Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 84 Bible Online

Псалм 84 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 84

¹[83-р.с.] Хоро́скирэ Дирижоро́скэ пэ Гедоскирэ Струме́нты. Пса́лмо Кареёскирэ-Чхавэ́нгиро.

²Савэ кучонэ́ исын Тырэ́ ша́тры, о Раё Дэ́вла, болыбна́скирэ-янголэ́нгиро.

³Дро миро ди исын смэга/труш (жажда) и ёв аж нашавэла зор, соб (кай) ма́нгэ тэ явав дрэ мирэ́ Ра́скирэ-Дэвлэ́скири грэ́да (дво́ро), миро ило́ и мири́ лоч, хай, кхарэ́на радымакирэ заня́са джидэ́ Дэвлэ́с.

⁴Дыкх! И чириклы латхя́ кхэр пэ́скэ и бахирка (ласточка) ку́фо (ґнязда) пэ́скэ, кай ёй чхувэ́ла пэ́скирэ тыкнорэн пэ Тырэ́ алта́ри, о Раё Дэ́вла, болыбна́скирэ-янголэ́нгиро, миро Кра́ли и миро Дэвэ́л.

⁵Бахталэ́ исын одолэ́, савэ́ дживэ́на дро Тыро́ кхэр: ёнэ кажно мо́ло явэ́на тэ шарэ́н Тут. Сэ́ла.

⁶Бахтало́ исын кодова́ ману́ш, конэ́скири зор исын Ту́тыр, конэ́скиро ило́ исын пэ дром кэ Сио́но;

⁷сыр ёнэ джа́на дурэды́р пир Ровибнаскиро до́ло, ёнэ пирикэрэна лэс дрэ панескирэ ґанынгорья, брышы́нд учхакирэ́ла дая́ пхув бахтякирибнаса.

⁸Ёнэ джа́на екхэ зорья́тыр кэ яви́р зор, кажно лэ́ндыр явэ́ла пэ бэ́рга Сио́но анги́л Дэвлэ́стэ.

⁹Раё Дэ́вла, Дэвэ́л болыбна́скирэ-янголэ́нгиро, шун мири́ па́тери, пришунпэ Яково́скиро Дэвэ́л. Сэ́ла.

¹⁰Ѓа́да, Дэ́вла, Ту сан амаро́ шчы́то, подыкх пэ муя́ Тырэ́ манушэ́нгиро, конэ́с Ту помакхцян.

¹¹Пал-дова́ со екх дывэ́с пэ Тыри́ грэ́да исын фэды́р, сыр бар (тысёнцо) дывэса́. Мэ выкэдыём фэды́р тэ тэрдёвав пашы́л вуда́р Дэвлэ́скирэ-Кхэрэ́скиро, сыр тэ джива́в дрэ ша́тры, кай фуй мануша́.

¹²Пал-дова́ со Рай Дэвэ́л, Дэвэ́л, исын кхам и шчы́то: Рай Дэвэ́л дэ́ла бахталыпэ́н и сла́ва. Ёв на явэ́ла тэ зарикирэл лачхипэ́н одолэ́нгэ, савэ́ дживэ́на чачипнаскирэс.

¹³[р.с.] Рай Дэвэ́л, болыбна́скирэ-янголэ́нгиро, тэ явэ́л бахтало́ ману́ш, саво́ древа́н патя́ла дрэ Ту́тэ.