Read Baltic Romani Bible 2019 – Библия - Пэ Балтитко Романи чиб (Романэс) 2019 Притчы 3 Bible Online

Притчы 3 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Притчы 3

¹Миро чхава! На бистыр, сыр мэ сыклякирава тут, мэк тыро́ ило́ тэ ракхэ́л (тэ рикирэлпэ) кэ мирэ́ припхэныбэна́,

²пал-дова́ со буты́р дывэса́ тэ дживэ́с, длэнго джиибэ́н и рама́нё (миро) явэ́на упралэстыр дынэ́ ту́кэ.

³Мэк тэ на мэкэ́н тут лачхэ́-илы́ткима и чачипэ́н; пхандэ лэн трусця́л мэн, зачхин лэн пэ тыро́ ило́ сы́рбы пэ таблицы тырэ́ илэ́скирэ;

⁴и ту явэ́са дро́го и дрэ бари паты́в Дэвлэ́стэ и манушэ́ндэ.

⁵Патя зоралэ́с дрэ Растэ-Дэвлэ́стэ сарэ́ тырэ́ илэ́стыр, на древа́н допатя пэ́скирэ годыпнаскэ.

⁶Ри́пир пал Растэ-Дэвлэ́стэ, соб (кай) ту тэ на кэрэсас, и Ёв мамуякирэла (кэрэ́ла прямонэса) тыро́ дром.

⁷На сыка́в пэс годэдыр, сыр ту сан: дар Ра́стыр-Дэвлэ́стыр и дурьёв чорипна́стыр.

⁸Дава́ явэ́ла састыпэн тырэ́ масэнгэ лочакэ и драб тырэ́ кокалэнгэ.

⁹Дэ паты́в Ра́скэ-Дэвлэ́скэ сарэ́ тырэ́ миштыпна́стыр, и пэрвонэ́ барьякирдэндыр (плодэндыр), со ту́тэ выбарьёна;

¹⁰и тырэ́ шурны явэ́на пхэрдэ́ пхэрдэ́с и тырэ́ пресы явэ́на тэ пиричхувэнпэ моляса (виноса).

¹¹Ми́ро чхава! На дыкх вучипна́стыр, ке́ли Рай Дэвэ́л пхарэ́с сыклякирэ́ла тут, адя́кэ-паць и на холясов зоралэ́с, сыр Ёв сыклякирэ́ла дукханэс пал доша:

¹²пал-дова́ со Рай Дэвэ́л сыклякирэ́ла дукханэс пал доша (промэкибэна) кодолэ́с, кон исын дро́го Лэ́скэ, адя́кэ-паць сы́рбы дад чхавэ́с, савэ́скэ Ёв зоралэ́с радынэ́лапэ.

¹³Бахтало́ исын кодова́ ману́ш, саво́ яця́ годо́, и ману́ш, кон яця́ бут тэ ґалёл.

¹⁴Дава́ исын фэдэды́р сыр тэ дорэсэс руп, дава́ исын кофиткэдыр (прибыльнэдыр) сувнака́стыр.

¹⁵Годыпэ́н исын дрогэдыр куч барэндыр, и сарэ́ кучипэна, со ту кэ исын дро́га, нанэ ра́вна (шэра́) годыпнаскэ.

¹⁶Годыпэ́н рикирэ́ла длэнга бэрша́ дро чачо́ васт, а барвалыпэ́н и паты́в исын дро лэ́скиро зэ́рво (ле́во) васт.

¹⁷Годыпнаскирэ дрома́ исын лачхэ́, а лэ́нгирэ дрома́ дэ́на рама́нё (миро) ту́кэ.

¹⁸Годыпэ́н исын сы́рбы джиибна́скири пхабэлын кодолэ́скэ, кон ха́ла лэ́скирэ пхаба́: бахтало́ исын кодова́ ману́ш, саво́ рикирэ́лапэ кэ дава́ кашт.

¹⁹Рай Дэвэ́л Пэ́скирэ годыпнаса создыя́ пхув, Ёв Пэ́скирэ ґалыибнаса создыя́ болыбэ́н.

²⁰Лэ́скирэ джиныбнастыр хор ґанынга́ откэрдэпэ и болыбэ́н почхудя пахлыняса (росаса).

²¹Ми́ро чхаво́! На мэк лэн, соб (кай) тэ джа́н криг тырэ́ якхэ́ндыр: ракх састо́ годыпэ́н и хор розлыибэн:

²²и ёнэ дэ́на джиибэ́н ту́кэ, и ёнэ явэ́на тэ гожакирэн тыри́ мэн.

²³Тэды ту джа́са пэ́скирэ дромэ́са бидаракиро, и тыри́ ґэро́й на обштавэлапэ.

²⁴Сыр ту пасёса тэ совэс, ту на явэ́са тэ дарэс, сыр ту засовэса, тыро́ соибэн явэ́ла гудло́.

²⁵На дар трашаибнастыр кэ мэрибэ́н, ци пхарипнастыр, со явэ́ла пэ фуе́ манушэ́ндэ.

²⁶Пал-дова́ со дрэ Растэ-Дэвлэ́стэ явэ́ла тыро́ зорало́ патяибэ́н, и Ёв явэ́ла тэ ракхэ́л тыри́ ґэро́й тэ на обштавэлпэ.

²⁷На дэпэ палэ тэ кэрэ́с лачхипэ́н кодолэ́нгэ, савэ́нгэ трэй тэ кэрэ́с, ко́ли дава́ исын пир зор тырэ́ вастэскэ.

²⁸На пхэн тырэ́ пашатунэ́ манушэ́скэ: “Джа́, тэ́ньчи, рисёв палэ. Атася́ мэ да́ва ту́кэ, ко́ли ту́тэ исын дава́.”

²⁹На придумин чорипэ́н пэ тырэ́ пашатунэстэ, пал-дова́ со ёв дживэ́ла би дара́киро пашы́л ту́тэ.

³⁰На кошпэ манушэ́са ни палсо́, ко́ли ёв на кэрдя́ чорипэ́н (бэдыпэн) ту́кэ.

³¹На зэвлынэ нахратонэ манушэ́скэ, на выкэдэ пэ́скэ вари-со лэ́скирэ дромэ́стыр.

³²Пал-дова́ со ману́ш, кон джал криг чачунэ́ дромэ́стыр, явэ́ла джунгало́ (брыдинэла) Ра́скэ-Дэвлэ́скэ, а лэ́скиро гарадо́ кхэтаныпэн исын чачунэ́ манушэ́нца.

³³Рай Дэвэ́л прокошэла кхэр, кай исын фуй ману́ш, нэ Ёв бахтякирэ́ла штэ́то, кай чачипна́скиро ману́ш дживэ́ла.

³⁴Ёв салапэ холямэс одолэ́ндыр, кон салапэ холямэс явирэндыр, нэ Ёв дэ́ла бахталыпэ́н одолэ́нгэ, савэ́ исын на пхутькирдэ́.

³⁵Годэ́ мануша́ дорэсэ́на (долэна) сла́ва сыр миштыпэ́н, нэ ладж явэ́ла тэ учхакирэл дылынэн.