Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 71 Bible Online

Псалм 71 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 71

¹[70-р.с.] Пал Ту́тэ, Раё Дэ́вла, мэ гарадёвава, соб (кай) Ту тэ зракхэс ман: на домэк ние́кхвар, соб (кай) мэ тэ явав ладжакирдо́.

²Зра́кх ман пир Тыро́ чачипэ́н и подэ васт ма́нгэ бидатыр; причху́в кан, со мэ ракира́ва и дэ зор ма́нгэ.

³Яв ваш ма́нгэ скаласа, пал сави́ ма́нгэ ўса́ды (сак) тэ гарадёвав. Ту дыя́н припхэныбэ́н тэ зракхэн ман, пал-дова́ со Ту сан сы́рбы мири́ ска́ла и тва́рдыма (диз) тэ приракхэн ман.

⁴Миро Дэ́вла, зра́кх ман фуе́-манушэ́нгирэ вастэ́ндыр, напатяибнаскирэ и биилэскирэ манушэ́скирэ вастэ́стыр.

⁵Пал-дова́ со Ту́тыр мэ ужакирава лачхипэ́н, о, Раё Дэ́вла, Дэ́вла, кэ Ту мэ рискирдём пэ́скиро ило́ тэрнэ́ бэршэ́ндыр.

⁶Ту сан ма́нца, ке́ли мэ ишчо (инкэ́) со́мас дрэ дакири лочови́ (утроба). Ту вылыян ман пэ свэ́то да́кирэ лочовя́тыр, пал-дова́ мэ ўса́ды (сак) ява́ва тэ шара́в Тут.

⁷Бут мануша́ дыкхэ́на пэ ма́ндэ сыр пэ ди́во; нэ Ту сан мири́ зоралы́ вучарды́ тэ ґарадёвав.

⁸Мэк тэ шарэ́н Тут мирэ́ ушта́, мэк ёнэ тэ славинэ́н Тут сарэ́ дывэса́.

⁹На джа́ криг ма́ндыр акана́, сыр мэ сом пхуро́, на мэк ман, ке́ли мири́ зор тыкнёла.

¹⁰Пал-дова́ со мирэ́ вэ́рги ракирэ́на пэ ма́ндэ, а одолэ́, савэ́ ужакирэ́на тэ замарэ́н ман, придуминэна фуипэ́н кхэтанэ́,

¹¹ракири́: “Дэвэ́л мэкця́ лэс. Родаса лэс и ла́са лэс, пал-дова́ со ние́кх на явэ́ла тэ зракхэ́л лэс’.

¹²О, Дэ́вла! На дурьёв ма́ндыр. Миро Дэ́вла! Яв сыгэды́р тэ дэс васт ма́нгэ.

¹³Тэ явэ́н ладжакирдэ́, тэ явэ́н чхакирдэ бипатываса одолэ́, савэ́ исын вэ́рги пэ миро ди, тэ чхакирэн манушэ́нгиро обракирибэн, и тэ на дэн паты́в одолэ́нгэ, кон родэ́ла чорипэ́н пэ ма́ндэ.

¹⁴Нэ мэ ява́ва ўса́ды (сак) тэ ужакирав лачхипэ́н Ту́тыр, и мэ ява́ва тэ шара́в Тут буты́р и буты́р.

¹⁵Миро муй пхэнэ́ла пал Тыро́ чачипэ́н и пал дова́, со Ту кэрдя́н тэ зракхэс амэн сарэ́ дывэса́, пал-дова́ со мэ аж на джино́м (джина́в) тэ гинав саро́ дава́.

¹⁶Мэ ява́ва Ра́скирэ-Дэвлэ́скирэ, мирэ́-Дэвлэ́скирэ зорья́са, мэ роспхэнава пал Тыро́ чачипэ́н, фэ́ни (то́ка) пал Тыро́

¹⁷О, Дэ́вла! Ту сыклякирдян ман мирэ́ тэрныпнастыр и кэ акана́ мэ ракира́ва сарэ́нгэ пал Тырэ́ ди́вна бутя́.

¹⁸О, Дэ́вла! На мэк ман, ке́ли мэ сом пхуро́ и сывонэ-балэнгиро, пака мэ роспхэнава пал Тыри́ зор, пал Тыро́ зоралыпэ́н кадалэ́ родо́скэ, и Саво́ трэй тэ явэ́л.

¹⁹О, Дэ́вла! Тыро́ чачипэ́н исын аж кэ болыбэ́н, пал-дова́ со Ту кэрдя́н барэ́ рэ́нды. О, Дэ́вла! Кон исын дасаво-паць, сыр Ту сан?

²⁰Ту дыя́н ма́нгэ тэ пиридживав пхарэ́ и фуй дывэса́; нэ Ту и джидякирэса ман нэвэ́стыр и Ту вылыджаса нэвэ́стыр ман пхувья́кирэ хорипнастыр.

²¹Ту дэ́са буты́р зор ма́нгэ и ту подрикирэса ман кажнонэ́ рига́тыр.

²²Мэ адя́кэ-паць ява́ва тэ шара́в Тут, древа́н пал Тыро́ патяибэ́н пэ лута. О, Миро Дэ́вла! Мэ ява́ва тэ бага́в Ту́кэ пэ гусли, о Свэ́нто Дэ́вла Израилёстыр!

²³Мирэ́ ушта́ явэ́на тэ радынэ́нпэ зоралэ́с, ке́ли мэ ява́ва тэ шара́в Тут, багиндой Ту́кэ, и адя́кэ-паць миро ило́, Саво́ Ту выракхцян грэхэ́ндыр.

²⁴Мири́ чиб явэ́ла адя́кэ-паць тэ ракирэ́л пал Тыро́ чачипэ́н пэ сарэ́ дывэса́; пал-дова́ со одолэ́ мануша́, кон родэ́ла фуипэ́н пэ ма́ндэ, ладжакирдэ́ и нашадэ паты́в.