Read Baltic Romani Bible 2019 – Библия - Пэ Балтитко Романи чиб (Романэс) 2019 Притчы 30 Bible Online

Притчы 30 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Притчы 30

¹Агуроскирэ годыпнытка лава́, Иакеёскирэ [Якеяскирэ-ю.о.] чхавэ́скирэ, савэ́ пхэндя́ адава́ ману́ш Ифиилоскэ, Ифиилоскэ и Укалоскэ.

²Чачо́, мэ сом бутэды́р набарэ́-годя́киро ману́ш, сыр сарэ́ бура мануша́ (невежды), и мэ на сом годьваро́ ману́ш.

³Мэ на высыклыём годыпнаскэ, и ма́ндэ нанэ джиныбэ́н, сыр свэнтонэндэ.

⁴Кон ґаздыя́пэ пэ болыбэ́н и гия́ тэлэ́? Кон скэдыя́ балва́л дрэ Пэ́скирэ бурныка (жмени)? Кон учхакирдя́ паня́ идяса? Кон зачхудя пхувья́кирэ яго́ры (краи́)? Саво́ исын Лэ́скиро лав; и саво́ исын Лэ́скирэ-Чхавэ́скиро лав, ко́ли ту джинэ́са?

⁵Кажно Дэвлэ́скиро лав исын жужо́: ёв исын шчы́то одолэ́нгэ, кон рисёла кэ Ёв тэ зракхэлпэ.

⁶На причху́в буты́р кэ лэ́скирэ лава́, соб (кай) Ёв тэ на бангякирэл тут, соб (кай) ту тэ на явэс хохано́.

⁷Пал дуй чачипэна́ мэ мангавас тут, на отпхэнпэ анги́л ма́ндэ анги́л, сыр мэ мэра́ва:

⁸лэ криг ма́ндыр фрэнта лава́ и хохаибэ́н, на дэ ма́нгэ ни чорипэ́н, ни барвалыпэ́н, чалякир ман марэ́са, со трэй ма́нгэ пэ кажно (сва́ко) дывэ́с:

⁹соб (кай) мэ тэ на явав древа́н чало, и тэ на отпхэнавпэ Ту́тыр, и тэ на пхэна́в: “Кон исын Рай Дэвэ́л?” Ци, соб (кай) мэ тэ на явав чороро́ и тэ на чорав, соб (кай) мэ тэ на пропатякирав мирэ́-Дэвлэ́скиро лав.

¹⁰На калякир лавэ́са дынари́с анги́л лэ́скирэ растэ, соб (кай) ёв тэ на прокошэл тут, и соб (кай) ту тэ на явэс банго́.

¹¹Исын ро́до, саво́ прокошэла дадэ́с, и на шарэла пэ́скирэ да.

¹²Исын ро́до, саво́ исын жужо́ анги́л пэ́скирэ якха́, нэ ёв исын на мордо пэ́скирэ мэлятыр.

¹³Исын ро́до, кай ла́кирэ манушэ́ндэ, исын пхутькирдэ́ якха́. Сыр вучэ́с ґаздэ́напэ лэ́нгирэ цымблы (ресницы)?

¹⁴Исын ро́до, дрэ саво́ манушэ́ндэ данда́ исын сыр курта́ла, и конэскирэ жанды исын сыр чхурья и скэдынэ́ тэ похан сарэ́са чорорэн пэ пхув и богэн машки́р манушэ́ндэ.

¹⁵Ратпибнаскирэстэ (пиявкатэ) [дро началыпэн-р.с.] исын дуй чхая́, савэ́ дэ́на го́дла: ‘Дэ! Дэ!’ Исын трин чачипэна́, савэ́ ние́кхвар нанэ чалэ. Исын штар вешчы, со ние́кхвар на пхэнэ́на: ‘Ухты́лла (до́си).’

¹⁶Дава́ исын: маґила (кула), и бибиятэнгири джувлы́; пхув, сави́ нанэ чалы пане́стыр, и яг, сави́ тэ пхэнэ́л: ‘Ухты́лла.’”

¹⁷Манушэ́стэ, кон просала дадэ́с, и кон салапэ холямэс, соб (кай) тэ на кандэл пэ́скирэ да, то лэ́скэ кораки, со исын пэ до́ло, выхана лэ́скирэ якха́, и тэрнэ́ орлы (кидорэ) схана лэн сарэ́са.

¹⁸Исын трин чачипэна́, со исын древа́н ди́вна ваш ма́нгэ, и исын штар чачипэна́, со мэ на ґалёвава:

¹⁹сыр о́рло (ки́до) вурняла пир болыбэ́н; сыр сап кхарэ́лапэ (двигинэлапэ) пир бэ́рга, сыр па́рма (кораблё) кхарэ́лапэ (плывинэла) пир мо́рё (дэрья́в), сыр мурш кэрэ́ла дром кэ патывалы́ чхай.

²⁰Акэ, сыр налачхи джувлы́ кэрэ́ла: ёй ха́ла, и кхосэла пэ́скиро муй, и ёй ракирэ́ла: “Мэ на кэрдём ни саво́ фуипэ́н.”

²¹Исын трин чачипэна́, со лэ́ндыр пхув издрала, и штар чачипэна́, со ёй нашты́ тэ вырикирэл (тэ пирилыджал):

²²ко́ли писха́ри лэ́ла тэ кралинэ́л, и ке́ли дылыно́ исын чало марэ́са;

²³ко́ли бипатывакири джувлы́ джа́ла пало́ ром, и ко́ли дына́рица (служанка) лэ́ла ла́кирэ-ранякиро штэ́то.

²⁴А́кэ, штар тыкнэ́ джидалэ, нэ ёнэ исын древа́н годэ́:

²⁵кирья (мурашки), ёнэ исын назоралэ; нэ ёнэ лынаскиро кэдэна хабэ́н пэ́скэ;

²⁶бэргитка кармуса (мышы), савэ́ исын набарэ́-зорьякирэ, нэ ёнэ кэрэ́на пэ́скэ кхэра́ пэ скалы.

²⁷Скочкэндэ (саранчатэ) нанэ кра́ли, нэ ёнэ джа́на анги́л сарэ́ пир линия.

²⁸Мизгирё (пауко), сава джинэ́ла тэ ухтылэлпэ пэ́скирэ лапкэнца, нэ ёв явэ́ла дрэ крали́скирэ фэлатиня́.

²⁹Исын трин джидалэ, савэ́ штавэна райканэс, и штар, савэ́ пир линия джа́на анги́л:

³⁰шчэр, саво́ исын най (са́мо) зоралэды́р машки́р сарэ́ мурдалэ́ндэ, и саво́ на рисёла криг ни конэ́стыр;

³¹грай, и бузно (козло), и кра́ли, проти конэ́стэ ние́кх нашты́ (на могинэ́ла) тэ ґаздэлпэ.

³²Ко́ли ту бигодякирэс шардян пэс кэ вучипэ́н, ци придуминдян биба́хт, чхув пэ́скиро васт пэ муй.

³³Кон змарэла тхуд, кодова́ кэрэ́ла ксил, ци кон тасавэла накх, кодова́ ратвалякирэла накх; и адя́кэ-паць кон ґаздэ́ла холын, кодова́ залыджала кошыбэ́н.