Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 28 Bible Online

Псалм 28 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 28

¹[27-р.с.] Давидо́скиро Пса́лмо. Мэ да́ва го́дла кэ Ту, о Раё Дэ́вла, мири́ Бэ́рга, на яв штыл пэ миро кхарибэн. Ко́ли Ту на отпхэнэса ма́нгэ, мэ ява́ва сыр кодолэ́, савэ́ джа́на тэлэ́ дрэ маґила (кула).

²Шун вракхунэс мири́ зан, ке́ли мэ мангавапэ Ту́кэ, сыр мэ да́ва го́дла кэ Ту, ке́ли мэ ґазда́ва васта́ кэ Тыро́ Свэ́нто Штэ́то.

³На хасякир ман кхэтанэ́ фуе́ манушэ́нца, ци савэ́ кэрэ́на чорипэ́н; ци савэ́ пэ якха́ ракирэ́на пал рама́нё пашатунэ́ манушэ́нца, нэ савэ́ндэ исын чорипэ́н дро ило́.

⁴Отдэ́ палэ лэ́нгэ пир лэ́нгирэ рэ́нды и пир чорипэ́н, саво́ ёнэ кэрдэ́; пир дова́, со лэ́нгирэ васта́ кэрдэ́, отплэскир палэ лэ́нгэ пал лэ́нгирэ рэ́нды.

⁵Пал-дова́ со ёнэ на дынэ́ паты́в Ра́скирэ-Дэвлэ́скирэ бутенгэ и одолэ́скэ, со кэрдэ́ Лэ́скирэ васта́, Ёв хасякирэ́ла лэн и буты́р на дэ́ла зор лэ́нгэ.

⁶Тэ явэ́л бахтякирдо́ Рай Дэвэ́л, пал-дова́ со Ёв шундя́ мири́ зан, ке́ли мэ мангдёмпэ Лэ́скэ.

⁷Рай Дэвэ́л исын миро зоралыпэ́н и миро шчы́то; миро ило́ патяндыя дрэ Лэ́стэ и Ёв дыя́ васт ма́нгэ — пал-дова́ миро ило́ обрадындяпэ зоралэ́с и мэ ява́ва тэ парикира́в Лэ́скэ мирэ́ гиляса.

⁸Рай Дэвэ́л приракхэла зоралыпнаса Пэ́скирэ манушэ́н, и Ёв зракхэ́ла Пэ́скирэ Помакхнэс.

⁹Зра́кх Пэ́скирэ манушэ́н и бахтякир Тыро́ мэкно́ миштыпэ́н, чарав лэн и лы́джа лэн пэ сарэ́ ве́ки.