Read Baltic Romani Bible 2019 – Библия - Пэ Балтитко Романи чиб (Романэс) 2019 Притчы 18 Bible Online

Притчы 18 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Притчы 18

¹Ману́ш, саво́ дурьёла явирэндыр, родэ́ла дова́, со ёв екх кокоро́ древа́н трэбинэла, ёв исын сцял (проти) саро́ годо́ чачипэ́н.

²Дылынинько древа́н на камэ́ла тэ ґалёл джиныбэ́н; нэ соб (кай) екх тэ сыкавэ́л, со исын лэ́стэ пэ ило́ (пэ годы́).

³Екха́тыр пало́ фуипэ́н джа́ла бипатыв; а ке́ли на дэ́на паты́в, тэды и обракирэна.

⁴Манушэ́скирэ лава́ исын сы́рбы хор панинга́, и сы́рбы годыпнаскири ґанынгори, сави́ исын сы́рбы сы́гно тхадуно ручаё.

⁵Дава́ исын налачхэ́с тэ явэс пэ фуе́-манушэ́нгири риг, ци тэ равэс тэлэ́ чачунэ́ манушэ́н пэ сэ́ндо.

⁶Дылынэскирэ ушта́ выкхарэна чинга́рд, и лэ́скиро муй лыджа́ла кэ марибэ́н.

⁷Дылынэскири чиб исын хасибэ́н ваш лэ́скэ, и лэ́скирэ ушта́ исын сы́рбы фэлы́ ваш лэ́скиро ди.

⁸Кон гундяринэла (шэпчынэла) пэ кан, лэ́скирэ лава́ исын сыр лачхо́ хабноро, и ёнэ джа́на андрэ́ дрэ маса́.

⁹Кон исын набутитко пэ пэ́скири буты́, кодова́ исын пшал кодолэ́скэ, саво́ исын хасякирибнаскиро.

¹⁰Ра́скирэ-Дэвлэ́скирэ лав исын сыр зоралы́ вучарды́ (башня), чачуно́ ману́ш нашэла дрэ ла́тэ, и тэ́ньчи ёв исын бидаракиро.

¹¹Барвалэ́-манушэ́скиро миштыпэ́н исын лэ́скиро зорало́ фо́ро, и ёв исын сы́рбы вучи́ ва́нта дрэ лэ́скирэ-годякири паты́в.

¹²Ману́ш задэлапэ анги́л хасякирибэн, и напхутькирибэн янэ́ла паты́в.

¹³Кон отпхэнэ́ла анги́л, сыр тэ шунэ́л, кодова́ исын дылыно́ и ладж лэ́скэ.

¹⁴Манушэ́скиро ду́хо (фа́но) рикирэ́ла джидэс лэс, ке́ли ёв исын насвало́, нэ кон сашты́ (могинэ́ла) тэ ґаздэл (тэ подрикирэ́л) пхагирдо́ ду́хо (фа́но)?

¹⁵Барэ́-годя́киро ило́ дорэсэ́ла джиныбэ́н, и годэ́-манушэ́скиро кан родэ́ла джиныбэ́н.

¹⁶Манушэ́скиро тала́но кэрэ́ла дрома́ манушэ́скэ, и янэ́ла лэс анги́л барэ́ манушэ́ндэ.

¹⁷Пэрвонэстэ, кон ракирэ́ла пэ сэ́ндо, исын барипэ́н анги́л, сыр явэ́ла лэ́скиро пашатуно и зумавэла (пропатякирэла) лэс пхучибнэнца.

¹⁸Трэй тэ чхурдэ́н жре́биё, соб (кай) тэ тэрдёл (тэ пириячэл) чинга́рд, ке́ли зоралэ́ мануша́ камэ́на тэ пиризорьякирэн екх екхэ́с.

¹⁹Ко́ли ту дукхавэса (росхолякирэса) пшалэ́с, тэды исын пхарэдыр тэ рискирэс палэ лэс, сыр тэ лэл зорало́ фо́ро; и чинга́рд исын сы́рбы састы́р пэ вуда́р дрэ тхагаритко тва́рдыма (букло), савья́са пшал запхандэлапэ ту́тыр.

²⁰Манушэ́скиро кужум чалёла далэ́стыр, со ракирэ́ла лэ́скиро муй, ёв ячэ́лапэ чало пэ́скирэ уштэндыр.

²¹Дрэ чиб исын зор ваш джиибэ́н, ци ваш мэрибэ́н. Кон камэ́ла тэ ракирэ́л, одолэ́скэ трэй тэ ужакирэл ци екх, ци яви́р.

²²Кон латхя́ лачхя ромня́, кодова́ латхя́ лачхипэ́н и дорэсця́ дро́гима Ра́стыр-Дэвлэ́стыр.

²³Чороро́ ману́ш ракирэ́ла сы́рбы ёв мангэ́ла, нэ барвало́ ману́ш отпхэнэ́ла бипатывакирэс (дерзкэс).

²⁴Манушэ́скэ, савэ́стэ исын бут дру́ги (мала́), кокорэскэ трэй тэ явэ́л малытко (другитко) кэ яви́р, нэ исын мал, саво́ исын буты́р пашылэды́р ту́кэ тырэ́ пшалэстыр.