Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 49 Bible Online

Псалм 49 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 49

¹[48-р.с.] Хоро́скирэ Дирижоро́скэ. Пса́лмо Кареёскирэ Чхавэ́ндыр.

²Шунэ́н дава́, сарэ́ мануша́лэ: пришунэнпэ сарэ́, кон дживэ́ла пэ свэ́то:

³тумэ́, манушы́тка чхавэ́: барвалэ́ и чорорэ́ кхэтанэ́.

⁴Миро муй пхэнэ́ла годьваро́ лав, миро ило́ дэ́ла дума тэ ґалёл.

⁵Мэ причхувава пэ́скиро кан кэ приме́ро (сыкоибэн) тэ пхэна́в, мэ розлава мирэ́-гиленгири гарады мысля пэ гусли.

⁶Со́скэ ма́нгэ тэ дарав, ке́ли исын чорэ́ дывэса́, ке́ли чорэ́ вэ́рги явэ́на трусця́л мирэ́ пе́нты (кхурья́)?

⁷Савэ рисёна кэ пэ́скиро барвалыпэ́н тэ зракхэнпэ и шарэна пэс одолэса, со́са ёнэ исын барвалэ́.

⁸Никонэ́скэ нашты́ тэ выкинэл пэ́скирэ пшалэ́с, ци тэ дэл выкиныбнытко сымады́ (выкупо) пал лэ́стэ,

⁹пал-дова́ со тэ выкинэс манушы́тко джиибэ́н исын мол барэ́ ловэ́ и лэн ние́кхвар на ухтылэ́ла (на́доси),

¹⁰соб (кай) ману́ш тэ дживэ́л пэ сарэ́ ве́ки и, соб (кай) ёв ние́кхвар тэ на джинэ́л мэрибэ́н.

¹¹Ёв дыкхэ́ла, сыр годэ́ мануша́ мэрэ́на, адя́кэ-паць сыр дылынэ́ кхэтанэ́ бигодякирэнца хасёна, и мэкэ́на пэ́скиро барвалыпэ́н явирэ́нгэ.

¹²Ёнэ думинэ́на пэ́скэ, со лэ́нгирэ кхэра́ явэ́на пэ ве́ки, со лэ́нгирэ штэ́ты тэ дживэ́н сарэ́ родэ́нгэ; мэк ёнэ кхарэ́на пэ́скирэ пхувья́ пэ́скирэ лавэ́нца.

¹³Нэ ману́ш на ячэ́лапэ дрэ вучи́ паты́в; ёв исын сы́рбы мурда́л (жывотно), саво́ мулёла.

¹⁴Дава́ исын дром дылынэ́ манушэ́нгиро и ваш одолэ́нгэ, кон радынэ́лапэ пэ́скирэ лавэ́ндыр. Сэ́ла.

¹⁵Сыр бакрэ́н лэн выкэдэна ваш лю́но (адо), мэрибэ́н явэ́ла тэ чаравэл лэн, чачипнаскирэ мануша́ явэ́на тэ рикирэ́н лофо (верхо) пэ лэ́ндэ злокостыр и лэ́нгиро маса́ явэ́на тэ кирнён; маґила явэ́ла лэ́нгиро штэ́то.

¹⁶Нэ Дэвэ́л выкинэла миро ди люноскирэ (адоскирэ) зорья́тыр, пал-дова́ со Ёв Кокоро́ лэ́ла ман. Сэ́ла.

¹⁷На дар, ке́ли ману́ш ячэ́ла барвало́, сыр сла́ва пал лэ́скиро кхэр барьёла; пал-дова́ со ёв на лэ́ла пэ́са нисо́, а лэ́скири сла́ва на джа́ла пал лэ́стэ;

¹⁸мэк ёв шардя пэ́скиро ди пал пэ́скиро джиибэ́н,

¹⁹мэк ёнэ шардэ лэс, со ёв кэрдя́ миштэ́с пэ́скэ,

²⁰нэ ёв джа́ла кэ лэ́скирэ-дадэнги́рэ ро́ды тэ мэрэ́л, савэ́ буты́р на дыкхэ́на дуд.

²¹[р.с.] О ману́ш, саво́ исын дрэ бари паты́в, нэ саво́ на ґалёла, исын сы́рбы мурда́л (жывотно), саво́ хасёла.