Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 40 Bible Online

Псалм 40 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 40

¹[39-р.с.] Хоро́скирэ Дирижоро́скэ. Давидо́скиро Пса́лмо.

²Мэ древа́н ужакирдём Рас-Дэвлэ́с, и Ёв бандия кэ мэ и шундя́, со мэ ровава годлэнца.

³И Ёв вытырдыя ман хасибнытконэ рово́стыр (хохо́стыр), артапелятыр (болотостыр) тинаса и Ёв чхудя́ мири́ ґэро́й пэ бар; и Ёв дыя́ зор мирэ́ пирэ́нгэ (стопэ́нгэ).

⁴Ёв чхудя́ нэви́ гилы́ дро миро муй, соб (кай) тэ шарэ́н амарэ́ Дэвлэ́с. Бут мануша́ дыкхэ́на дава́ и явэ́на тэ дарэ́н и явэ́на тэ гарадён пал Растэ-Дэвлэ́стэ.

⁵Тэ явэ́л бахтало́ одова́ ману́ш, кон ужакирэ́ла лачхипэ́н Ра́стыр-Дэвлэ́стыр, и саво́ на рисёла кэ пхутькирдэ́ и кэ одолэ́, савэ́ рисёна кэ хохаибэ́н.

⁶О, Раё Дэ́вла, миро Дэ́вла, Ту кэрдя́н бут: Тырэ́ ди́вна бутя́ и задуминыбэна пал амэ́ндэ нико́н на могинэ́ла тэ ґалёл, соб (кай) тэ пхэнэ́л вари-со пал дава́ и тэ ракирэ́л сарэ́нгэ. Мэ на могина́ва аж тэ пхэна́в — лэн исын ада́кицы бут.

⁷Ту на выкэдыян ни свэ́нта дыибэна́ (жэртвы), ни яныбэна́; Ту отпхандян мирэ́ кана́. Хачкирибнаскирэ свэ́нта дыибэна́ и свэ́нта дыибэна́ пал грэ́хо Ту на древа́н мангэса.

⁸Тэ́ньци мэ пхэндём: “Акэ, мэ джа́ва, дрэ лылварьякиро (книгакиро) сви́тко, кай исын чхиндло́ пал ма́ндэ:

⁹‘Мэ древа́н кама́м тэ кэра́в Тыри́ во́ля, о миро Дэ́вла, и Тыро́ Зако́но исын дро Миро ило́.

¹⁰Мэ пхэндём зоралэ́с пал Тыро́ чачипэ́н анги́л бутэ́ манушэ́ндэ, савэ́ скэдэ́напэ: ґа́да, мэ на запхандём пэ́скирэ ушта́, о Раё Дэ́вла, Ту Кокоро́ саро́ джинэ́са.

¹¹Мэ на ґарадём Тыро́ чачипэ́н дро миро ило́, мэ пхэнавас сарэ́нгэ пал Тыро́ патяибэ́н, и со Ту зракхця́н ман: мэ на ґарадём пал Тыри́ лачхэ́-илы́ткима и Тыро́ патяибэ́н анги́л бутэ́ манушэ́ндэ.

¹²О Раё Дэ́вла, на отдэ́, пририкир Тыри́ мило лачхэ́-илы́ткима, мэк Тыро́ лачхипэ́н и Тыро́ патяибэ́н усады (сак) тэ ракхэ́н ман.

¹³Пал-дова́ со ада́кицы бут чорипэна пэ ма́ндэ сарэ́ ригэ́ндыр, со нашты́ тэ подгинав. Мирэ́ чорэ́ рэ́нды (де́лы) догинэ́ пэ ма́ндэ, со мэ на могина́ва тэ дыкха́в пал лэ́ндэ, а лэн исын буты́р сыр исын бала́ пэ миро шэро́: миро ило́ на вырикирэ́ла ман.

¹⁴О, Раё Дэ́вла! Яв лачхо́ тэ зракхэс ман, о, Раё Дэ́вла, яв сыгэды́р тэ дэс васт ма́нгэ.

¹⁵Мэк одолэ́, савэ́ родэ́на тэ хасякирэ́н миро ди, тэ явэ́н ладжакирдэ́ и тэлякирдэ (хасякирдэ́ паты́в). Мэк кодолэ́, савэ́ выпхэнэна мысля пэ хасибэ́н ма́нгэ, тэ явэ́н чхурдынэ́ палэ дрэ напатыв.

¹⁶Мэк ёнэ тэ ячэ́нпэ кокорэ́ пэ́са пэ хасибэ́н пал лэ́нгиро ладжаипэ́н, савэ́ ракирэ́на ма́нгэ: “Дыкх! Мишто́!”

¹⁷Мэк сарэ́, кон родэ́ла Тут, тэ радынэ́нпэ и явэ́н весе́ла (лошалэ́) Ту́тыр и ўса́ды (сак) тэ пхэнэ́н: “Тэ явэ́л ґаздыно́ шарибнаса Рай Дэвэ́л” — сарэ́, савэ́ камэ́на тэ зракхэнпэ Ту́тэ.

¹⁸[р.с.] Нэ мэ сом чороро́ и сом дрэ трэ́бима, Рай Дэвэ́л явэ́ла тэ дэл ту́га (тэ заботисол) пал ма́ндэ. Ту дэ́са васт ма́нгэ и зракхэ́са ман, о, Миро Дэ́вла, яв сыгэды́р.