Read Baltic Romani Bible 2019 – Библия - Пэ Балтитко Романи чиб (Романэс) 2019 Эклес 4 Bible Online

Эклес 4 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Эклес 4

¹И мэ рисиём и дыкхцём, сыр притасавэ́на манушэ́н, и дава́ кэрэ́лапэ тэл кхам: и дыкх! Манушэ́нгирэ ясва, конэ́с притасавэ́на, нэ лэ́ндэ нанэ нико́н тэ подрикирэ́л лэ́нгиро ду́хо (фа́но), нэ пэ кадалэнгири риг, кон притасавэла сыс зор, нэ лэ́ндэ нанэ нико́н тэ подрикирэ́л лэ́нгиро ду́хо (фа́но).

²Палдава́ мэ шардём мулэн, савэ́ ужэ мынэ́, буты́р далэндыр, савэ́ исын джидэ́.

³Нэ, чачэс, фэды́р, кадалэ́ дуендыр исын кодова́ ману́ш, кон ишчо (инкэ́) на сыс пэ свэ́то (лот), кон на дыкхця́ бибахталы буты́, со кэрэ́лапэ тэл кхам.

⁴И мэ дыкхцём, со пал кажно пхари́ буты́ и кажно рангири буты́, ману́ш зэвлынэла явирэ манушэ́скэ. Дава́ исын адя́кэ-паць харныпэ́н и сы́рбы тэ традэспэ пал балва́л.

⁵Дылынинько исын бэшто́, счхуви васта́ кхэтанэ́ и ха́ла кокоро́ пэс.

⁶Дава́ исын фэды́р тэ дорэсэс бурнык (пригоршня) раманёса (миро́са), сыр пхэрдэ́ дуй васта́ намилэ пхарэ́ бутя́тыр и традыпнаса пал балва́л.

⁷И мэ рисиём и дыкхцём харныпэ́н тэл кхам.

⁸Исын екхджино́ ману́ш и лэ́стэ ние́кх нанэ тэ явэ́л пашы́л лэ́стэ; лэ́стэ нанэ ни пшал, ни чхаво́: нэ нанэ ко́нцо (яго́ро) лэ́скирэ пхарэ́ бутякэ и лэ́скирэ якха́ нанэ чалэ барвалыпнастыр и пхучэла ёв: “Ваш конэ́скэ мэ кэра́ва буты́ пхарэ́с и отпхэнава пэ́скэ лачхипнастыр.” Дава́ исын адя́кэ-паць харныпэ́н и буты́, со пхарьякирэла ило́.

⁹Дуенгэ исын фэды́р, сыр екхэ́скэ: пал-дова́ со лэ́нгэ явэ́ла лачхи́ мазу́ри (награда) пал лэ́нгири кхэтаны́ буты́:

¹⁰ко́ли екх дуендыр пэрэ́ла, тэды яви́р ΄газдэла пэ́скирэ дрогонэ́ малэс. Нэ би́да явэ́ла одолэ́скэ, кон исын екхджино́: ке́ли ёв пэрэ́ла, лэ́стэ нанэ яви́р ману́ш тэ под ΄газдэл ґодлэл лэс.

¹¹Адя́кэ-паць, ко́ли дуйджинэ́ пасёна кхэтанэ́, тэды ёнэ татёна екх екхэстыр, и сыр екхджино́ могинэ́ла тэ татёл?

¹²Нэ ко́ли ману́ш сашты́ тэ пиризорьякирэн екхджинэс явирэ́с, тэды дуйджинэ́ сашты́ тэ отмарэнпэ, и тринэ́ — тхавэнгиро шэло насыг и кошэлапэ.

¹³Чороро́ и годо́ тэрно́ ману́ш исын фэды́р пхурэстыр, нэ дылынинько исын кра́ли, савэ́с нашты́ буты́р тэ сыклякирэс тэ приракхэлпэ.

¹⁴Пал-дова́ со дава́ тэрно́ ману́ш сашты́ тэ явэ́л кадасаво́, кон гия́ яври́ бэшыбнастыр пэ кралипэ́н, мэк ёв и тэ бияндёл чороро́ дро пэ́скиро кралипэ́н.

¹⁵Мэ дыкхцём, сыр сарэ́ джидэ́, кон исын тэл кхам, сыс пал явирэ манушэ́стэ, саво́ тэрдия́ пэ лэ́скиро штэ́то.

¹⁶Нанэ ко́нцо (яго́ро) манушэ́нгэ, анги́л конэ́стэ ёв яця́ крали́са, нэ одолэ́, кон явдя́ коригэды́р (позжэды́р), на явэ́на зоралэ́с тэ радынэ́напэ лэ́стыр. Пал-дова́ со саро́ дава́ исын харныпэ́н и сы́рбы тэ традэспэ пал балва́л.

¹⁷[Дыкх кучэс пал ґэро́й, ке́ли ту джа́са андрэ́ дро Дэвлэ́скиро Кхэр, и ри́скир кан буты́р тэ шунэ́с, со ракирэ́на, сыр тэ дэс свэ́нта яныбэна́, и дылынинька кэрэ́на дова́-паць: пал-дова́ со ёнэ на джинэ́на, со ёнэ кэрэ́на биба́хт.-р.с.]