Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 90 Bible Online

Псалм 90 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 90

¹[89-р.с.] Мойзаскири Па́тери (Моли́тва), Саво́ сыс Дэвлэ́скиро Ману́ш.

²О, Раё Дэ́вла! Ту са́нас усады (сак) амэ́нгэ сыр амаро́ кхэр ваш сарэ́ ро́ды!

³Анги́л, сыр Ту создыян бэ́рги, ци сыр Ту зачхудян пхув и свэ́то и аж векостыр кэ ве́ко Ту сан Дэвэ́л.

⁴Ту кэрэ́са, со ману́ш пирикэрэлапэ дро пра́хо и ракирэ́са: “Рисён, манушэ́нгирэ чхавэ́.”

⁵Пал-дова́ со бар (тысёнцо) бэрш ваш Ту́кэ исын сыр атасятуно дывэ́с, со прогия́ (накхця), и сыр стрэ́га (стража) ратякири.

⁶Ту лыджа́са криг амарэ́ бэрша́ сыр тасадыпнаскиро панинг (наводнениё); ёнэ исын сыр линдра (дремота): тасярлатыр ёнэ исын сыр чар, со барьёла: и злокостыр (ранкостыр) ёй лулудёла (цвэтинэла) и ячэ́лапэ зэлэно, а бэльвэле́ ёй мурдалёла (вянинэла) и вышутёла.

⁷Пал-дова́ со амэ хасёваса Тырэ́ холя́тыр, и амэ́нгэ исын пхаро́, сыр Ту зоралэ́с холясоса.

⁸Ту чхудя́н амарэ́ чорэ́ рэ́нды анги́л Пэ́стэ, амарэ́ гарадэ́ грэ́хи тэ дыкхэ́н лэн.

⁹Пал-дова́ со сарэ́ амарэ́ дывэса́ джа́на криг Тырэ́ холякирибнастыр: амаро́ джиибэ́н прастала кэ ко́нцо (кэ яго́ро) сыр екх пхурдыпэн ґондяса (ўздохоса).

¹⁰Амарэ́-джиибна́скирэ дывэса́ джа́на кэ эфтадэша́ (битрияндэнгиро шэл) бэрш, а ко́ли амэ сам зоралэ́, то кэ охтодэша́ (бибишэнгиро шэл) бэрш. Нэ най фэды́р пора амарэ́ джиибнастыр исын доя́, сыр амэ сам насвалэ ци кхинэ бутя́тыр-дава́ проджа́ла (накхэла) сы́гэс и амэ вурняса криг.

¹¹Кон джинэ́ла Тырэ́-холякири зор? Кон уґалёла дар, со явэ́ла Тырэ́ холякирибнастыр?

¹²Сыкля́кир амэн тэ гинас амарэ́ дывэса́, соб (кай) тэ явэ́л годыпэ́н дро амаро́ ило́?

¹³Рисёв, о Раё Дэ́вла: кицы́ сашты́ тэ холясос? Яв лачхэ́-илэ́скиро кэ Тырэ́ писха́рья.

¹⁴Чалякир амэн тасярлатыр Пэ́скирэ лачхэ́-илыткимаса и амэ ява́са весе́ла (лошалэ́) и ява́са тэ радынаспэ сарэ́ амарэ́ дывэса́.

¹⁵Обрадын амэн пэ ада́кицы дывэса́, кицы́ Ту притасавэсас амэн, пэ ада́кицы бэрша́, кицы́ амэ пиридживдям чорипэ́н.

¹⁶Мэк тэ дыкхэ́н Тырэ́ бутя́ Тырэ́ писха́рья, мэк тэ дыкхэ́н Тыри́ райканы сла́ва амарэ́ чхавэ́.

¹⁷И мэк шукарипэ́н амарэ́-Ра́скирэ-Дэвлэ́скиро, амарэ́ Дэвлэ́скиро тэ явэ́л пэ амэ́ндэ: дэ зор амарэ́-вастэнгирэ бутенгэ, зорьякир амарэ́ васта́, со кэрэ́на бутя́.