Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 107 Bible Online

Псалм 107 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 107

¹[106-р.с.] Парикирэ́н Ра́скэ-Дэвлэ́скэ, пал-дова́ со Ёв исын лачхо́ и Лэ́скири лачхэ́-илы́ткима ячэ́лапэ пэ сарэ́ ве́ки.

²Мэк сарэ́, конэ́с выракхця Рай Дэвэ́л, тэ пхэнэ́н адя́кэ, конэ́с Ёв выракхця вэргоскирэ вастэ́стыр,

³и скэдыя́ кхэтанэ́ Ёв пхувьендыр: чачэ́ рига́тыр (вастоко́стыр) и зэрвонэ́ / пал-панитконэ́ (западо́стыр), паш-ратитконэ́ (севернонэ) рига́тыр и паш-дывэсытконэ́ (южнонэ) рига́тыр.

⁴Ёнэ псирдэ́ пир чхучэ́ прахи (пустыни) пир чхучо́ дром, ёнэ на ракхнэ фо́ро, кай тэ дживэ́н мануша́,

⁵ёнэ сыс бокхалэ́ и трушалэ (жаждындлэ), лэ́нгиро ди замыя́;

⁶ёнэ рондлэ́ годла́са анги́л Растэ-Дэвлэ́стэ дро пхарипэ́н и Ёв выракхця лэн барэ́ дара́тыр,

⁷и Ёв лыджия́ лэн лачхэ́ дромэ́са тэ доджан кэ фо́ро, соб (кай) тэ дживэ́н одо́й.

⁸Мэк сарэ́ тэ парикирэ́н Ра́скэ-Дэвлэ́скэ пал Лэ́скири лачхэ́-илы́ткима и сарэ́ Лэ́скирэ ди́вна бутя́ манушэ́нгирэ чхавэ́нгэ,

⁹пал-дова́ со Ёв дыя́ чалэ́с одолэнгирэ диенгэ, кон сыс трушало (смэгитко) и пхэрдякирдя́ бокхало ди лачхипна́са.

¹⁰Адасавэ́ мануша́ дживдэ́ дро калыпэ́н (цямлыпэ́н) и дрэ мэрибнаскири зэр (тенё), ёнэ сыс пхандлэ и притасадэ,

¹¹пал-дова́ со ёнэ ґаздынэ́ бу́нто проти Дэвлэ́скирэ лава́ и на прилынэ́ кэ годы́ Самонэ (Най) Вучэдырэскирэ-Дэвлэ́скири дума;

¹²и Ёв бандякирдя лэ́нгирэ илэ пхарэ́ бутяса; ёнэ пынэ́ и на сыс нико́н тэ подэл васт:

¹³тэ́ньчи ёнэ дынэ́ го́дла ясвэ́нца кэ Рай Дэвэ́л дрэ пэ́скири бари дар, и Ёв зракхця́ лэн лэ́нгирэ барэ́ дара́тыр,

¹⁴Ёв вылыджия́ лэн калыпна́стыр и мэрибнаскирэ зэрьятыр (тенёстыр) и Ёв пхагирдя́ пэ котэра́ (куски) лэ́нгирэ састыра́,

¹⁵мэк ёнэ тэ парикирэ́н Ра́скэ-Дэвлэ́скэ пал Лэ́скири лачхэ́-илы́ткима, и Лэ́скирэ ди́вы манушэ́нгирэ чхавэ́нгэ,

¹⁶пал-дова́ со Ёв пхагирдя́ харкуны (медно) по́рта и роскусця саструнэ́ шыберы (запоры).

¹⁷Дылынэ́ манушэ́н притасавэнас пал лэ́нгирэ грэ́хи и пал лэ́нгиро чорипэ́н;

¹⁸лэ́нгиро ило́ отрискирдяпэ кажнонэ́ хабнастыр, и ёнэ джа́нас пашы́л кэ по́рта мэрибнаскири:

¹⁹тэ́ньчи ёнэ дынэ́ го́дла ясвэ́нца кэ Рай Дэвэ́л, ке́ли сыс пхаро́ лэ́нгэ, и Ёв зракхця́ лэн барэ́ дара́тыр.

²⁰Ёв бичхадя́ Пэ́скиро лав и высастякирдя́ лэн и выракхця лэн лэ́нгирэ хасибнастыр.

²¹Мэк ёнэ тэ парикирэ́н Ра́скэ-Дэвлэ́скэ пал Лэ́скири лачхэ́-илы́ткима и пал Лэ́скирэ ди́вна бутя́ манушэ́нгирэ чхавэ́нгэ.

²²И мэк ёнэ тэ парикирэ́н Ра́скэ-Дэвлэ́скэ свэнтонэ́ дыибнаса тэ парикирэ́н, и мэк ёнэ тэ роспхэнэ́н сарэ́нгэ пал Лэ́скирэ бутя́ радымакирэ гиляса.

²³Одолэ́, савэ́ плывинэнас (дэ́нас пли́ма) пир мо́ри (дэрьява́) пэ па́рмы, ци савэ́ кэрэ́на ко́фо (польза) пир барэ́ паня́,

²⁴ёнэ дыкхэ́на Ра́скирэ-Дэв-лэ́скирэ бутя́ и Лэ́скирэ ди́вна рэ́нды пэ хор штэ́ты.

²⁵Пал-дова́ со Ёв пхэнэ́ла и ґаздэ́лапэ штормитко балва́л, сави́ вучэ́с ґаздэ́ла морёскирэ (дэрьявэ́скирэ) валны:

²⁶па́рмы (корабли) манушэ́нца джа́на упрэ́ кэ болыбэ́н, тэ́ньчи ёнэ пэрэ́на тэлэ́ кэ хор штэ́ты; а манушэ́ндэ, со одо́й бэштэ́, ди биладёла барэ́ дара́тыр;

²⁷ёнэ крэнжынэна одори́к и палэ и ёнэ кунинэ́наспэ (шатынэнапэ) сыр матэ, а лэ́нгиро годыпэ́н нисо́ на мол:

²⁸тэ́ньчи ёнэ дэ́на го́дла ясвэ́нца Ра́скэ-Дэвлэ́скэ, ке́ли сыс пхаро́ лэ́нгэ и Ёв зракхэ́ла лэн лэ́нгирэ пхарипнастыр;

²⁹Ёв штылякирэла штормо адя́кэ, со лэ́нгирэ валны (вэлны) ячэ́на штыл (тиха),

³⁰и ёнэ исын ра́да, пал-дова́ со паня́ ячэ́на штыл и Ёв вылыджала лэн кэ приячытко (пристань), кэ со ёнэ тырдынэпэ.

³¹Мэк адалэ́ мануша́ тэ парикирэ́н Ра́скэ-Дэвлэ́скэ пал Лэ́скири лачхэ́-илы́ткима и Лэ́скирэ ди́вна бутя́ ваш манушэ́нгирэ чхавэ́нгэ;

³²мэк ёнэ тэ барьякирэ́н кэ вучыпэн Лэс адя́кэ-паць пэ манушэ́нгиро скэдыибэ́н и тэ шарэ́н Лэс пэ годэпхурэнгиро ракирибэ́н.

³³Рай Дэвэ́л пирикэрэла рэ́ки (лэня́) пэ чхучэ́ прахи и панескирэ ґанынгорья пэ шуки́ пхув:

³⁴умалотна пхувья́ пэ лондо шуко штэ́то — пал долэ́ манушэ́нгиро фуипэ́н, кон дживэ́ла одо́й.

³⁵Ёв пирискирэла шукэ́ пхувья́ дрэ зеро (озеро) и шуки́ пхув дрэ панескири ґанынгори (крыница).

³⁶Ёв чхувэ́ла бокхалэн тэ дживэ́н одо́й, соб (кай) ёнэ могиндлэ́ тэ ґаздэ́н фо́ро тэ дживэ́н,

³⁷и соб (кай) ёнэ тэ почхувэн зя́рки дрэ фэ́лды и тэ чхувэ́н винаграды́тка унты (сады), соб (кай) ёнэ тэ дэн умалотно прибарипэн (аплодо).

³⁸Ёв адя́кэ-паць бахтякирдя́ лэн, соб (кай) ёнэ тэ розбарьён зоралэ́с, и Ёв на домэкэла, соб (кай) тэ явэ́л тыкнэды́р мурдалэ́н лэ́ндэ.

³⁹Нэ ке́ли лэн яця́ тыкнэды́р, и ёнэ ячнэ́ штыл (тиха) — лэн тэлякирэнас, притасавэнас и калякирэнас,

⁴⁰тэды Рай Дэвэ́л чхудя́ ладж пэ барэ́ рандэ Наюдытконэ́ нацые́ндыр и кэрдя́ адя́кэ, со ёнэ гинэ́ тэ псирэ́н одори́к, палэ пэ чхучи́ пхув, кай нанэ дром.

⁴¹Нэ Ёв ґаздыя́ чорорэ́ манушэ́н притасаибнастыр и зачхудя Лэ́нгирэ сэм΄и (ирья́) тэ явэ́н сыр гурты.

⁴²Патяибнаскирэ дыкхэ́на дава́ и радынэ́напэ, а сарэ́ чорэ́ мануша́ пхандэна пэ́скирэ муя́.

⁴³Кон исын годо́, мэк ёв тэ рикирэлпэ кэ саро́ дава́, мэк ёв тэ ґалёл Ра́скирэ-Дэвлэ́скири лачхэ́-илы́ткима.