Read Baltic Romani Bible 2019 – Библия - Пэ Балтитко Романи чиб (Романэс) 2019 Эклес 9 Bible Online

Эклес 9 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Эклес 9

¹Пал саро́ дава́, мэ роздуминдём пэ́скирэ илэ́са, соб (кай) тэ розгалёвав буты́р саро́ дава́: чачо́, и чачунэ́, и годэ́ мануша́, и лэ́нгирэ бутя́ исын дро Дэвлэ́скиро васт: ние́кх ману́ш на джинэ́ла, ци явэ́на тэ сыкавэ́н паты́в лэ́скэ, ци явэ́на тэ бидыкхэн лэс пал дава́: саро́ дава́ исын анги́л лэ́ндэ.

²Саро́ адя́кэ кэрэ́лапэ сарэ́нца пир екх дром: екх тала́но ваш чачунэнгэ и ваш фуе́ манушэ́нгэ; ваш лачхэ́, и ваш бибахталэ́, жужэ́ и нажужэ́ манушэ́нгэ. Ваш одолэ́скэ, кон янэ́ла свэ́нто дыибэ́н, и ваш одолэ́скэ, кон на янэ́ла свэ́нто дыибэ́н: адя́кэ лачхэскэ, адя́кэ-паць и грэхитконэ́ манушэ́скэ; адя́кэ одолэ́скэ, кон совлахала, адя́кэ-паць и кодолэ́скэ, кон на совлахала.

³Дава́ исын биба́хт машки́р сарэ́ндэ, со кэрэ́лапэ тэл кхам — со екх тала́но (судьба) ужакирэ́ла сарэ́н: чачо́, манушэ́нгирэ-чхавэ́нгирэ илэ исын пхэрдэ́ бибахтяса, и бигодыпэн исын дрэ лэ́нгирэ илэ, пака ёнэ дживэ́на, а пало́ (после) дова́ ёнэ джа́на криг одори́к, кай мулэ́ исын.

⁴Нэ одова́, кон исын машки́р джидэндэ, ишчо (инкэ́) ужакирэ́ла лачхипэ́н анги́л, пал-дова́ со джидо́ джукэл исын фэды́р мулэ́ шчэрэстыр (левостыр).

⁵Джидэ́ мануша́ джинэ́на, со ёнэ мэрэ́на, нэ мулэ́ на джинэ́на нисо́, и адя́кэ-паць нанэ лэ́нгэ буты́р мазу́ри (награда), и мануша́ бистырдэ сарэ́са пал лэ́ндэ.

⁶Адя́кэ-паць и лэ́нгири паты́в кэ яви́р мануша́, и одова́, со ёнэ зоралэ́с бидыкхнэ, и лэ́нгиро зэвлыныпэ́н какана́ хасинэ́ — адя́кэ-паць лэ́нгэ нанэ буты́р и бажын дро дова́, со кэрэ́лапэ тэл кхам.

⁷Джа́ и ха пэ́скиро маро́ радаса, и пи мол радымакирэ илэ́са; пал-дова́ со Дэвлэ́скэ ґара́ ячнэ́ лачхэ́ тырэ́ бутя́.

⁸Мэк тырэ́ и́ди тэ явэ́н парнэ́, мэк тэ ухтылэл (тэ явэ́л до́си) оливи́тко дзэт (елеё) пэ тыро́ шэро́.

⁹Джив и ра́дынпэ ромня́са, савья́ ту камэ́са сарэ́ дывэса́ дро тыро́ харныпнытко джиибэ́н, со Дэвэ́л дыя́ ту́кэ тэл кхам пэ сарэ́ дывэса́ дро тыро́ харныпнытко джиибэ́н; пал-дова́ со дасави́ исын тыри́ бажын дро джиибэ́н и дрэ буты́, со ту кэрэ́са тэл кхам.

¹⁰Саро́, со тыро́ васт латхэ́ла тэ кэрэ́л, кэр дава́ сарэ́ тырэ́ зоралыпнастыр, пал-дова́ со нанэ ни буты́, ни придуминэса нисо́, ни джиныбэ́н, ни годыпэ́н дрэ маґила (дрэ кула), карик ту кэдэсапэ тэ джас.

¹¹Мэ рисиём и дыкхцём, со кэрэ́лапэ тэл кхам: со призо выкхэлэла на одова́, кон исын най сыгэды́р, ци марибэ́н на одова́, кон исын най зоралэды́р, ци маро́ на одова́, кон исын най годэдыр, ци барвалыпэ́н на одова́, кон исын най годьварэдыр, ци ла́ска, на одова́, кон исын най фэдэды́р; нэ исын часо и ваканцыя (случаё) ваш кажнонэ́ манушэ́скэ.

¹²Пал-дова́ со ману́ш адя́кэ-паць на джинэ́ла пэ́скиро часо: ёв попэрэлапэ сыр мачхэ́ дрэ бибахталы кхуды́ (сеть), сыр чирикля́ дрэ фэлы́, адя́кэ-паць и манушэ́нгирэ чхавэ́ исын дрэ фэля́ дро бибахтало́ часо, ке́ли екха́тыр бари би́да пэрэ́ла пэ лэ́ндэ.

¹³Акэ, адя́кэ-паць исын екх годыпэ́н, со мэ адя́кэ-паць дыкхцём тэл кхам и со сыкадыя́ баро́ ваш ма́нгэ:

¹⁴ґа́да, сыс екх форицо, кай исыс на́бут (куты́) мануша́, и баро́ кра́ли гия́ марибна́са пэ дава́ форицо, и ёв обгия трусця́л дава́ форицо халадэнца, и ёв ґаздыя́ барэ́ ва́нты тэ лэл дава́ форицо.

¹⁵Нэ, ґалёв, екх чороро́, нэ годо́ ману́ш латхяпэ дро форицо, и ёв выракхця дава́ форицо пэ́скирэ годыпнаса. Нэ ние́кх ману́ш на рипирэлас кадалэ́ чорорэ́ манушорэс.

¹⁶Тэ́ньци пхэндём мэ: “Годыпэ́н исын фэды́р зоралыпнастыр”, нэ сароекх — чорорэ́-манушэ́нгиро годыпэ́н исын на дрэ паты́в и лэ́скирэ лава́ на шунэ́на.

¹⁷Годэ́-манушэ́нгирэ лава́ шунэ́на буты́р, со штылэ́с пхэнэнапэ сыр одолэскири го́дла, кон хулаинэла пэ дылыниньконэндэ.

¹⁸Годыпэ́н исын фэды́р марибнытконэ́ састырэндыр; нэ екх грэхи́тко ману́ш хасякирэ́ла бут лачхипэ́н.