Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 51 Bible Online

Псалм 51 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 51

¹[50-р.с.] Хоро́скирэ Дирижоро́скэ. Давидо́скиро Пса́лмо,

²ке́ли проро́ко Натано (Нафано) явдя́ кэ Ёв, сыр Ёв загия́ кэ Вирса́вия.

³Яв тангипнаскиро (пожалин) кэ мэ, о Дэ́вла, пир Тыро́ дро́го лачхипэ́н, кхос криг мирэ́ чорэ́ рэ́нды (де́лы) пир Тыри́ бари мило лачхэ́-илы́ткима.

⁴Вымо́р (хала́в) ман сарэ́са мирэ́ чорипна́стыр и жужакир ман мирэ́ грэхостыр.

⁵Пал-дова́ со мэ приґалыём мирэ́ фуй рэ́нды (де́лы) и миро грэ́хо исын ўса́ды (сак) анги́л ма́ндэ.

⁶Анги́л Ту́тэ, Екхэ́стэ, мэ кэрдём грэ́хо и кэрдём фуипэ́н анги́л Тырэ́ якха́. И чачуно́ явэ́ла Тыро́ ракирибэ́н и патяибны́тко явэ́ла Тыро́ сэ́ндо.

⁷Ѓа́да, мэ бияндыём дро чорипэ́н и мири́ дай бияндя́ ман грэхитконэса.

⁸Ѓа́да, Ту камэ́са, соб (кай) мэ тэ явав чачуно́ дро ило́ и Ту сыклякирэса ман, соб (кай) мэ тэ явав годо́ дрэ гарадэ́ мысли.

⁹Выжужакир ман исопоса и мэ ява́ва жужо́, вымор ман и мэ ява́ва парнэдыр ивэстыр.

¹⁰Дэ ма́нгэ, соб (кай) мэ тэ шунав ра́дыма и тэ явав лошало (весёло), соб (кай) тэ радынэ́нпэ мирэ́ кокалы́, савэ́ Ту пхагирдян.

¹¹Ѓарав Пэ́скиро муй мирэ́ грэхэ́ндыр и кхос криг саро́ миро фуипэ́н.

¹²Кэр андра́л ма́ндэ жужо́ ило́, о Дэ́вла, нэвякир миро ду́хо (фа́но) зорья́са.

¹³На мэк ман дрэ риг Ту́тыр, на лэ криг Тыро́ Свэ́нто Ду́хо (Фа́но) ма́ндыр.

¹⁴Дэ палэ ма́нгэ тэ радынавпэ, со Ту зракхэ́са ман, подрикир ман лачхэ́ духо́са.

¹⁵Мэ ява́ва тэ сыклякирав одолэ́н, кон кэрэ́ла чорэ́ рэ́нды, и грэхи́тка мануша́ парудёна, ко́ли ёнэ рисёна кэ Ту.

¹⁶Ра́кх ман бангятыр, пир сави́ рат сыс прочхудо, о Дэ́вла! О Дэвлалэ, Саво́ зракхэ́ла ман: и мири́ чиб явэ́ла тэ багал пал Тыро́ чачипэ́н.

¹⁷О, Раё Дэ́вла, откэр мирэ́ ушта́ и отпхандэ миро муй тэ шара́в Тут.

¹⁸Ту на камэ́са свэ́нта яныбэна́ — мэ да́вас Ту́кэ. Ту и на радынэсапэ, соб (кай) мэ тэ янав хачкирибнаскирэ свэ́нта дыибэна́.

¹⁹Свэ́нто дыибэ́н (жэ́ртва) исын лачхо́ Ту́кэ, Дэвлэ́скэ, тэды, ке́ли амаро́ ду́хо (фа́но) исын рискирдо кэ Дэвэ́л. О, Дэ́вла, Ту ж сан дрэ паты́в кэ ило́, саво́ дандырэла пэс пал грэ́хо и рискирдо кэ Ту.

²⁰[р.с.] О, Дэ́вла, бахтякир Тырэ́ кучонэ́ ласкатыр Сио́но. Ѓаздэ Ерусалимо́скирэ ва́нты (сцяны).

²¹[р.с.] Тэды явэ́на лачхэ́ Ту́кэ свэ́нта дыибэна́ (жэртвы) чачунэ́ илэ́стыр, свэ́нта дыибэна́ ґаздыибнаса (возношэниёса) и цэ́ла схачкирибнытка свэ́нта дыибэна́, со ману́ш выкэдэ́ла, тэды янэ́на гурувэ́н сыр свэ́нто дыибэ́н пэ тыро́ алта́рё.