Read Baltic Romani Bible 2019 – Библия - Пэ Балтитко Романи чиб (Романэс) 2019 Притчы 5 Bible Online

Притчы 5 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Притчы 5

¹Ми́ро чха́ва! Рикир ило́ кэ миро годыпэ́н и бандькир кан кэ дова́ (пришунпэ кэ миро лава́), сыр мэ ґалёвава,

²соб (кай) ту могинэ́са хор тэ розлэс, соб (кай) тырэ́ ушта́ тэ зракхэн (тэ рикирэнпэ) кэ джиныбэ́н.

³Пал-дова́ со чужонэ́-ромнякирэ ушта́ обчхувэнапэ авгинэса и ла́кирэ лава́ исын ковлэдыр оливитконэ дзэтэстыр (алеёстыр),

⁴нэ пэ ко́нцо (пэ яго́ро) ёй исын киркэдыр палыностыр и востро сыр дуе-ригитко курта́ла (сабля).

⁵Ла́кирэ пирэ́ (сто́пы) лыджа́на кэ мэрибэ́н, ёй штавэла анги́л кэ лю́но (адо).

⁶Соб (кай) тэ ґалёс миштэ́с ла́кирэ джиибна́скирэ дрома́, ту ние́кхвар на уджинэнас лэн, ёнэ на чачунэ́ (стала).

⁷Акана́ шунэ́н ман, чхавэ́, на джа́н криг мирэ́ москирэ лавэ́ндыр.

⁸Дурьён криг дасавэ́ джувлятыр, на джа́н пашы́л вуда́р ла́кирэ кхэрэ́скиро.

⁹Соб (кай) тыри́ паты́в (тыро́ састыпэн) тэ на пириджал пэ явирэндэ, и тырэ́ бэрша́ биилэскирэ манушэ́скэ.

¹⁰И соб (кай) явирэ-тхэмэ́скирэ мануша́ тэ на пхэрдён тырэ́ миштыпнаса, и тырэ́ бутярнэ́ тэ на джа́н дро кхэр кэ чу́жо ману́ш.

¹¹И ту явэ́са зоралэ́с тэ тугинэс пэ ко́нцо (пэ яго́ро), сыр тыри́ лоч и тырэ́ маса́ ячэ́напэ шукэ́ (бизорья́кирэ)

¹²и ту пхэнэ́са: “Сыр дава́ сыс, со мэ бидыкцём сыклякирибэ́н (миро ило́ на камдя́), ке́ли сыклякирдэ́ ман чачипнаскэ!”

¹³Сыр мэ на кандыём мирэ́ сыклякирибнаскирэн, на причхудём кан кэ одолэ́ сыклякирибнаскирэ, савэ́ сыклякирдэ́ ман чачипнаскэ!

¹⁴Мэ со́мас пэ са́мо ко́нцо (яго́ро), сыр кэрдём фуипэ́н машки́р дэвлытконэндэ, кай ёнэ скэдэнаспэ.

¹⁵Пи пани́ пэ́скирэ вэндэрьятыр (водоёмостыр), и пани́, саво́ тхадэ́ла тырэ́ ґанынгатыр.

¹⁶Ци исын бангэ́ тырэ́ фолахара (фонтаны) тэ чхувэ́н яври́ пани́? Ци исын бангэ́-паненгирэ валны (вэлны) тэ тхадэн яври́ пир вули́цы (пир га́сы)?

¹⁷Мэк ёнэ тэ явэ́н екхджинэскирэ тырэ́, мэк ёнэ тэ на явэ́н кхэтанэ́ чужонэскэ и ту́кэ.

¹⁸Мэк тыри́ ґаны́нг тэ явэ́л бахтякирды и ра́дынпэ древа́н ромня́са, сави́ исын жужы тырэ́ тэрныпнастыр,

¹⁹сави́ исын сы́рбы дро́го мирга (лань) и шука́р ґазэль, савьякирэ гожа маса́ тэ радынэн чалэ́с тут усады (сак), сави́ гудлякирэла тыро́ камибэн.

²⁰Ваш со ту́кэ, миро чхаво́, тэ гудлякирэспэ чужонэ́ джувля́са и тэ облэс чу́жа маса́?

²¹Рай Дэвэ́л дыкхэ́ла манушэ́скирэ дрома́, и Ёв ублавэла дрэ годы́ (важынэла) сарэ́ лэ́скирэ дроморэ.

²²Фуй ману́ш кокоро́ хасёла пэ́скирэ чорипна́стыр, а лэ́скиро грэ́хо сы́рбы шэлэнца пхандэла лэс кокорэс.

²³Ёв мэрэ́ла, пал-дова́ со лэ́скэ на упхэндлэ, ёв джа́ла криг дромэ́стыр пир пэ́скиро баро́ дылныпэ́н.