Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 31 Bible Online

Псалм 31 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 31

¹[30-р.с.] Хоро́скирэ Дирижоро́скэ. Давидо́скиро Пса́лмо.

²Дрэ Ту́тэ, О Раё Дэ́вла, мэ родава гарадыипэн, мэк мэ ние́кхвар тэ на явав ладжакирдо́: зра́кх ман пир Тыро́ чачипэ́н.

³Бандёв и шун ракхунэс ман: зра́кх ман сы́гэс. Приракх ман сы́рбы дро зоралы́ ска́ла, зра́кх ман сы́рбы дрэ баруны тва́рдыма (диз).

⁴Пал-дова́ со Ту сан ваш ма́нгэ сыр мири́ ска́ла и мири́ баруны тва́рдыма (диз). Лы́джа ман и сыка́в дром ма́нгэ ваш Тыро́ лав.

⁵Выты́рдэ ман фэля́тыр (петля́тыр), со ёнэ чораханэ́с чхудэ́ пэ ма́ндэ, пал-дова́ со Ту сан миро зоралыпэ́н тэ приракхэс ман.

⁶Дрэ Тырэ́ васта́ мэ отда́ва пэ́скиро ду́хо (фа́но): Ту выкиндян (зракхця́н), Раё Дэ́вла, Ту сан чачипна́скиро Дэвэ́л.

⁷Мэ бидыкхава одолэ́н, савэ́ кутякирэна харты́тка (пуста) и́долы; а мэ ж зоралэ́с патя́ва дрэ Растэ-Дэвлэ́стэ.

⁸Мэ ява́ва лошало (весёло) и ява́ва тэ радынавпэ Тырэ́ лачхэ́-илыткиматыр; со Ту придыкхцянпэ, сыр мэ хава мэ́ньки, со Ту уджиндян, со́стыр миро ди страхандёла,

⁹Ту на запхандян ман дрэ мирэ́-вэргэ́нгирэ васта́: Ту вылыджиян ман пэ буґло́ штэ́то.

¹⁰Та́нгинэ (пожа́лин) ман, о Раё Дэ́вла, пал-дова́ со мэ страхадёвава. Мирэ́ якха́ вышутинэ калыпна́стыр, миро ди и мирэ́ маса́.

¹¹Миро джиибэ́н кончынэлапэ калыпнаса, и мирэ́ бэрша́ ґонденца, мири́ зор хасия́ мирэ́ чорипна́стыр и мирэ́ кокалы́ хасинэ́.

¹²Сарэ́ мирэ́ намала (не́други) обракирэна ман, со аж мирэ́ пашатунэ́ мануша́, мэ сом даракуно одолэ́нгэ, савэ́ джинэ́на ман: кон дыкхэ́ла ман пэ вули́ца (пэ га́са), одова́ нашэла ма́ндыр.

¹³Кажно ману́ш бистырдя дро ило́ ман сы́рбы мэ сом муло́; мэ сом сы́рбы пхагирды пири́.

¹⁴Мэ шундём, сыр бут мануша́ бангякирэнас хоханэ́с ман; трашаибэ́н исын трусця́л, пал-дова́ со вэ́рги зракирэнаспэ кхэтанэ́ пэ ма́ндэ; ёнэ мэркинэнас тэ замарэ́н ман.

¹⁵Нэ мэ зоралэ́с патя́ва дрэ Ту́тэ, о Раё Дэ́вла. Мэ пхэндём: “Ту сан миро Дэвэ́л.”

¹⁶Мирэ́ дывэса́ исын дрэ Тыро́ васт: зра́кх ман мирэ́-вэргэ́нгирэ вастэ́ндыр и одолэ́н, савэ́ традэ́на ман.

¹⁷Мэк Тырэ́-москиро дуд зяинэла пэ Тырэ́ писхаристэ; зра́кх ман пир Тыри́ лачхэ́-илы́ткима,

¹⁸Мэк мэ тэ на явав ладжакирдо́, о Раё Дэ́вла; пал-дова́ со мэ кхара́ва Тут; мэк фуй мануша́ тэ явэ́н ладжакирдэ́, мэк ёнэ тэ явэ́н штыл дрэ маґила.

¹⁹Мэк хоханэ́ ушта́ тэ цыцён, ке́ли ёнэ ракирэ́на нахратэс (нахальнэс) пэ чачунэстэ, пхутькирибныткэс и бипатыва́кирэс.

²⁰Кицы́ бут исын Ту́тэ лачхипэна, савэ́ Ту чхудя́н дрэ риг ваш одолэ́нгэ, конэ́стэ исын трашаибэ́н анги́л Ту́тэ; со Ту скэдыян лэн ваш одолэ́нгэ, савэ́ зоралэ́с патя́на дрэ Ту́тэ анги́л сарэ́ манушытконэ́ чхавэ́ндэ.

²¹Ту гаравэса лэн дро чорахано штэ́то, кай Ту Кокоро́ сан, манушэ́ндыр, савэ́ зракирэнапэ пэ лэ́ндэ. Ту ракхэса лэн дрэ Пэ́скири гарады ша́тра кошыбнытконэ чибэндыр.

²²Тэ явэ́л бахтякирдо́ Рай Дэвэ́л, Саво́ сыкадя́ Пэ́скири дивно лачхэ́-илы́ткима дро фо́ро, саво со халадэ́ облынэ трусця́л!

²³Мэ пхэндём дро пэ́скиро конфузо: “Мэ сом чхурдыно́ криг Тырэ́ якхэ́ндыр.” Нэ Ту шундя́н мири́ зан, сыр мэ мангдёмпэ Ту́кэ; ке́ли мэ кхардём Тут тэ помогинэс.

²⁴Рикирэ́н сыр Дро́гима Рас-Дэвлэ́с дро пэ́скиро ило́, сарэ́ лэ́скирэ мануша́, Рай Дэвэ́л ракхэ́ла патяибнаскирэн и пхэрдэ́с сэндякирэ́ла пхутькирдэн.

²⁵[р.с.] Явэ́н муршканэ́, и Ёв зорьякирэла тумарэ́ илэ — сарэ́нгэ тумэ́нгэ, конэ́стэ исын наде́я пэ Растэ-Дэвлэ́стэ.