Read Baltic Romani Bible 2019 – Библия - Пэ Балтитко Романи чиб (Романэс) 2019 Исаёс 40 Bible Online

Исаёс 40 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Исаёс 40

¹“Подрикирэн, подрикирэн ду́хо (фа́но) дро Миро народо,” — ракирэ́ла тумаро́ Дэвэ́л.

²Ракирэ́н кэ Ерусалимоскиро ило́, пхэнэ́н лэ́скэ, со пирияця́ лэ́скиро марибэ́н, со на отдэлапэ палэ лэ́скэ пал грэ́хо, пал-дова́ со ёв прилыя́ Ра́скирэ-Дэвлэ́скирэ вастэ́стыр пал сарэ́ грэ́хи дрэ дуй мо́лы буты́р, сыр трэиндя́.

³Зан, сави́ годлэла пэ чхучи́ пхув: “Кэрэ́н дром Ра́скэ-Дэвлэ́скэ, кэрэ́н пэ мал (степ) маму́й дрома́ ваш амарэ́ Дэвлэ́скэ.

⁴Кажно до́ло мэк тэ пхэрдёл, кажно бэ́рга и бэ́ргица мэк тэ пэрэ́н, дова́, со исын банго́, тэ ячэ́л роўно (во́рто), и бангэ́ дрома́ тэ кэрэнпэ гладконэ дромэ́нца.

⁵И сыкадёла Ра́скирэ-Дэвлэ́скиро барипэ́н, и кажно лочь (плоть) дыкхэ́ла зракхибэ́н Ра́скирэ-Дэвлэ́скиро, пал-дова́, со адя́кэ пхэндлэ́ Ра́скирэ-Дэвлэ́скирэ ушта́.”

⁶Зан ракирэ́ла: “Пхэн!” “Нэ со ма́нгэ тэ пхэна́в?” “Кажно лоч (плоть) — чар, а гожыпэн ла́киро — сыр лулуди́ (цвэто) фэлдытко.

⁷Чар зашутёла, лулуди́ (цвэто) зашутёла, а ко́ли пхурдэла пэ лэ́стэ Рай-Дэвэ́л, адя́кэ и народо — ёв исын чар.

⁸Чар зашутёла, лулуди́ зашутёла, а лав амарэ́ Ра́скирэ-Дэвлэ́скиро ячэ́лапэ ве́чнэс.”

⁹Джа́ пэ вучи́ бэ́рга, Сио́но, саво́ мишто́ пхэнэ́ла Дэвлэ́скиро лав! Ѓаздэ зорья́са зан тыри́, Ерусалимо, саво́ ракирэ́ла лав Дэвлэ́скиро! Ѓаздэ зан, на дар! Пхэн кэ фо́рья Юда́скирэ: “Акэ, исын тумаро́ Дэвэ́л!”

¹⁰Акэ, Рай Дэвэ́л, Дэвэ́л явэ́ла зорья́са и Лэ́скиро васт исын зорья́са. Акэ, мазу́ри (награда) Лэ́скири исын Лэ́са, Ёв отдэ́ла палэ сарэ́нгэ анги́л Пэ́скиро муй.

¹¹Сыр чхупна́ри Ёв ракхэ́ла Пэ́скирэ бакрэ́н; а бакрорэ́н лэ́ла Ёв пэ васта́ и явэ́ла тэ лыджа́л пэ Пэ́скиро колы́н, и савэ́ дэ́на тхуд тэ лыджа́л.

¹²Кон вычхудя́ пани́ пэ́скирэ вастэ́са, выгиндя́ болыбэ́н и пра́хо пхувья́киро, зважындя пэ ублады́тка (весы) бэ́рги и бэ́ргицы пэ ублады́тка чарэ́?

¹³Кон ґалыя́ ду́хо (фа́но) Ра́скирэ-Дэвлэ́скиро, кон подпхэнэлас Лэ́скэ и сыклякирэлас Лэс?

¹⁴Конэ́стыр мангэ́ла Ёв годыпэ́н (совето), и кон дэ́ла годы́ Лэ́скэ, чхувэ́ла Лэс по дром чачуно́, кон дэ́ла Лэ́скэ джиныбэ́н и сыкавэ́ла дром, кай исын годы́.

¹⁵Акэ, народы — сыр чолыня (капли) пани́ вэдратыр и гинэнапэ сыр пра́хо пэ ублады́тка (весы). Акэ, островы (пхувья́ машки́р мо́рё (дэрья́в)), Ёв ґаздэ́ла сыр пра́хо.

¹⁶На ухты́лла (на́доси) Ливанос, соб (кай) тэ кэрэ́л яг ваш свэ́нто дыибэ́н, на ухты́лла (на́доси) мурдалэ́н пэ лэ́стэ, соб (кай) тэ янэл дыибэна́ ваш цэ́ло схачкирибэ́н.

¹⁷Сарэ́ народы, сыр нисо́ исын анги́л Лэ́стэ, сыр ничи́, сыр чхучо́ штэ́то Лэ́стэ гинэнпэ.

¹⁸Пэ конэ́стэ зджа́ла (поджала) Дэвэ́л, со тумэ́ пхэнэ́на? И со пэ Лэ́стэ зджа́ла (поджала)?

¹⁹Спецо тэ вычхинэл кэрэ́ла идоло, сувнакунари учхакирэ́ла лэс сувнака́са, прикэрэла кэ ёв руповэ зандирорья (цэпочки).

²⁰А кон исын чороро́, одова́ выкэдэ́ла кашт, саво́ на кирнёла, родэ́ла сыклякирдэ́ манушэ́с-спецос тэ вычхинэл гожэс, соб (кай) тэ кэрэ́л идоло, саво́ б твардэс тэ тэрдёл.

²¹Ци тумэ́ на джинэ́на? Ци тумэ́ на шундлэ́? Ци на ракирэ́нас тумэ́нгэ англэды́р сарэ́стыр, ци на ґалынэ́ тумэ́ пхувья́кирэ создыибнастыр?

²²Ёв исын Одова́, Кон бэшэ́ла упра́л пэ крэнглыпэн пхувья́киро и пэ манушэ́ндэ, савэ́ пэ пхув дживэ́на, и, савэ́ исын сыр кирмэ анги́л Лэ́стэ. Ёв протырдыя́ болыбэ́н, сыр сано похтан, чхудя́ лэн сыр ша́тра.

²³Дро нисо́ Ёв пирикэрэла тхагарьен (князьен), сыр вари-со чхучо́ кэрэ́ла ёв пхувья́кирэ сэндарьен.

²⁴Акэ, ёнэ наґара чхудэ́, наґара барьякирдэ́, наґара дрэ пхув придживдэпэ, нэ сыр Ёв пхурдыя пэ лэ́ндэ, и ёнэ вышутинэ, и балва́л лыджия́ лэн криг, сыр пхус.

²⁵Со ж тумэ́ пхэнэ́на пал Ма́ндэ, пэ конэ́стэ Мэ зджава (поджава)? Конэса тумэ́ прироўнинэна (припарувэна) Ман,” — ракирэ́ла Свэ́нто.

²⁶Ѓаздэн тумарэ́ якха́ кэ вучо́ болыбэ́н и подыкхэн? Кон лэс создыя́? Кон вылыджала Пэ́скирэ чэргэня́ и гинэ́ла лэн? Сарэ́ чэргэня́ Ёв кхарэ́ла пир лав, ничи́ на хасёла Лэ́стэ, пал-дова́ со исын лэ́стэ бари зор и зоралыпэ́н.

²⁷Со́скэ ж ту ракирэ́са, Яково, со́скэ ту выпхэнэса, Израилё: “Ѓарадо исын миро дром Ра́стыр-Дэвлэ́стыр, бистырдо исын миро рэ́ндо Мирэ́ Дэвлэ́стэ”?

²⁸Ци ту на джинэ́са, ци ту на шундя́н, со ве́чно исын Рай Дэвэ́л, Саво́ создыя́ пхув, николи на кхинёла, и на нашавэла зор, нэ ту на ґалёса Лэ́скири годы́.

²⁹Кон кхиныя — одолэ́скэ Ёв дэ́ла зор, и кон исын бизорья́киро — одолэ́с Ёв подрикирэ́ла.

³⁰И тэрнэ́ чхавэ́ кхинёна, хасякирэна зор, и тэрнэ́ мануша́ пэрэ́на.

³¹А одова́, конэ́стэ пэ Растэ-Дэвлэ́стэ исын наде́я, прилэ́на нэви́ зор, ґаздэ́на пхака́ (крылы), сыр киды (орлы), нашэ́на и на явэ́на кхинэ, праста́на и на кхинёна.