Read Baltic Romani Bible 2019 – Библия - Пэ Балтитко Романи чиб (Романэс) 2019 Притчы 11 Bible Online

Притчы 11 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Притчы 11

¹Начачунэ ублады́тка (весы) исын джунгалэ́ Ра́скэ-Дэвлэ́скэ, нэ чачуно́ пхарипэ́н ваш весо зоралэ́с радынэла Лэс.

²Ке́ли явэ́ла пхутькирибэ́н, явэ́ла и ладж, нэ напхутькирдэ манушэ́ндэ исын годыпэ́н.

³Дэвлытконэ́-манушэ́нгиро лачхипэ́н явэ́ла тэ приракхэл лэн, нэ напатяибнаскирэ-манушэ́нгиро чорипэ́н хасякирэ́ла лэн.

⁴Барвалыпэ́н на дэ́ла ни саво́ лачхипэ́н дро хасибны́тко дывэ́с, нэ чачипэ́н зракхэ́ла мэрибна́стыр.

⁵Чачипэ́н сыкавэ́ла дром бидошакирэ манушэ́скэ, нэ фуй мануша́ пэрэ́на пэ́скирэ фуипнастыр.

⁶Чачипэ́н зракхэ́ла дэвлытконэ́ манушэ́н, нэ напатяибнаскирэ пэрэ́на дрэ фэлы́ пэ́скирэ фрэнтыматыр, пал сави́ ёнэ традэнапэ.

⁷Сыр фуй ману́ш мэрэ́ла, лэ́скиро лачхо́ ужакирибэ́н (лэ́скири наде́я) хасёла, и начачунэ-манушэ́нгиро лачхо́ ужакирибэ́н бидатыр хасёла.

⁸Чачипна́скиро исын зракхно бидатыр, а фуй ману́ш пэрэ́ла одори́к пэ штэго лэ́скиро.

⁹Дуе-муенгиро ману́ш пэ́скирэ лавэ́нца хасякирэ́ла пэ́скирэ пашатунэс, нэ чачуно́ зракхэ́лапэ пэ́скирэ джиныбнаса.

¹⁰Сыр саро́ джа́ла лачхэ́с чачипнаскирэнца, фо́ро древа́н радынэ́лапэ; и сыр фуй мануша́ хасёна, фо́ро дэ́ла го́дла радыма́тыр.

¹¹Дэвлытка бахтякирэна (благословинэна) и ґаздэ́на кэ вучыпэн фо́ро, нэ фуй-манушэ́нгирэ муя́ равэна тэлэ́ лэс.

¹²Набарэ́-годя́киро дыкхэ́ла вучипна́стыр пэ пэ́скирэ пашатунэ́ манушэ́стэ, нэ ману́ш, саво́ ґалёла, кодова́ рикирэ́ла рама́нё/ миро [исын штыл-р.с.].

¹³Пхукаибнаскиро (переносчыко) роспхэнэ́ла чораханыбэн, нэ кодова́, савэ́стэ исын патяибны́тко ду́хо (фа́но), гаравэла рэ́ндо.

¹⁴Кай на дэ́на годыпэ́н манушэ́нгэ, мануша́ пэрэ́на, нэ кай исын бут мануша́ тэ дэн годы́, тэды одо́й нанэ дар.

¹⁵Одова́, кон исын дудвало (якхи́тко) пал чужонэ́ манушэ́стэ, кэрэ́ла фуй пэ́скэ, нэ кодова́, кон древа́н на камэ́ла тэ явэ́л дудвалэса (поручытелёса), исын бидаракиро.

¹⁶Лачхэ́-илытко джувлы́ дорэсэ́ла паты́в, нэ пхарэ́-бутякирэ мануша́ дорэсэ́на барвалыпэ́н.

¹⁷Лачхэ́-илэ́скиро ману́ш кэрэ́ла лачхипэ́н пэ́скирэ дескэ, а биилэскиро [холямо́-р.с.] ману́ш кэрэ́ла дош пэ́скирэ лочакэ (плотякэ).

¹⁸Фуй ману́ш кэрэ́ла дошвалы буты́, нэ одова́, кон росчхувэла чачипэ́н, дорэсэ́ла мишто́ мазу́ри (награда).

¹⁹Чачипэ́н лыджа́ла кэ джиибэ́н, нэ одова́, кон родэ́ла чорипэ́н, родэ́ла лэс ваш пэ́скиро мэрибэ́н.

²⁰Рай Дэвэ́л рикирлапэ криг одолэ́ндыр, савэ́ кэрэ́на чорипэ́н пэфроми (нарошнэс), нэ бидошэнгирэ дрэ сарэ́ дрома́ зоралэ́с радынэна Лэс.

²¹Мэк ёнэ и кхэтанякирэнпэ вастэ́нца, нэ фуй мануша́ на ячэ́напэ набангэ; нэ чачунэ́-манушэ́нгиро ро́до (миштыпэ́н) явэ́ла ракхно.

²²Сувнакуны́ ангрусты дро балычэнгиро накх (пятако) исын дова́-паць, сыр исын шука́р джувлы́, сави́ бут на ґалёла.

²³Чачунэ́ мануша́ древа́н тырдэнапэ кэ лачхипэ́н, нэ лачхо́ ужакирибэ́н (наде́я) фуе́-манушэ́нгири лыджа́ла кэ бари холын.

²⁴Екх ману́ш дэ́ла древа́н бут, нэ и лэ́скэ прибарьякирэлапэ буты́р, нэ яви́р древа́н пририкирэла пэ́скэ, и ёв ячэ́ла чорорэдыр.

²⁵Кон роздэла бут, одова́ явэ́ла барвало́, кон панякирэла явирэ́н, одова́ адя́кэ-паць явэ́ла панякирдо.

²⁶Мануша́ прокошэна одолэ́с, кон пририкирэла гив, нэ бахтало́ явэ́ла одолэскиро шэро́, кон бикнэла лэс.

²⁷Манушэ́с, саво́ добусовэс (старательнэс) родэ́ла лачхипэ́н, одова́ родэ́ла ла́ска Дэвлэ́стыр, нэ пхаро́ явэ́ла кодолэ́скэ, саво́ родэ́ла чорипэ́н.

²⁸Кон зоралэ́с патя́ла дро пэ́скиро барвалыпэ́н, одова́ пэрэ́ла, нэ чачунэ́ мануша́ явэ́на най шука́р сыр патря (листы) пэ кашт (дрэ́во).

²⁹Кон кэрэ́ла дош (чорипэ́н) пэ́скирэ кхэрэ́скэ, одова́ дорэсэ́ла балва́л сыр мэкно́ миштыпэ́н, нэ дылынинько ману́ш явэ́ла писха́ри годэ́-илэ́скирэ манушэ́скэ.

³⁰Чачипэ́н исын джиибна́скиро кашт (дрэ́во) сы́рбы пхабай и годо́ ману́ш притырдэла дия́.

³¹Ко́ли чачуно́ ману́ш дорэсэ́ла мазу́ри (награда) пэ пхув, тэды буты́р дорэсэ́ла грэхи́тко и фуй ману́ш.