Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 127 Bible Online

Псалм 127 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 127

¹[126-р.с.] Гилы́ анги́л Кхангири́. Соломоно́скири. Ко́ли Рай Дэвэ́л тэ на ґаздэл Кокоро́ Кхэр, ивья́ (напра́снэс) тэды кэрэ́нас буты́ одолэ́, савэ́ чхувэ́на лэс; ко́ли Рай Дэвэ́л тэ на ракхэлас фо́ро, тэды стрэгари (охранико), саво́ ракхэ́ла, ивья́ кэрэ́лас дава́.

²Дава́ тэ явэ́л ивья́ рэ́ндо ваш ту́кэ, со ту уштэса тася́рлэс (ра́нэс), со ту сан бэшто́ кэ коригипэ́н (кэ по́зныма), со ту хаса маро́ палэ пхарэ́ бутя́тыр. Рай Дэвэ́л дэ́ла хабэ́н кодолэ́скэ, савэ́с Ёв камэ́ла, дрэ сунэ́.

³Акэ, чхавэ́ исын сыр мэкно́ миштыпэ́н Ра́стыр-Дэвлэ́стыр; ёнэ исын бахталыпэ́н да́кирэ лочовя́тыр.

⁴Сыр марибны́тка бустя́ (стре́лы) дро халадэскиро васт, адя́кэ-паць исын чхавэ́ тэрнэ́ дадэ́скирэ.

⁵Бахтало́ исын ману́ш, савэ́стэ исын бут дасавэ́ бустя́ дро колчано. Ёнэ на явэ́на ладжакирдэ́, ке́ли ёнэ явэ́на тэ хаспэ намалэнца пашы́л по́рта, кай сэнды джа́на.