Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 66 Bible Online

Псалм 66 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 66

¹[65-р.с.] Хоро́скирэ Дирижоро́скэ. Гилы́. Пса́лмо. Дэн го́дла радыма́са Дэвлэ́скэ, сари́ пхув,

²бага́н пал паты́в Лэ́скирэ лавэ́скэ, бага́н слава́са, ке́ли шарэна Лэс.

³Пхэнэ́н Дэвлэ́скэ: “Савэ барэ́ кэ дар исын Тырэ́ бутя́! Тырэ́ вэ́рги ячэ́на тэ кандэ́н Тут пал Тыро́ зоралыпэ́н.

⁴Мэк сари́ пхув тэ бандёл шэро́ патыва́са кэ Ту, и тэ багал Ту́кэ, мэк ёнэ тэ шарэ́н Тыро́ лав.”

⁵Явэ́н и дыкхэ́н пэ Дэвлэ́скирэ бутя́! Саво́ зоралыпэ́н исын Тырэ́ бутендыр, со Ту кэрдя́н манушэ́скирэ чхавэ́нгэ, со́стыр аж вэ́рги страхадёна.

⁶Ёв пирикэрдя мо́рё (дэрья́в) дрэ шуки́ пхув; ёнэ пиригинэ́ мо́рё (дэрья́в) пирэнца (стопэнца), одо́й амэ ява́са тэ радынаспэ Лэ́стыр.

⁷Ёв кралинэла Пэ́скирэ зорья́са пэ сарэ́ ве́ки; Лэ́скирэ якха́ дыкхэ́на цямкэс (ракхипныткэс) пал Наюды́тка на́цыи, соб (кай) одолэ́, кон бунтуинэла, тэ на ґаздэ́нпэ радыма́са. Сэ́ла.

⁸Парикирэ́н и шарэ́н амарэ́ Дэвлэ́с, о мануша́лэ, пэ пхув, пхэнэ́н зоралэ́с шарибэ́н Лэ́скэ;

⁹Кон дэ́ла джиибэ́н амарэ́ дескэ, и на домэкэла амарэ́ ґэрэнгэ тэ зджан штэто́стыр.

¹⁰Пал-дова́ со Ту, Дэ́вла, пропатякирдян амэн, Ту выпробиндян амэн сыр руп выжужакирэна (вычыстинэна).

¹¹Ту яндян амэн дрэ фэлы́, Ту чхудя́н тасаибэн пэ амарэ́ думэ;

¹²Ту кэрдя́н, соб (кай) мануша́ тэ псирэ́н пир шэро́ пэ амэ́ндэ; амэ прогиям пир яг и пир пани́; нэ Ту вылыджиян амэн, соб (кай) тэ дэс бут.

¹³Мэ заджава дрэ Тыро́ Кхэр хачкирибнаскирэ свэнтонэ́ дыибнэнца; мэ кэра́ва, сыр мэ совлахадём пал дова́,

¹⁴со мирэ́ ушта́ выпхэндлэ и миро муй пхэндя́, ке́ли сыс пхаро́ ма́нгэ.

¹⁵Мэ яна́ва Ту́кэ хачкирибнаскирэ свэ́нта дыибэна́ тхулэ мурдалэ́ндыр, кучонэ́ кхандыбнаса бакрэ́ндыр, мэ яна́ва гурувэ́н бузненца. Сэ́ла.

¹⁶Явэ́н, шунэ́н ракхунэс, сарэ́, конэ́стэ исын трашаибэ́н анги́л Дэвлэ́стэ и мэ пхэна́ва тумэ́нгэ, со Ёв кэрдя́ мирэ́ дескэ.

¹⁷Мэ дыём го́дла Лэ́скэ тэ помогинэл мирэ́ мо́са и шардём Лэс мирэ́ чиба́са (чибьяса).

¹⁸Ко́ли мэ думинавас пал чорипэ́н дро пэ́скиро ило́, тэды Рай Дэвэ́л на шунэлас ман.

¹⁹Нэ Дэвэ́л шундя́, пришундяпэ кэ мири́ зан, сыр мэ мангдёмпэ,

²⁰Тэ явэ́л бахтякирдо́ Дэвэ́л, Саво́ на рисия́ криг мирэ́ патерьятыр (молитватыр), Саво́ на рискирдя́ Лэ́скири лачхэ́-илы́ткима ма́ндыр.