Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 80 Bible Online

Псалм 80 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 80

¹[79-р.с.] Хоро́скирэ Дирижоро́скэ. Допхэныбэ́н пэ Лилиякири Мелодия. Асафоскиро Пса́лмо.

²Причху́в кан, Израилёскиро Чхупна́ри! Ту, Саво́ лыджиян Ёзас (Иосифос) сыр ґурто; Ту, Саво́ сан бэшто́ машки́р Херувимэндэ, сыкадёв Пэс.

³Сыка́в Пэ́скиро зоралыпэ́н анги́л Ефремостэ, Венияминостэ и Манасиястэ, яв тэ зракхэс амэн.

⁴О, Дэ́вла! Зоралякир палэ амэн и мэк тэ зяинэл Тырэ́-москиро дуд и амэ зракхасапэ.

⁵Раё Дэ́вла, болыбна́скирэ-янголэ́нгиро Дэвэ́л! Ци бут явэ́са Ту тэ холясос пэ мангипэ́н Тырэ́-манушэ́нгиро?

⁶Ту чалякирдян лэн марэ́са ясвэ́нца и Ту кэрдя́н, соб (кай) ёнэ тэ пьен ясва барэ́ мераса?

⁷Ту кэрдя́н, соб (кай) амарэ́ сусе́ды (кота́рья) тэ марэ́нпэ пал амэ́ндэ и амарэ́ вэ́рги тэ санпэ амэ́ндыр машки́р пэ́стэ.

⁸О, Дэ́вла, болыбна́скирэ-янголэ́нгиро! Зоралякир палэ амэн и мэк тэ зяинэл Тырэ́-москиро дуд, и амэ зракхасапэ.

⁹Ту яндян винаградоскиро хру́сто (лоза) Египто́стыр, Ту традыян криг яви́р на́цыи и чхудя́н дава́ хру́сто дрэ пхув:

¹⁰Ту жужакирдян штэ́то анги́л дава́, лэ́скирэ ко́рни (рукха́) гинэ́ хор и ёв розбария пир сари́ пхув.

¹¹Бэргицы сыс учхакирдэ лэ́скирэ зорья́са и лэ́скирэ рандя́ сыс сыр барэ́ кедры.

¹²Ёв розмэкця пэ́скирэ рандя́ (вэ́тки) кэ мо́рё (дэрья́в), а пэ́скирэ сэнки (суки) кэ рэка (лэнь).

¹³Со́скэ Ту пхагирдян тыны (ограды), со сыс трусця́л дая́ бар, соб (кай) кажно, кон проджа́ла маму́й, тэ обкошэл ла́кирэ му́ри?

¹⁴Вэшытко баличо подґанавэла ко́рни (рукха́) и фэлдытко мурда́л (зверё) обхала лэс.

¹⁵О, Дэ́вла, болыбна́скирэ-янголэ́нгиро, амэ древа́н мангаса Тут тэ рисёс палэ. Дыкх тэлэ́ болыбна́стыр пэ амэ́ндэ и, акэ, яв тэ дыкхэ́с Пэ́скирэ-винаградоскири бар;

¹⁶яв и роздыкх далэ́ винаградоскирэ кашторэ, савэ́ Тыро́ чачо́ васт почхудя и лэ́скиро тэрнэ́ рандя́ (отбарипэн), со Ту кэрдя́н зоралэды́р

¹⁷Ёнэ схачинэ яга́са, вычингирдэ; мэк тэ хасён ёнэ Тырэ́-москири холя́тыр.

¹⁸Мэк Тыро́ чачо́ васт тэ явэ́л упрэдыр вастэ́стыр Тырэ́ манушэскирэстыр, конэ́скэ Ту дыя́н зор ваш Пэ́скэ.

¹⁹Тэды амэ на дасапэ палэ Ту́тыр, джидякир амэн нэвэ́стыр (нэвэ́с) и амэ прикхараса Тыро́ лав.

²⁰[р.с.] Зорьякир амэн нэвэ́стыр, о Раё Дэ́вла, Дэвэ́л болыбна́скирэ-янголэ́нгиро; кэр, соб (кай) тэ зяинэл Тыро́ муй и амэ зракхасапэ.