдытконэ́ нацые́ндыр и ёнэ дорэснэ́ сыр мэкно́ миштыпэ́н далэ́ манушэ́нгирэ обкэрдэ фэ́лды:

⁴⁵соб (кай) ёнэ могинэ́нас тэ рикирэнпэ зоралэ́с кэ Лэ́скирэ стату́ты (уставы), и тэ рикирэнпэ кэ Лэ́скирэ зако́ны. Аллилуя Ра́скэ-Дэвлэ́скэ.