Read Baltic Romani Bible 2019 – Библия - Пэ Балтитко Романи чиб (Романэс) 2019 Притчы 23 Bible Online

Притчы 23 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Притчы 23

¹Сыр ту бэшэса тэ хас барыдырэ́са, то придыкхпэ шука́р, кон исын анги́л ту́тэ;

²и чхув чхури кэ пэ́скиро кирло, ко́ли ту сан ману́ш, саво́ исын ґа́лко кэ хабэ́н.

³На ха древа́н бут лэ́скирэ бонбоны (присмаки), пал-дова́ со ёнэ исын хохано́ хабэ́н.

⁴На кэр буты́ пир ме́ра, соб (кай) тэ явэс барвало́, нэ яв пэ ада́кицы годо́, соб (кай) тэ мэкэс дасавэ́ ду́мы:

⁵ке́ли ту рискирэса пэ́скирэ якха́ пэ дава́ — и акана́ нанэ лэс? Пал-дова́ со барвалыпэ́н кэрэ́ла пхака́ пэ́скэ и сыр о́рло (ки́до) вурняла криг кэ болыбэ́н.

⁶На ха маро́ кэ ману́ш бибахталэ́ якхаса, на яв ґа́лко (жадно) кэ лэ́скирэ бонбоны (присмаки).

⁷Пал-дова́ со ёв исын адасаво́, саво́ ёв исын дро пэ́скиро ило́. “Ха и пи”, — ёв пхэнэ́ла ту́кэ, нэ лэ́скиро ило́ нанэ ту́са.

⁸Котэ́р (куско) марэскиро, со ту хаян, ту вычхадэса, и ту нашавэса тырэ́ куч лава́.

⁹На ра́кир дрэ дылыниньконэскирэ кана́, пал-дова́ со ёв дыкхэ́ла вучипна́стыр пэ тырэ́-лавэнгиро годыпэ́н.

¹⁰На пиричхув ґаратуны шпэ́ра пэ пхув, на рэс пэ фэ́лда, кай дживэ́на бидадэнгирэ чхавэ́.

¹¹Пал-дова́ со лэ́нгиро Выракхибнаскиро [Затэрдыипнаскиро-р.с.], Рай Дэвэ́л исын зорало́, Ёв затэрдёла пал лэ́нгиро рэ́ндо пэ ту́тэ.

¹²Бандякир тыро́ ило́, ке́ли сыклякирэ́на тут, и тырэ́ кана́ кэ годьварэ́ лава́.

¹³На тангинэ (на жалин) чхавэ́с, ке́ли ту марэ́са лэс раняса, далэ́стыр ёв на мэрэ́ла:

¹⁴ту марэ́са лэс раняса и зракхэ́са лэ́скиро ди люностыр (адостыр).

¹⁵Мро чха́ва! Ко́ли тыро́ ило́ исын годо́, тэды миро ило́ явэ́ла тэ радынэ́лпэ.

¹⁶И мирэ́ букэ (нутря) явэ́на зоралэ́с тэ радынэ́нпэ, ке́ли тырэ́ ушта́ пхэнэ́на чачипэ́н.

¹⁷Мэк тыро́ ило́ тэ на зэвлынэл (тэ на завидынэл) грэхитконэ́ манушэ́нгэ, мэк тыро́ ило́ тэ ячэ́лпэ ўса́ды (сак) дрэ дар анги́л Растэ-Дэвлэ́стэ;

¹⁸пал-дова́ со исын англыпэ́н и тыро́ лачхо́ ужакирибэ́н на явэ́ла нашадо.

¹⁹Мро чха́ва! Шун, и яв годо́, и приракх пэ́скиро ило́ пэ маму́й дром.

²⁰На яв кхэтанэ́ манушэ́са, кон пьела древа́н бут мол (вино), ци кон ха́ла бут мас.

²¹Пал-дова́ со матымари (матяри) и бутэ́-хабнаскиро ману́ш (обхаячо) ячэ́на чорорэ́, и ману́ш, кон совэла бут, явэ́ла уридо́ дрэ мэлалэ патавэ.

²²Шун пэ́скирэ дадэ́с, конэ́стыр ту латхянпэ, и на дыкх вучипна́стыр пэ пэ́скирэ датэ, ке́ли ёй явэ́ла пхури.

²³Кин (дорэс) патяибэ́н, и на отдэ́ лэс никонэ́скэ; адя́кэ-паць годыпэ́н, сыклякирибэ́н и ґалыибэ́н.

²⁴Чачунэ́-манушэ́скиро дад явэ́ла древа́н тэ радынэ́лпэ, адя́кэ-паць и кодова́, конэ́стэ годо́ чхаво́ латхяпэ, явэ́ла тэ бахталёл лэ́стыр:

²⁵мэк тэ явэ́н ра́да тыро́ дад и дай, и мэк кодоя, сави́ бияндя́ тут, зоралэ́с тэ радынэ́лпэ.

²⁶Мро чха́ва! Отдэ́ ма́нгэ тыро́ ило́, и мэк тырэ́ якха́ тэ рикирэнпэ зоралэ́с (тэ придыкхэнпэ) кэ мирэ́ дрома́.

²⁷Пал-дова́ со налачхи джувлы́ исын хор ґанби́н (яма), и чу́жо джувлы́ исын вэнско ґаны́нг.

²⁸Ёй адя́кэ-паць подракхэла дорэсыбэ́н (манушэ́н) сыр розмарибнытко, и барьякирэ́ла буты́р напатяибнаскирэн машки́р манушэ́ндэ.

²⁹Конэ́стэ исын роибэ́н? Конэ́стэ исын дукх? Конэ́стэ исын кошыбэ́н? Кон исын би́да, и кон жалинэлапэ? Конэ́стэ исын даба (калэ́ маса́) ни палсо́? Конэ́стэ исын лолыпэн дрэ якха́?

³⁰Дава́ исын кодолэ́ндэ, савэ́ кэ коригуно́ (позно) уля́го (пора) исын бэштэ́ пашы́л мол и кодолэндэ, савэ́ джа́на тэ родэ́н змешындлы мол (вино).

³¹На дыкх пэ мол, сыр ёй лолёла, сыр ёй гожэс зяинэла яга́са дрэ кучык, сыр ёй локхэс чхувэ́лапэ дро кирло:

³²дро ко́нцо (дро яго́ро) ёй дандырэла тут сыр сап, и дукхавэла сыр саплын (аспидо).

³³Тырэ́ якха́ явэ́на тэ дыкхэ́н пэ явирэ джувлендэ, и тыро́ ило́ явэ́ла тэ выпхэнэл накуч лава́.

³⁴И ту явэ́са сыр кодова́, саво́ исын пашто́ машкира́л мо́рё (дэрья́в), сыр кодова́, саво́ исын пашто́ [суто́-р.с.] вучэ́с пэ мачта, и саво́ пхэнэ́ла:

³⁵И пхэнэ́са: “Ёнэ пэкадэ ман, нэ мэ на сом дукхадо, ёнэ шпулдэ (пихиндлэ) ман, и мэ на джиндём. Ке́ли мэ джангадёвава? Мэ ява́ва тэ родав усае́кх тэ выпьяв нэвэ́стыр (нэвэ́с).”