Read Baltic Romani Bible 2019 – Библия - Пэ Балтитко Романи чиб (Романэс) 2019 Эклес 12 Bible Online

Эклес 12 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Эклес 12

¹И ри́пир тырэ́ Создыибнаскирэс дрэ тырэ́ тэрныпнаскирэ дывэса́ анги́л дова́, сыр явэ́на пхарэ́ дывэса́ кэ пхурипэн, и сыр явэ́на дасавэ́ бэрша́, со ту пхэнэ́са пал лэ́ндэ: “Ма́ндэ нанэ лош (весёлыма) лэ́ндыр.”

²Анги́л дава́, сыр кхам и дуд, чхон и чэргэня́ ячэ́на цямлэ, и анги́л дава́, сыр о́блоки рисёна палэ брышындэстыр;

³анги́л дывэса́, сыр кхэри́тко ракхибнаскиро явэ́ла тэ издрал, и сыр зоралэ́ мурша́ явэ́на тэ кэрэ́н тэлэ́ шэрэнца; анги́л, сыр сявитка (мельницытка) бара́ тэрдёна дрэ буты́ пал дова́, со ёнэ явэ́на куты́ мануша́, и сыр мануша́, кон дыкхэ́на пир далэ́ дудаля (ставни), явэ́на сы́рбы дрэ мигла (мрако) тэ дыкхэ́н;

⁴анги́л дова́, сыр и вудара́ запхандэна пэ вули́ца (пэ га́са), ке́ли сявитконэскири (пхуртэскири) буты́ на явэ́ла шундлы; и ке́ли ёнэ явэ́на тэ уштэ́н чириклякирэ багаибнастыр, и ке́ли сарэ́ багаибнытка чхая́ явэ́на штыл.

⁵И адалэ́ мануша́ адя́кэ-паць явэ́на тэ дарэ́н вучипна́стыр, и ёнэ явэ́на тэ страхандён тэ джа́н пир дром, и лэ́нгирэ бала́ явэ́на парнэ́ адя́кэ, сыр миндалитко кашт лулудёла (цвэцинэла), и сыр скочко (грасторо) на явэ́ла дрэ ра́дыма, и сыр паты́в хасёла сы́рбы каперсытко кашт шутёла; пал-дова́ со мануша́ явэ́на тэ джа́н кэ лэ́нгиро ве́чно кхэр, и тэ́ньчи лэ́нгирэ ровибнаскирэ явэ́на тэ псирэ́н пир га́сы (пир вули́цы).

⁶[Ри́пир тырэ́ Создыибнаскирэс-ю.о.], анги́л дова́, сыр рупуно шэло кошэлапэ, ци сыр сувнакуно́ чаро́ пхадёла, ци сыр кхоро́ пхарадёла пашы́л фолахар (фонтано), ци сыр рота пхадёла пашы́л ґаны́нг;

⁷и рисёла пра́хо дрэ пхув, кай сыс ёв, а ду́хо (фа́но) рисёла кэ Дэвэ́л, Кон дыя́ лэс манушэ́скэ.

⁸Харныпэ́н харныпнастыр”, — пхэндя́ Сыклякирибна́скиро пал Дэвлэ́стэ. “Саро́ исын харныпэ́н.”

⁹И кэ дова́, со Сыклякирибна́скиро пал Дэвлэ́стэ сыс годо́, ёв усае́кх сыклякирдя́ манушэ́н джиныбнаскэ, и ёв роздыкхэлас кучэс, и родыя, и ёв чхувэлас екх пал екх сыр трэй притчы.

¹⁰Сыклякирибна́скиро пал Дэвлэ́стэ родыя тэ латхэл гожа лава́ и тэ зачхинэл пир чачипэ́н патяибнытка лава́.

¹¹Годэ́-манушэ́нгирэ лава́ исын сы́рбы сувья [пхусадытка бустя́/стре́лы-ю.о.], а лэ́нгирэ притчы исын сы́рбы гвозди (карфина), со хор замарнапэ: ёнэ исын сарэ́ екхэ чхупнаристыр

¹²И ишчо (инкэ́): приракхпэ екхэстыр, ми́ро чха́ва: джинэ́са, нанэ ко́нцо (яго́ро) манушэ́ндыр тэ чхинэн лылваря, и ко́ли ту древа́н бут явэ́са тэ сыклёс, тэды ту кхинякирэса пэ́скирэ маса́.

¹³Явэ́н, вышунаса кэ ко́нцо (кэ яго́ро) чачипэ́н пал саро́ дава́: “Дар Дэвлэ́стыр и ри́кирпэ кэ Лэ́скирэ припхэныбэна́; пал-дова́ со дрэ далэ́ дуй чачипэна́ исын саро́, со трэй манушэ́скэ.

¹⁴Палдова́ со Дэвэ́л янэ́ла кажно буты́ тэ сэндякирэ́л, и кхэтанэ́ кажнонэ́ гарадэ́ кэрибнаса, ци ёв тэ явэ́л лачхо́, ци ёв тэ явэ́л бибахтало́.