Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 136 Bible Online

Псалм 136 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 136

¹[135-р.с.] Парикирэ́н Ра́скэ-Дэвлэ́скэ, пал-дова́ со Ёв исын лачхо́, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки;

²парикирэ́н Дэвлэ́скэ, Саво́ исын Са́мо (Най) Вучэды́р пэ сарэ́ дэвлорэндэ; пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки.

³Парикирэ́н Ра́скэ-Дэвлэ́скэ, Саво́ исын Барэды́р сарэ́ рандыр, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки,

⁴Лэ́скэ, Саво́ Кокоро́ кэрэ́ла барэ́ ди́вы, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки:

⁵Лэ́скэ, Кон создыя́ годыпнаса болыбэ́н, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки;

⁶Лэ́скэ, Кон росчхудя́ пхув упра́л панендыр, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки;

⁷Лэ́скэ, Кон кэрдя́ барэ́ дуда (светилы), пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки; —

⁸кхам, соб (кай) тэ рикирэ́н зор пэ пхув дывэсэ́, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки,

⁹чхон и чэргэня́, соб (кай) тэ рикирэ́н зор пэ пхув раты́, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки:

¹⁰Лэ́скэ, Кон мулякирдя́ сарэ́ пэрвонэ́ бияндлэ биятэ́н Египто́стыр, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки,

¹¹и Саво́ вылыджия́ Израилё машки́р лэ́ндэ, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки,

¹²зоралэ́ вастэ́са и ґаздынэ́ псикэса, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки.

¹³Лэ́скэ, Кон роскэрдя́ пэ паша́ Лоло́ мо́рё (дэрья́в), пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки,

¹⁴Кон кэрдя́ адя́кэ, со Израилё прогия́ (накхья) машкира́л дава́ штэ́то, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки,

¹⁵нэ пиририскирдя Фараонос и лэ́скиро халадыбэ́н дро Лоло́ мо́рё (дэрья́в), пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки;

¹⁶Лэ́скэ, Кон лыджия́ анги́л пэ́скирэ манушэ́н пир чхучэ́ прахи, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки;

¹⁷Лэ́скэ, Кон мулякирдя́ барэ́ кралье́н, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки;

¹⁸и замардя́ славутнонэ кралье́н, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки;

¹⁹Сигонос, Аморее́нгирэ Крали́с, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки;

²⁰и Огос Васаноскирэ крали́с, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки,

²¹Ёв дыя́ лэ́нгири пхув сыр мэкно́ миштыпэ́н, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки,

²²мэкно́ миштыпэ́н Израилёскэ, Лэ́скирэ писхари́скэ, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки;

²³Ёв рипирдя амэн сыр амэ са́мас пэ тэлатуно штэ́то, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки;

²⁴и Ёв выракхця амэн амарэ́ вэргэ́ндыр, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки:

²⁵Кон дэ́ла хабэ́н кажнонэ́ лочакэ (плотякэ), пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки.

²⁶Парикирэ́н болыбна́скирэ Дэвлэ́скэ, пал-дова́ со Лэ́скиро дро́го лачхипэ́н ячэ́лапэ пэ сарэ́ ве́ки.