Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 148 Bible Online

Псалм 148 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 148

¹Аллилуя! Шарэ́н Рас-Дэвлэ́с болыбна́стыр; шарэ́н Лэс, Кон дживэ́ла упра́л.

²Мэк тэ шарэ́н Лэс сарэ́ Лэ́скирэ Янго́лы, мэк тэ шарэ́н Лэс сарэ́ болыбна́скирэ Янго́лы.

³Шарэ́н Лэс, кхам и чхон, мэк тэ шарэ́н Лэс сарэ́ чэргэня́, со хачона.

⁴Шарэ́н Лэс, най вучэды́р болыбэ́н и паня́, со исын упра́л (упрэ́) болыбна́стыр.

⁵Мэк ёнэ тэ шарэ́н Ра́скирэ-Дэвлэ́скиро лав, пал-дова́ со Ёв припхэндя́ и ёнэ кэрдэ́пэ:

⁶И Ёв дыя́ зор лэ́нгэ ўса́ды (сак) и пэ сарэ́ ве́ки; Ёв дыя́ припхэныбнытко стату́то, со ёнэ на обджана лэс.

⁷Мэк тэ шарэ́н Рас-Дэвлэ́с пхувья́тыр: морёскирэ (дэрьявэ́скирэ) ру́пучы и сарэ́ хор штэ́ты;

⁸яг и ґрадо, ив и тхув, зоралы́ балва́л, савэ́ кэрэ́на пир лэ́скиро лав;

⁹бэ́рги и сарэ́ бэ́ргицы, пхабакирэ кашта́ (дрэвы) и сарэ́ кедры;

¹⁰рискирибна́скирэ мурдала́ (звери) и сарэ́ кхэри́тка мурдала́, цапня́ и чириклэ́/я́ пхакэ́нца (крылэнца);

¹¹кра́лья пэ пхув и сарэ́ мануша́, тхага́рья и сарэ́ сэнда́рья пэ пхув.

¹²Тырнэ мануша́ и адя́кэ-паць патывалэ́ тэрнэ́ джувля́, пхурэ́ мануша́ тэрнэнца,

¹³мэк ёнэ тэ шарэ́н Ра́скирэ-Дэвлэ́скиро лав; пал-дова́ со екх Лэ́скиро лав трэй тэ шарэ́н кэ вучипэ́н; Лэ́скири сла́ва исын вучэды́р пхувья́тыр и болыбна́стыр.

¹⁴И Ёв ґаздыя́ Лэ́скирэ-манушэ́нгиро дэсто́, Саво́ дэ́ла зор, соб (кай) тэ шарэ́н Лэс Лэ́скирэ свэ́нта Израилёскирэ чхавэ́, савэ́ исын пашылэды́р кэ Ёв. Аллилуя.