Read Baltic Romani Bible 2019 – Библия - Пэ Балтитко Романи чиб (Романэс) 2019 Притчы 12 Bible Online

Притчы 12 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Притчы 12

¹Кон камэ́ла, соб (кай) лэс тэ сыклякирэ́н, одолэска трэй джиныбэ́н, а кон древа́н на камэ́ла, сыр сыкавэ́на лэ́скири банг, одова́ исын нагодо.

²Ра́скэ-Дэвлэ́скэ исын дро́го лачхо́ ману́ш, нэ Ёв бангякирэла манушэ́с, саво́ придуминэла фуипэ́н.

³Ману́ш нанэ тэрдо́ зоралэ́с фуипнастыр, нэ рукх (корнё) чачунэ́-манушэ́нгиро на кхарэ́лапэ (на пиричхувэлапэ) криг.

⁴Куч ромны́ исын сы́рбы коро́на пэ ромэскиро шэро́, нэ кодоя, сави́ ладжакирэла лэс, исын сы́рбы кирныпэн дрэ лэ́скирэ кокалы́.

⁵Чачунэ́ мануша́ думинэ́на пал чачипэ́н, нэ фуй мануша́ кхэтанэ́ дэ́на хохано́ годыпэ́н.

⁶Фуй мануша́ ракирэ́на лава́: “Подракхаса тэ замарас”, нэ дэвлытконэнгирэ лава́ выракхэна лэн.

⁷Фуе манушэ́н равэна тэлэ́ и ёнэ нанэ буты́р, нэ кхэр чачунэ́-манушэ́нгиро явэ́ла тэ тэрдёл.

⁸Манушэ́с шарэна пал лэ́скири годы́, нэ мануша́ явэ́на тэ дыкхэ́н вучипна́стыр пэ одолэ́стэ, конэ́стэ исын хохано́ ило́.

⁹Набаро́ ману́ш, савэ́стэ исын дына́ри, фэды́р кодолэстыр, саво́ исын дрэ паты́в фэ́ни пэ́стэ, нэ лэ́стэ на ухты́лла (на́доси) маро́.

¹⁰Чачуно́ ману́ш пэкэлапэ (заботисола) пал лэ́скирэ кхэритконэ́ мурдалэ́ндэ, нэ фуе́-манушэ́нгиро ило́ исын биманушытко (битангипнаскиро).

¹¹Кон кэрэ́ла буты́ пэ пэ́скири пхув, одова́ явэ́ла тэ хал маро́ чалэ́с, нэ кодова́, саво́ джа́ла пал балвалитконэ манушэ́ндэ, на́бут ґалёла.

¹²Фуй ману́ш исын ґа́лко тэ ухтылэл чорипнаса, нэ чачунэ́ манушэ́ндэ исын зоралы́ пхув тэл ґэра́.

¹³Фуй ману́ш пэрэ́ла дрэ фэлы́ чорипнаса пэ́скирэ уштэндыр, нэ чачуно́ ману́ш джа́ла криг пхарипнастыр.

¹⁴Ману́ш явэ́ла чало лачхипнастыр сыр пхабатыр, со выджа́ла лэ́скирэ уштэндыр, и явэ́ла дыно́ манушэ́скэ пир бутя́ лэ́скирэ-вастэнгирэ.

¹⁵Дылынэскиро дром исын чачуно́ дрэ лэ́скирэ якха́, нэ одова́, саво́ кандэ́ла, сыр лэ́скэ дэ́на годыпэ́н, исын годо́.

¹⁶Дылынинько ману́ш екха́тыр зоралэ́с холясо́ла, нэ барэ́-годя́киро счхакирэла холы́.

¹⁷Кон ракирэ́ла дова́, со ёв джинэ́ла, одова́ пхэнэ́ла чачипэ́н, нэ начачуно дудвало /якхи́тко (свидетелё) хохавэла.

¹⁸Кон ракирэ́ла, и на думинэ́ла, одова́ промарэла явирэ́с сыр курта́ла (сабля), нэ годэ́-манушэ́нгири чиб састякирэла лэс.

¹⁹Патяибнытка лава́ явэ́на тэ рикирэнпэ ўса́ды (сак), нэ хоханы чиб пэ моменто.

²⁰Фрэнтыма исын дро ило́ одолэ́ндэ, савэ́ кэрэ́на чорипэ́н, нэ кон дэ́ла годыпэ́н пал рама́нё (миро), кодова́ радынэ́лапэ.

²¹Чачунэ́ манушэ́с обджала ригаса мэрибнытко дар, нэ фуй мануша́ явэ́на пхэрдэ́ чорипнаса.

²²Рай Дэвэ́л рикирлапэ дрэ риг хоханэ́ уштэндыр, нэ одолэ́ндыр, савэ́ кэрэ́на пир патяибэ́н, Ёв бахталёла.

²³Барэ́-годя́киро ману́ш гаравэла джиныбэ́н, нэ дылыно́ роспхэнэ́ла анги́л сарэ́ндэ дылныпэ́н.

²⁴Добусово васт явэ́ла тэ хулаинэ́л, нэ набутитко васт зачхувэна кэ буты́ зорья́са.

²⁵Калыпэ́н пэ ило́ притасавэла манушэ́с, нэ лачхо́ лав радынэла лэс.

²⁶Чачунэскэ трэй тэ выкэдэл малэн (другэн), пал-дова́ со фуй мануша́ лыджа́на криг дромэ́стыр.

²⁷Набутитко ману́ш на пэкэла мас, со ёв дорэсця́ пэ старибэн (охота), нэ добусово ману́ш барьякирэ́ла миштыпэ́н.

²⁸Чачуно́ дром лыджа́ла кэ джиибэ́н, пэ лэ́скирэ дроморэ нанэ мэрибэ́н.