Read Baltic Romani Bible 2019 – Библия - Пэ Балтитко Романи чиб (Романэс) 2019 Псалм 96 Bible Online

Псалм 96 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Псалм 96

¹[95-р.с.] Бага́н Ра́скэ-Дэвлэ́скэ нэви́ гилы́: бага́н Ра́скэ-Дэвлэ́скэ сари́ пхув.

²Бага́н Ра́скэ-Дэвлэ́скэ, парикирэ́н и шарэ́н Лэ́скиро лав; роспхэнэ́н анги́л сарэ́ндэ со дывэ́с, со Ёв зракхця́ амэн.

³Роспхэнэ́н сарэ́нгэ пал Лэ́скири сла́ва машки́р Наюды́тка на́цыи, пал Лэ́скирэ ди́вна кэ барипэ́н бутя́ машки́р ро́ды (пле́ми).

⁴Пал-дова́ со Рай Дэвэ́л исын баро́ и исын мол, соб (кай) тэ шарэ́н Лэс, соб (кай) тэ дарэ́н Лэ́стыр буты́р сарэ́ дэвлорэндыр.

⁵Пал-дова́ со явирэ-нацыенгирэ дэвлорэ́ исын хоханэ́ и́долы, а Рай Дэвэ́л создыя́ болыбэ́н.

⁶Паты́в и райканы сла́ва исын анги́л Лэ́стэ, зоралыпэ́н и шукарипэ́н исын дрэ Лэ́скири Кхангири́.

⁷Славинэ́н Рас-Дэвлэ́с, народы, славинэ́н Рас-Дэвлэ́с и Лэ́скири зор.

⁸Славинэ́н Рас-Дэвлэ́с пал Лэ́скиро лав, янэ́н свэ́нто дыибэ́н и явэ́н пэ Лэ́скирэ грэды (дворы):

⁹дэн паты́в Ра́скэ-Дэвлэ́скэ дрэ Лэ́скири Свэ́нто Кхангири́, издран анги́л Лэ́стэ, сари́ пхув.

¹⁰Пхэнэ́н машки́р Наюды́тка на́цыи, со Рай Дэвэ́л кралинэла! Ёв адя́кэ-паць зоралэ́с зачхудя свэ́то, со на кхарэ́лапэ криг (на зджа́ла) штэто́стыр. Дэвэ́л явэ́ла тэ сэндякирэ́л манушэ́н пир чачипэ́н.

¹¹Тэ явэ́н ра́да сарэ́ на́цыи и мэк тэ радынэ́лпэ пхув, мэк тэ ревинэл мо́рё (дэрья́в) радыма́тыр, и саро́, со дживэ́ла андрэ́.

¹²Мэк тэ обрадынэлпэ фэ́лда и саро́, со исын пэ ла́тэ. Мэк тэ радынэ́нпэ кашта́ (дрэвы) дро вэш,

¹³анги́л Растэ-Дэвлэ́стэ, Саво́ джа́ла тэ сэндякирэ́л пхув. Ёв явэ́ла тэ сэндякирэ́л свэ́то чачунэ́с, и Ёв явэ́ла тэ сэндякирэ́л манушэ́н Пэ́скирэ патяибна́са.