Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 38 Bible Online

Псалм 38 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 38

¹[37-р.с.] Давидо́скиро Пса́лмо. Манушэ́нгэ тэ рипирэ́н.

²О, Раё Дэ́вла, на бангякир ман дрэ Пэ́скири холы́, на сыкля́кир ман холякирибнаса.

³Пал-дова́ со Тырэ́ марибны́тка бустя́ (стре́лы) промардэ ман и Тыро́ васт тасавэла пхарэ́с пэ ма́ндэ.

⁴Нанэ лачхо́ штэ́то дро мирэ́ маса́ пал Тыри́ холы́, нанэ састэ кокалы́ ма́ндэ пал миро грэ́хо.

⁵Пал-дова́ со миро чорипэ́н бария вучэды́р мирэ́ шэрэстыр; ёв исын сыр пхаро́ ґа́мо, со тасавэла зоралэ́с пэ ма́ндэ.

⁶Пал миро дылныпэ́н мирэ́ фра́нсы (раны) кхандэна и кирнёна.

⁷Ма́нгэ исын пхаро́, мэ сом бандькирдо вучэды́р мератыр, Мэ псирава и ровава саро́ дывэ́с.

⁸Мирэ́ трушула (паясница) дукхана яга́са, нанэ састо́ штэ́то дрэ мирэ́ маса́.

⁹Мэ нашадём пэс, мэ сом пхагирдо́, со нанэ буты́р; мэ да́ва ґондя́ годла́са пхарипнастыр пэ миро ило́.

¹⁰Миро Раё Дэ́вла, анги́л Ту́тэ дова́, со ма́нгэ исын пир ило́, Ту́тыр исын на гарадо́, сыр мэ да́ва ґондя́ (уздыхинава).

¹¹Миро ило́ марэлапэ дукханэс, мири́ зор мэкэ́ла ман; аж мирэ́ якха́ на дыкхэ́на буты́р яснэс.

¹²Мануша́, савэ́нгэ со́мас дро́го мэ, и мирэ́ дру́ги (мала́) исын тэрдэ́ криг мирэ́ дукхатыр, мирэ́ сэмэнцы дурьёна ма́ндыр.

¹³И одолэ́, савэ́ родэ́на миро ди тэ хасякирэ́н, чхувэ́на фэля́ тэ ухтылэ́н; и кодолэ́, савэ́ родэ́на чорипэ́н пэ ма́ндэ, ракирэ́на пал миро хасибэ́н, и ёнэ пхэрдэ́ дывэсэнца россэндинэна пал хохаибэ́н пэ ма́ндэ.

¹⁴Нэ мэ сом сыр кашуко, мэ ничы́ на шунава, и мэ сом сыр лало́ ману́ш, кон на отпхандэла пэ́скиро муй.

¹⁵И мэ сом сыр ману́ш, саво́ на шунэ́ла, и савэскири чиб на дэ́ла ра́да тэ отпхэнэл.

¹⁶Нэ Мэ ужакирава лачхипэ́н Ту́тыр, Раё Дэ́вла, Ту отпхэнэса ма́нгэ, Раё Дэ́вла, Дэвэ́л миро!

¹⁷И мэ пхэндём: “Мэк тэ на радынэ́нпэ одолэ́, ке́ли мири́ ґэро́й обштавэлапэ.

¹⁸Мэ сыг пэрава и мири́ дукх ние́кхвар на мэкэ́ла ман.

¹⁹Пал-дова́ со мэ приджинава мири́ банг, мири́ годы́ пхадёла пал миро грэ́хо.

²⁰Нэ мирэ́ вэ́рги исын джидэ́ и зоралэ́, и исын дасавэ́, савэ́ бидыкхэна ман ни палсо́:

²¹дава́ исын ёнэ, кон отдэ́ла палэ чорипнаса пал миро лачхипэ́н; пал-дова́ со мэ родава джидо́ лачхипэ́н.

²²О, Раё Дэ́вла, на мэк ман! О, Миро Дэ́вла, на дурьёв ма́ндыр.

²³[р.с.] Яв сыгэды́р тэ дэс васт ма́нгэ, о Миро Раё Дэ́вла, Саво́ зракхэ́ла ман.