Read Baltic Romani Bible 2019 – Библия - Пэ Балтитко Романи чиб (Романэс) 2019 Эклес 5 Bible Online

Эклес 5 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Эклес 5

¹[2-ю.о.] На яв сы́гно тэ пхэнэ́с пэ́скирэ мо́са, и мэк тыро́ ило́ тэ на выпхэнэл сы́гно лав анги́л Дэвлэ́стэ: пал-дова́ со Дэвэ́л исын пэ болыбэ́н, нэ ту сан пэ пхув, палдава́ на ра́кир бут.

²[3] Палдова́ со ману́ш дыкхэ́ла сунэ́, ке́ли лэ́стэ исын бут рэ́нды, и дылыниньконэскири зан пинджкирэса (уджинэса) пир бут лава́.

³[4] Ке́ли ту совлахаса Дэвлэ́скэ, на тырдэ тэ кэрэ́с пир совла́х, пал-дова́, со Лэ́скэ исын на дро́га дылынинька: кэр, сыр ту дыя́н совла́х.

⁴[5] Исын фэды́р тэ на совлахас, сыр тэ совлахас, и тэ на кэрэ́с пир совла́х.

⁵[6] На домэк, соб (кай) тырэ́ ушта́ тэ лыджа́н лоч (плоть) тэ кэрэ́л грэ́хо, ци, соб (кай) тэды тэ пхэнэ́с Дэвлэ́скирэ Янголоскэ [бичхаибнаскирэскэ-ю.о.]: “Дро дава́ мэ дыёмпэ дукха́.” Ваш со дава́ трэй, соб (кай) Дэвэ́л тэ холясол пэ тыри́ зан, и, соб (кай) тэ хасякирэ́л тырэ́-вастэнгири буты́?

⁶[7] Пал-дова́ со одо́й, кай бут сунэ́ дыкхэ́на, одо́й и бут лава́ ракирэ́на, нэ саро́ дава́ исын харныпэ́н. Нэ ту дар Дэвлэ́стыр.

⁷[8] Ко́ли ту дыкхэ́са, сыр притасавэ́на чорорэс пэ пхув, и нахратэс рискирэна Зако́но и чачипэ́н дрэ мижэх риг, тэды на дивинпэ пэ дава́, пал-дова́ со вучэды́р барыдыро́ дыкхэ́ла пал вучэ́ барыдырэндэ, и ишчо (инкэ́) вучэды́р барыдыра́ исын пэ лэ́ндэ.

⁸[9] И ко́фо (льґота) пхувья́тыр исын ваш сарэ́нгэ, и кра́ли кокоро́ джидёла фэлдатыр.

⁹[10] Конэ́скэ пир ило́ исын руп, одова́ на явэ́ла чало рупэ́стыр, ци, конэ́скэ пир ило́ баро́ барвалыпэ́н, кодолэстэ на явэ́ла ада́кицы, кицы́ лэ́скэ трэй. Саро́ дава́ адя́кэ-паць исын харныпэ́н.

¹⁰[11] Сыр барьёла миштыпэ́н, явэ́ла бутэды́р мануша́, кон чаравэлапэ лэ́стыр, и, саво́ ко́фо исын одолэ́нгэ, конэ́скиро исын дава́ миштыпэ́н, сыр екх фэ́ни тэ дыкхэ́н пэ лэ́стэ?

¹¹[12] Бутярно исын суто́ гудлэс, ци ёв ха́ла бут, ци на́бут (куты́): нэ баро́ барвалыпэ́н на дэ́ла тэ совэ́л лэ́скэ.

¹²[13] Исын пхари́ биба́хт, со мэ дыкхцём тэл кхам: барвалыпэ́н, со ману́ш приракхэла пэ́скэ, дукхавэла лэс,

¹³[14] ци дава́ барвалыпэ́н могинэ́ла тэ хасёл бибахталэ́ ваканцыятыр (случаёстыр). А ке́ли чхаворо́ латхэлапэ, ёв нисо́ на дорэсэ́ла дро васт.

¹⁴[15] Сыр ёв явдя́ пэ свэ́то (лот) нанго да́кирэ штэто́стыр, дасаво-паць нанго ёв рисёла палэ, сыр ёв явдя́. И ёв нисо́ на лэ́ла пэ́скирэ пхарэ́ бутя́тыр, со ёв могинэлас тэ лыджа́л криг пэ́скирэ вастэ́са.

¹⁵[16] И дава́ исын адя́кэ-паць пхари́ биба́хт: дро саро́ саво́ ману́ш явдя́, рэх (украт) дасаво-паць ёв ячкирэ́ла дава́ свэ́то (лот), и, саво́ ко́фо явэ́ла лэ́скэ, со ёв кэрдя́ пхари́ буты́ ваш балва́л?

¹⁶[17] Ёв хая дро цямлыпэ́н дрэ сарэ́ пэ́скирэ дывэса́ бутэ́ дукхэнца, насвалыпнаса и барэ́ холя́са.

¹⁷[18] Акэ, со мэ дыкхцём: дава́ исын лачхэ́с и миштэ́с тэ хал, и тэ пьел, и зоралэ́с тэ радынэ́лпэ лачхипнастыр, со исын сарэ́ лэ́скирэ пхарэ́ бутя́тыр, со ёв кэрдя́ буты́ пхарэ́с тэл кхам дрэ сарэ́ дывэса́ лэ́скирэ джиибнастыр, со Дэвэ́л дыя́ лэ́скэ, пал-дова́ со дава́ исын лэ́скири паш миштыпна́стыр.

¹⁸[19] И адя́кэ-паць кажно ману́ш, конэ́скэ Дэвэ́л дыя́ барвалыпэ́н и миштыпэ́н, и дыя́ зор лэ́скэ тэ лэл дава́, и тэ лэл пэ́скири паш миштыпна́стыр и зоралэ́с тэ радынэ́лпэ пэ́скирэ пхарэ́ бутя́тыр-дава́ исын лэ́скиро тала́но Дэвлэ́стыр.

¹⁹[20] Пал-дова́ со ёв на явэ́ла ўса́ды (сак) тэ рипирэл дывэса́ лэ́скирэ джиибнастыр, палдава́ Дэвэ́л и обрадынэла лэ́скиро ило́.