Read Baltic Romani Bible 2019 – Библия - Пэ Балтитко Романи чиб (Романэс) 2019 Притчы 13 Bible Online

Притчы 13 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Притчы 13

¹Годо́ чхаво́ шунэ́ла, сыр дад сыклякирэ́ла лэс чачипнаскэ, нэ кон исын напатывакиро кэ яви́р, ёв на шунэ́ла, сыр сыкавэ́на банг лэ́скэ.

²Ману́ш чалякирэла лачхипна́са сы́рбы пхабатыр пэ́скирэ уштэндыр, нэ напатяибнаскирэ дия́ чалякирэнапэ нахратыматыр.

³Кон пририкирэла пэ́скиро муй, одова́ ракхэ́ла пэ́скиро джиибэ́н, нэ кодова́, саво́ отпхандэла буґлэс пэ́скиро муй, одова́ хасёла.

⁴Кирнэ-масэ́нгиро ману́ш тырдэлапэ тэ хал, нэ нисо́ на дорэсэ́ла, нэ добусовэнгиро (старательно) ди явэ́ла барвало́.

⁵Чачуно́ ману́ш древа́н на камэ́ла хохаибэ́н, нэ надэвлытко ману́ш лыджа́ла пэс намиштэс и дорэсэ́ла ладж.

⁶Чачипэ́н ракхэ́ла одолэ́н, савэнгиро дром исын бидошэ́нгиро, нэ фуипэ́н равэла тэлэ́ [хасякирэ́ла-р.с.] грэхитконэ́ манушэ́с.

⁷Исын ману́ш, саво́ сыкавэ́ла пэс, хай, ёв исын барвало́, нэ нисо́ нанэ лэ́стэ. Исын ману́ш, саво́ сыкавэ́ла пэс сы́рбы ёв исын чороро́, нэ лэ́стэ исын баро́ барвалыпэ́н.

⁸Ману́ш могинэ́ла тэ дэл пэ́скиро барвалыпэ́н пал джиибэ́н сыр сымады́ (залого), нэ чороро́ на шунэ́ла, сыр сыкавэ́на банг лэ́скэ.

⁹Чачунэ́-манушэ́скиро дуд (свэ́то) хачола радыма́са, а фуе́-манушэ́скиро момолы́тко (свети́льнико) мурдёла.

¹⁰Пхутькирибнастыр джа́ла чинга́рд, нэ, кон кандэ́ла, сыр лэ́скэ дэ́на годыпэ́н, одова́ исын годо́.

¹¹Миштыпэ́н, со ману́ш дорэсэ́ла бипатывакирэ рэндэ́ндыр, тыкнёла, нэ кон кэрдя́ буты́ пхарэ́с, одолэскиро миштыпэ́н барьёла.

¹²Ужакирибэ́н, со на янэ́ла нисо́, кэрэ́ла адя́кэ, со ило́ дукхала, нэ ке́ли зорало́ мангипэ́н кэрэ́лапэ дро чачипэ́н, тэды джиибэ́н пхэрдёла радыма́са.

¹³Кон на прилэ́ла кэ годы́ лав, исын хасибны́тко, нэ кон кутякирэла кэ дар припхэныбэ́н, одова́ дорэсэ́ла мазу́ри (награда).

¹⁴Годэ́-манушэ́скиро лав исын джиибна́скири ґаны́нг, соб (кай) тэ рисён криг мэрибнаскирэ фэлятыр.

¹⁵Кон ґалёла миштэ́с, кодова́ исын манушэ́нгэ пир ило́, нэ напатяибнытко ману́ш пхарэ́с дживэ́ла.

¹⁶Барэ́-годя́киро ману́ш кэрэ́ла саро́ джиныбнаса, нэ дылыно́ сыкавэ́ла маму́й пэ́скиро дылныпэ́н.

¹⁷Фуй ману́ш, саво́ бичхадо́ заня́са (вестяса), пэрэ́ла дро пхарипэ́н, нэ патяибны́тко вестя-бичхаибнаскиро (посло) янэ́ла састыпэн.

¹⁸Чорорипэн и ладж пэрэ́на пэ манушэ́стэ, саво́ вычхурдэла илэ́стыр дова́, пал со сыклякирэ́на лэс. Нэ кодова́, саво́ прилэ́ла лэс, ке́ли лэс бангякирэна зоралэ́с, явэ́ла дрэ паты́в.

¹⁹Ке́ли зоралы́ мысля кэ вари-со кэрэ́лапэ кэ ко́нцо (кэ яго́ро), дава́ гудлякирэла ило́, нэ дылынэскэ на пир ило́ тэ джал криг фуипнастыр.

²⁰Кон кумплинэлапэ (малынэлапэ) годэ́ манушэ́нца, явэ́ла годо́, нэ кампания (малыпэн) дылыниньконэнца хасякирэ́ла лэс.

²¹Фуипэ́н родэ́ла грэхитконэ́ манушэ́н, нэ чачунэ́ манушэ́нгэ отплэскирэлапэ палэ лачхипна́са.

²²Лачхо́ ману́ш ячкирэ́ла мэкно́ миштыпэ́н (наследство) лэ́скирэ-чхавэ́нгирэ чхавэ́нгэ, нэ барвалыпэ́н грэхитконэ́-манушэ́нгиро приракхэлапэ ваш чачунэ́ манушэ́нгэ.

²³Бут маро́ исын пэ чхучэ́ фэ́лды чорорэ́ манушэ́нгирэ, нэ, кай на ухты́лла (на́доси) чачипэ́н машки́р манушэ́ндэ, одо́й явэ́ла хасибэ́н.

²⁴Кон жалинэла пэ́скири ран, одолэ́скэ нанэ дро́го древа́н чхаво́, нэ конэ́скэ исын дро́го ёв, одова́ сыклякирэ́ла кэ дукха́ тыкнал лэс.

²⁵Чачуно́ ману́ш ха́ла чалэ́с, кицы́ лэ́скиро ди камэ́ла, нэ фуе́-манушэ́нгиро кужум (жэлудко) явэ́ла тэ бокхалёл.