Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 81 Bible Online

Псалм 81 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 81

¹[80-р.с.] Хоро́скирэ Дирижоро́скэ пэ Гатоскиро Струменто. Асафоскиро Пса́лмо.

²Бага́н радыма́са Дэвлэ́скэ, амарэ́ Зоралыпнаскэ, бага́н зоралэ́с Яково́скирэ Дэвлэ́скэ;

³лэн тэ бага́н гилы́, янэ́н бубно (тамбурино) адари́к, и милонэ-башаибнаскирэ гусли лутаса.

⁴Пхурдэ́н дро ро́го (труба) пэ нэво́ чхон, пэ пхэрдо́ чхон, дро дывэ́с амарэ́ свэнкоскиро.

⁵Пал-дова́ со дава́ исын Израилёскиро стату́то (уставо), Яково́скирэ-Дэвлэ́скиро Зако́но.

⁶Ёв дыя́ дава́ сыр допхэныбэ́н ваш Ёза́скэ (Иосифоскэ), сыр Ёв выджа́лас Египто́скирэ пхувья́тыр. Мэ шундём чиб, сави́ мэ на ґалыём:

⁷“Мэ вылыём лэ́скиро псико́ ґамостыр; лэ́скирэ васта́ ячнэ́ вольна кхудэндыр (корзинэндыр).

⁸Ту прикхардян ман дро пхарипэ́н и мэ подыём васт ту́кэ бидатыр, мэ отпхэндём ту́кэ громоскирэ гарадэ́ штэто́стыр, мэ пропатякирдём тут пашы́л Мериваскирэ паня́. Сэ́ла.

⁹Шунэ́н, мирэ́ мануша́лэ, и мэ допхэнава тумэ́нгэ, о Израилё, ко́ли ту шунэсас ман:

¹⁰На явэ́на чу́жа дэвлорэ́ тумэ́ндэ, и тумэ́ на дэ́нас паты́в чужонэ́ дэвлорэскэ.

¹¹Мэ сом Рай Дэвэ́л, Тыро́ Дэвэ́л, Саво́ вылыджия́ тут Египто́скирэ пхувья́тыр: отпхандэ буґлэс Тыро́ муй и Мэ пхэрдякирава лэс.

¹²Нэ мирэ́ мануша́ на шундлэ́ Мири́ зан (глос), и Израилё на кандыя́ ман.

¹³И Мэ ячкирдём лэн, соб (кай) ёнэ тэ дживэ́н пир пэ́скиро пхаро́ ило́, соб (кай) ёнэ тэ псирэ́н сыр лэ́нгэ думинэлапэ.

¹⁴О, ко́ли мирэ́ мануша́ тэ шунэ́н ракхунэс ман, ко́ли Израилё тэ дживэ́л мирэ́ дромэ́са.

¹⁵Мэ сы́гэс тэлякиравас лэ́нгирэ вэргэ́н тэл ґэра́ и мэ рискиравас Миро васт пэ лэ́нгирэ намалэндэ.

¹⁶Одолэ́, савэ́ бидыкхэна Рас-Дэвлэ́с, бандякирэнас шэрэ́ анги́л Лэ́стэ, а лэ́нгири ка́ра явэ́лас усады (сак).”

¹⁷[р.с.] И Ёв чаравэлас лэн пхэрдэ́с най фэдэдыршонэ парнэ́ гивэса и ёнэ явэ́нас чалэ фэлдытконэ авгинэстыр (мэдатыр).