Read Baltic Romani Bible 2019 – Библия - Пэ Балтитко Романи чиб (Романэс) 2019 Притчы 28 Bible Online

Притчы 28 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Притчы 28

¹Фуй ману́ш нашэла криг, ке́ли нико́н на традэлапэ пал лэ́стэ, нэ чачуно́ ману́ш исын муршкано́ сыр шчэр (ле́во).

²Ко́ли фуй рэ́нды (де́лы) исын пэ дая́ пхув, тэды крали́скирэ барыдыра́ парувэна екх екхэ́с. Нэ годя́киро барыдыро́, савэ́стэ исын джиныбэ́н, явэ́ла тэ кралинэ́л дурэды́р.

³Чороро́ ману́ш, кон притасавэла явирэ чорорэ́ манушэ́с, исын сы́рбы зорало́ брышы́нд, со на ячкирэ́ла патря (листы) пэ кашта́ (дрэвы): [саво́ зморэла маро́ пэ фэ́лда-р.с.].

⁴Одолэ́, савэ́ мэкэ́на Дэвлэ́скиро Зако́но, шарэна фуе́ манушэ́н, нэ кодолэ́, савэ́ рикирэнапэ кэ Зако́но, исын проти лэ́ндэ.

⁵Бибахталэ́ мануша́ на ґалёна чачипэ́н; нэ одолэ́, савэ́ родэ́на Рас-Дэвлэ́с, ґалёна саро́.

⁶Фэды́р исын чороро́ ману́ш, кон кэрэ́ла саро́ лачхэ́с, сыр екх ману́ш, кон кэрэ́ла фуипэ́н пэфроми (нарочнэс), мэк ёв и тэ явэ́л барвало́.

⁷Кон рикирэ́лапэ кэ Зако́но, кодова́ исын годьваро́ чхаво́, нэ кон исын чхучэ́-шэрэскиро ману́ш, одова́ ладжакирэла пэ́скирэ дадэ́с.

⁸Кон прибарьякирэла пэ́скиро миштыпэ́н начачунэ кофоса (ростоса) и хохаибнаса, кодова́ сы́рбы кэдэла ловэ́ кодолэ́скэ, саво́ явэ́ла тэ тангинэ́л чорорэн.

⁹Кодолэстэ, кон рискирэ́ла криг пэ́скиро кан, соб (кай) тэ шунэ́л Зако́но, адасавэстэ аж и лэ́скиро мангипэ́н Дэвлэ́скэ исын джунгало́ (брыдко).

¹⁰Кон кэрэ́ла адя́кэ, со дэвлы́тка джа́на дрэ риг пэ бибахтало́ дром, кодова́ кокоро́ пэрэ́ла дрэ ґанби́н (яма), со ёв выґанадя, а бидошэнгирэ мануша́ дорэсэ́на лачхипэ́н дро миштыпэ́н.

¹¹Барвало́ думинэ́ла пэ́скэ, со ёв исын годо́, нэ годьваро́ чороро́ ману́ш розґалёла лэс.

¹²Ке́ли чачунэ́ мануша́ зоралэ́с радынэ́напэ, тэды сы́рбы баро́ свэ́нко исын. Ке́ли фуй мануша́ ґаздэ́напэ, то мануша́ гарадёна.

¹³Кон гаравэла пэ́скирэ грэ́хи, одолэ́скэ на явэ́ла мишто́, нэ кон приджинэла грэ́хи и мэкэ́ла тэ кэрэ́л лэн, кодолэ́с Дэвэ́л тангинэла.

¹⁴Бахтало́ исын ману́ш, кон усады (сак) патыва́са дарэ́ла Дэвлэ́стыр, нэ кон пхарьякирэла пэ́скиро ило́, кодова́ пэрэ́ла дрэ бари би́да.

¹⁵Сыр шчэр (ле́во), саво́ рыкинэла, и сыр рич, саво́ исын холынакиро, исын фуй барыдыро́, саво́ хулаинэла пэ чорэ́ манушэ́ндэ.

¹⁶Тхэмэскиро барыдыро́, кон исын на годьваро́, притасавэла пэ́скирэ манушэ́н: нэ кон на вырикирэ́ла ґалкима (жадныма) кэ ловэ́, одова́ явэ́ла ґара́ (длу́гэс) тэ дживэ́л.

¹⁷Ману́ш, кон прочхудя явирэ-манушэ́скиро рат, исын банго́, ёв явэ́ла тэ нашэ́л кэ ґанби́н: и нико́н на ячэ́лапэ пашы́л лэ́стэ.

¹⁸Кон дживэ́ла би дошакиро, кодова́ явэ́ла зракхно, нэ кон псирэ́ла чорэ́ дромэ́нца пэфроми, кодова́ пэрэ́ла пэ екх лэ́ндыр.

¹⁹Кон кэрэ́ла буты́ пэ пэ́скири пхув, одова́ явэ́ла чало марэ́са; нэ кон джа́ла пал локхэ-годякирэ манушэ́ндэ, кодова́ явэ́ла древа́н чороро́.

²⁰Патяибны́тко ману́ш исын барвало́ бахтякирибнаса, нэ кон камэ́ла сы́гэс тэ розбарвалёл (тэ явэ́л барвало́), одова́ на уджала каратыр.

²¹Дава́ исын намишто тэ явэс пэ вари-конэ́скири риг, пал-дова́ со и пал котэ́р маро́ адасаво́ ману́ш кэрэ́ла чорипэ́н.

²²Ману́ш бибахталэ́ мысляса камэ́ла сы́гэс тэ розбарвалёл, и ёв на джинэ́ла, со чорипэ́н пэрэ́ла пэ лэ́стэ.

²³Кон сыкавэ́ла банг явирэ манушэ́скэ, кодова́ латхэ́ла буты́р ла́ска парикирибнаса, сыр кодова́ ману́ш, кон шарэла явирэ манушэ́с на илэ́стыр.

²⁴Кон чорэла дадэ́стыр ци датыр и ракирэ́ла: “Дава́ нанэ грэ́хо”, кадасаво́ ману́ш исын дро́го дру́го (мал) кодолэ́скэ, саво́ хасякирэ́ла саро́.

²⁵Пхутькирдэ́-илэ́скиро ману́ш выкхарэла кошыбэ́н, нэ кон зоралэ́с патя́ла дрэ Растэ-Дэвлэ́стэ, кодолэ́скэ явэ́ла миштыпэ́н.

²⁶Кон зоралэ́с патя́ла пэ́скирэ илэскэ, кодова́ исын дылыно́, нэ кон годэс дживэ́ла, кодова́ явэ́ла зракхно.

²⁷Кон дэ́ла чорорэскэ, кодолэстэ на явэ́ла наухтылыбэн/на явэ́ла на́доси (кодова́ на чорьёла), нэ кон закэрэла лэ́скирэ якха́, пэ кодолэстэ явэ́на бут прокошыбэна.

²⁸Ке́ли фуй мануша́ ґаздэ́напэ, тэды мануша́ кокорэ́ гарадёна, а ке́ли ёнэ хасёна, тэды чачунэ́ мануша́ ячэ́на буты́р.