Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 25 Bible Online

Псалм 25 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 25

¹[24-р.с.] Давидо́скиро Пса́лмо. Ту́кэ, Раё Дэ́вла, мэ клонинавапэ патыва́са.

²О миро Дэ́вла! Мэ патя́ва дрэ Ту́тэ; на домэк, соб (кай) тэ явэ́л ладжаво ма́нгэ, соб (кай) мирэ́ вэ́рги (вроги) тэ на лэн вучипэ́н пэ ма́ндэ!

³Тэ на явэ́н адя́кэ-паць ладжакирдэ́ одолэ́, савэ́ рикирэ́на наде́я пэ Ту́тэ. Нэ тэ явэ́н ладжакирдэ́ одолэ́, савэ́ бунтуинэна би причынакиро.

⁴Раё Дэ́вла, сыка́в ма́нгэ Тыро́ дром, сыкля́кир ман Тырэ́ чачипнаскэ.

⁵Лы́джа ман тэ кэра́в пир Тыро́ чачипэ́н, сыкля́кир ман, пал-дова́ со Ту сан Дэвэ́л, Саво́ зракхэ́ла; пэ Ту́тэ исын наде́я со дывэ́с ма́ндэ.

⁶Пририпир, Раё Дэ́вла, Пэ́скиро тангипэ́н и лачхэ́-илы́ткима, пал-дова́ со ёнэ джа́на векэнца.

⁷На пририпир, сыр мэ тэрно́ пхагирдём Дэвлэ́скиро Зако́но и кэрдём грэ́хи, пал-дова́ со Ту сан лачхо́ кэ мануша́, пририпир пал ма́ндэ, Раё Дэ́вла, Тырэ́ лачхэ́-илыткиматыр.

⁸Рай Дэвэ́л исын лачхо́ и чачипна́скиро; палдава́ Ёв явэ́ла тэ сыклякирэ́н грэхитконэ́ манушэ́н тэ джа́н чачунэ́ дромэ́са:

⁹Ёв лыджа́ла кэ чачипэ́н одолэ́н, савэ́ ха́на мэ́ньки, Ёв сыклякирэ́ла лэн тэ джа́н чачунэ́ дромэ́са:

¹⁰Рай Дэвэ́л лыджа́ла пэ́скирэ дромэ́са одолэ́н, савэ́ приракхэна Лэ́скиро Зако́но и припхэныбэна́, лачхэ́-илыткимаса и чачипна́са.

¹¹Ваш Тыро́ лав, Раё Дэ́вла, отмэк мири́ банг, пал-дова́ со ёй исын древа́н бари.

¹²Саво́ исын ману́ш, кон дарэ́ла Ра́стыр-Дэвлэ́стыр! Лэ́стыр ёв высыклёла дром, со лэ́скэ трэй тэ выкэдэл.

¹³Лэ́скиро ди ячэ́лапэ бахтало́, а Лэ́скирэ чхавэ́нгэ явэ́ла пхув сыр мэкно́ миштыпэ́н.

¹⁴Рай Дэвэ́л Пэ́скири сыкавэ́ла гарады ла́ска одолэ́нгэ, савэ́ дарэ́на Лэ́стыр. Ёв сыклякирэ́ла лэн пал Пэ́скиро Зако́но.

¹⁵Мэ кажно мо́ло дыкха́ва пэ Растэ-Дэвлэ́стэ, пал-дова́ со Ёв вытэрдэла мирэ́ ґэра́ фэлятыр.

¹⁶Подыкх пэ ма́ндэ и та́нгинэ (пожалин) ман, пал-дова́ со мэ сом екхджино́ и хава мэ́ньки.

¹⁷Пхарипэ́н пэ ило́ яця́ бутэды́р: вылы́джа ман мирэ́ барэ́ дара́тыр.

¹⁸Подыкх, сыр мэ хава мэ́ньки и пэ мирэ́ дукха́, и отмэк сарэ́ мирэ́ грэ́хи!

¹⁹Подыкх, сыр бут исын вэ́рги пашы́л ма́ндэ, сыр ёнэ бидыкхэна ман калэ́ илэ́са.

²⁰Приракх миро ди и зра́кх ман, соб (кай) мэ тэ на явав ладжакирдо́, пал-дова́ со мэ гарадёвава пал Ту́тэ.

²¹Мэк миро лачхипэ́н и чачипэ́н тэ приракхэн ман, пал-дова́ со ма́ндэ исын наде́я пэ ту́тэ.

²²Зра́кх, Дэ́вла, Израилё сарэ́ лэ́скирэ пхарипнэндыр.