Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 33 Bible Online

Псалм 33 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 33

¹[32-р.с.] Тумэ́, сарэ́ чачипнаскирэ, радынэ́нпэ и бага́н Ра́скэ-Дэвлэ́скэ; дава́ исын мишто́, соб (кай) чачипнаскирэ тэ шарэ́н Лэс.

²Башавэн Ра́скэ-Дэвлэ́скэ пэ гусли тэ парикирэ́н Лэ́скэ; бага́н Лэ́скэ пэ дэшэ́-балытко арфа.

³Бага́н Лэ́скэ нэви́ гилы́; башавэ́н ра́нгирэс и лошалён (радынэ́нпэ) зоралэ́с.

⁴Пал-дова́ со Ра́скирэ-Дэвлэ́скиро лав исын чачуно́, и Ёв кэрэ́ла саро́ пир чачипэ́н.

⁵Ёв радынэ́лапэ чачипнастыр и сэндостыр: Ра́скирэ-Дэвлэ́скирэ чачипна́са исын пхэрды́ пхув.

⁶Болыбэ́н сыс создыно́ Ра́скирэ-Дэвлэ́скирэ лавэ́стыр, болыбна́скиро свэ́то сыс создыно́ пхурдыпнаса Лэ́скирэ мо́стыр.

⁷Ёв скэдэ́ла морьенгирэ паня́ дро екх штэ́то, Ёв чхувэ́ла паненгиро хорипэ́н сы́рбы дрэ кхэлтра (погребо).

⁸Мэк сари́ пхув тэ страхадёл Ра́стыр-Дэвлэ́стыр; мэк сарэ́ джиибна́скирэ пэ пхув тэ издран анги́л Лэ́стэ.

⁹Ке́ли Ёв пхэндя́, и саро́ кэрдя́пэ; ёв дыя́ припхэныбэ́н и саро́ яця́.

¹⁰Рай Дэвэ́л на дэ́ла во́ля Наюдытконэ́ нацыенгэ тэ кэрэ́н, со ёнэ задуминэна пэ́скэ: Ёв на домэкэла манушэ́н тэ кэрэ́н пир пэ́скирэ планы.

¹¹Дэвлэ́скирэ ду́мы ячэ́напэ пэ сарэ́ ве́ки, лэ́скиро задумибэн сарэ́ родэ́нгэ.

¹²Бахталы́ исын нацыя, конэ́скиро Дэвэ́л исын Рай Дэвэ́л; бахталэ́ исын мануша́, савэ́н Ёв выкэдыя́ сыр Пэ́скирэ чхавэ́н.

¹³Рай Дэвэ́л роздыкхэла болыбна́стыр: Ёв дыкхэ́ла сарэ́ манушытконэ́ чхавэ́н.

¹⁴Ёв дыкхэ́ла пэ сарэ́ джиибнаскирэндэ пэ пхув Лэ́скирэ штэто́стыр.

¹⁵Ёв чхувэ́ла годы́ и во́ля дро лэ́нгиро ило́, Ёв дыкхэ́ла саро́, со ёнэ кэрэ́на.

¹⁶Ние́кх кра́ли на лэ́ла упралыпэ́н, ко́ли лэ́стэ исын бут халадэ́, ние́кх зорало́ ману́ш на лэ́ла упралыпэ́н, ко́ли лэ́стэ исын бари зор,

¹⁷Грай исын харты́тко (напро́чно) наде́я тэ явэс бидаракиро; лэ́скиро баро́ зоралыпэ́н на могинэ́ла тэ зракхэ́л.

¹⁸Чачэс, Ра́скирэ-Дэвлэ́скири якх исын пэ одолэ́ндэ, савэ́ндэ исын трашаибэ́н анги́л Лэ́стэ и пэ одолэ́ндэ, конэ́стэ исын наде́я пэ Лэ́скири лачхэ́-илы́ткима,

¹⁹со Рай Дэвэ́л зракхэ́ла Лэ́нгиро ди мэрибна́стыр и Ёв явэ́ла тэ ракхэ́л лэн джидэнца, сыр явэ́ла бокх.

²⁰Амаро́ ди рикирэ́ла наде́я пэ Растэ-Дэвлэ́стэ; Ёв дэ́ла васт амэ́нгэ и Ёв исын амаро́ шчы́то.

²¹Амаро́ ило́ явэ́ла тэ радынэ́лпэ Лэ́стыр, пал-дова́ со амэ зоралэ́с патя́са дро лэ́скиро свэ́нто лав.

²²Мэк тэ явэ́л Тыри́ лачхэ́-илы́ткима пэ амэ́ндэ, о Раё Дэ́вла, со амэ ужакираса лачхипэ́н Ту́тыр.