Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 118 Bible Online

Псалм 118 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 118

¹[117-р.с.] Парикирэ́н Ра́скэ-Дэвлэ́скэ, пал-дова́ со ёв исын лачхо́! Пал-дова́ со Лэ́скири ла́ска явэ́ла пэ сарэ́ ве́ки.

²Мэк Израилёскиро кхэр тэ пхэнэ́л акана́: “Лэ́скири ла́ска ячэ́лапэ пэ сарэ́ ве́ки.”

³Мэк Ароноскиро кхэр тэ пхэнэ́л какана́, со Лэ́скири лачхэ́-илы́ткима ячэ́лапэ пэ сарэ́ ве́ки.

⁴Мэк одолэ́, савэ́ дарэ́на Ра́стыр-Дэвлэ́стыр тэ пхэнэ́н какана́, со Лэ́скири лачхэ́-илы́ткима ячэ́лапэ пэ сарэ́ ве́ки.

⁵Мэ кхардём Рас-Дэвлэ́с барэ́ дара́тыр (дарьятыр), Ёв отпхэндя́ ма́нгэ и вылыджия́ пэ баро́ штэ́то.

⁶Рай Дэвэ́л исын пал ма́ндэ, Мэ на ява́ва тэ дарав, со ману́ш могинэ́ла тэ кэрэ́л ма́нгэ.

⁷Рай Дэвэ́л исын пал ма́ндэ машки́р одолэ́ндэ, савэ́ дэ́на васт ма́нгэ: мэ дыкха́ва, сыр пэрэ́на одолэ́, савэ́ бидыкхэна.

⁸Дава́ исын фэды́р тэ ґарадёс тэ зракхэспэ пал Растэ-Дэвлэ́стэ, сыр тэ ґарадёс тэ зракхэспэ пал манушэ́стэ.

⁹Дава́ исын фэды́р тэ ґарадёс тэ зракхэспэ кэ Рай Дэвэ́л, сыр тэ рисёс тэ зракхэспэ кэ тхага́рья.

¹⁰Сарэ́ Наюды́тка на́цыи обгинэ трусця́л ма́ндэ, нэ мэ хасякира́ва лэн Ра́скирэ-Дэвлэ́скирэ лавэ́са.

¹¹Ёнэ обгинэ трусця́л ма́ндэ, чачо́, обгинэ трусця́л ма́ндэ; нэ мэ хасякира́ва лэн Ра́скирэ-Дэвлэ́скирэ лавэ́са.

¹²Ёнэ обгинэ трусця́л ма́ндэ сыр бырлиня (пчолы), и ёнэ мурдинэ сыр яг дрэ хру́сты сувьенца; нэ мэ хасякира́ва лэн Ра́скирэ-Дэвлэ́скирэ лавэ́са.

¹³Ёнэ шпулдэ (толкиндлэ) ман и пэкадэ тэ пэрав; нэ Рай Дэвэ́л дыя́ васт ма́нгэ.

¹⁴Рай Дэвэ́л исын миро зоралыпэ́н и мири́ гилы́ радыма́са и Ёв зракхця́ ман.

¹⁵Шунэ́н заня́ радыма́са пал зракхибэ́н дрэ ша́тры, кай исын Дэвлэ́скирэ мануша́.

¹⁶Чачо́ васт Ра́скирэ-Дэвлэ́скиро ґаздыно́, чачо́ васт Ра́скирэ-Дэвлэ́скиро пиризорьякирэла.

¹⁷Мэ на мэра́ва, нэ мэ ява́ва тэ джива́в и тэ роспхэнав пал Ра́скирэ-Дэвлэ́скирэ бутя́.

¹⁸Рай Дэвэ́л пхарэ́с сыклякирдя́ ман, нэ Ёв на дыя́ ман мэрибна́скэ.

¹⁹Отпхандэн (псиравэ́н) ма́нгэ по́рта, кай заджа́на чачипнаскирэ, мэ джа́ва андрэ́, и мэ ява́ва тэ шара́в зоралэ́с и тэ парикира́в Ра́скэ-Дэвлэ́скэ.

²⁰Дава́ исын по́рта кэ Рай Дэвэ́л: чачипнаскирэ заджа́на пир ла́тэ.

²¹Мэ ява́ва тэ парикира́в Ту́кэ, пал-дова́ со Ту отпхэндян ма́нгэ и Ту зракхця́н ман.

²²Бар, Саво́ на прилынэ́ бутярнэ́, яця́ шэралэ́ барэса ваш кэрибэн кхэри́тко:

²³дава́ яця́ Дэвлэ́стыр, дава́ исын дивно дрэ амарэ́ якха́.

²⁴Дава́ исын дывэ́с, дро саво́ Рай Дэвэ́л адя́кэ кэрдя́, амэ ява́са тэ радынаспэ и амэ ява́са бахталэ́.

²⁵Зра́кх ман, Раё Дэ́вла, мэ зоралэ́с манга́ва Тут! Раё Дэ́вла, мэ зоралэ́с манга́ва Тут, бахталякир амаро́ джиибэ́н.

²⁶Бахтало́ исын одова́, саво́ явэ́ла Ра́скирэ-Дэвлэ́скирэ лавэ́стыр. Амэ бахтякирдям тумэн Ра́скирэ-Дэвлэ́скирэ Кхангирья́тыр.

²⁷Рай Дэвэ́л исын амаро́ Дэвэ́л и Ёв дыя́ дуд амэ́нгэ: пхандэн свэ́нта дыибэна́ шэлэнца кэ алтарёскирэ шынга́ (ро́ги).

²⁸Ту сан миро Дэвэ́л и мэ ява́ва тэ шара́в кэ вучипэ́н Тут, Миро Дэ́вла! Мэ ява́ва тэ парикира́в Ту́кэ.

²⁹Парикирэ́н Ра́скэ-Дэвлэ́скэ, пал-дова́ со Ёв исын лачхо́: пал-дова́ со Лэ́скири лачхэ́-илы́ткима ячэ́лапэ пэ сарэ́ ве́ки.