Read Baltic Romani Bible 2019 – Библия - Пэ Балтитко Романи чиб (Романэс) 2019 Исаёс 58 Bible Online

Исаёс 58 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Исаёс 58

¹“Кхар зоралэ́ заня́са, на андырша; ґа́здэ тыри́ зан сыр ро́го (труба), сыка́в Мирэ́ народоскэ пэ лэ́скирэ налачхэ́ рэ́нды, сыка́в Яково́скирэ кхэрэ́скэ пэ лэ́скирэ грэ́хи.

²Ёнэ родэ́на Ман кажно дывэ́с, ёнэ камэ́на тэ джинэ́н Мирэ́ дрома́ сы́рбы народо, саво́ кэрэ́ла пир чачипэ́н, саво́ на ячкирэ́ла Пэ́скирэ Дэвлэ́скирэ упхэныбэна́; ёнэ пхучэна Ма́ндыр пал чачунэ́ сэнды, ёнэ камэ́на тэ явэ́н пашылэды́р кэ Дэвэ́л.

³“Со́скэ амэ рикираса посто, а Ту на дыкхэ́са? Амэ обрикираса пэ́скирэ илэ [амарэ́ илэ на пхутёна-ю.о.], а Ту на джинэ́са?” Акэ, дро дова́ дывэ́с, ко́ли рикирэ́на посто, тумэ́ кэрэ́на пир тумари́ во́ля, требинэна, соб (кай) яви́р мануша́ тэ кэрэ́н пхари́ буты́.

⁴Акэ, тумэ́ рикирэ́на посто, соб (кай) тэ ханпэ и тэ кошэнпэ, и соб (кай) тэ марэ́н манушэ́н; тумэ́ на постинэна адя́кэ, соб (кай) шундлы сыс пэ вучипэ́н тумари́ зан.

⁵Ци дасаво исын посто, саво́ Мэ выкэдыём? Дывэ́с, ко́ли ману́ш тэ зрикирэл пэс? Ману́ш пэ́скиро ди, ко́ли бандякирэл пэс, сыр тришчына (тростнико), пэ́скиро шэро́; сыр ёв урьелапэ дрэ пхуранэ́ и́ди, бэшэ́ла дро пра́хо. Ци кадава́ кхарэса ту постоса, пхэнэ́са, со дава́ дывэ́с явэ́ла лачхо́ Ра́скэ-Дэвлэ́скэ?

⁶Акэ, исын посто, саво́ Мэ выкэдыём: роспхагир хохаибнаскирэ састыра́, роспхандлэ шылэ, отмэк пэ во́ля пхандлэ манушэ́н, злэ пхарипэ́н лэ́ндыр.

⁷Дэ тыро́ маро́ бокхалэ́ манушэ́скэ; мэк чорорэ́, савэ́ псирэ́на пир свэ́то тэ заджа́н дро тыро́ кхэр; ко́ли дыкхэ́са, со джа́ла нанго — дэ лэ́скэ и́дя; и екхэ-ратэскирэ тырэстыр на гарадёв.

⁸Тэ́ньци откэрлапэ, сыр тасярлуно зло́ко (зоря), тыро́ дуд, и явэ́ла кэ ту састякирибэн; чачипэ́н тыро́ анги́л ту́тэ джа́ла, и паты́в Раскири-Дэвлэ́скири явэ́ла ту́са.

⁹Тэ́ньци кхарэса, и Рай Дэвэ́л шунэ́ла, загодлэса, и Ёв пхэнэ́ла: “Акэ, Мэ сом!” Ко́ли злэса пхарипэ́н пэ́стыр, ту пириячэса тэ ґаздэс ангу́шт и тэ ракирэ́с злыднитка лава́.

¹⁰Отдэса ту бокхалэскэ пэ́скиро ило́; ту чалякирэса манушэ́скиро ди, саво́ страдынэла, тэ́ньчи дуд (свэ́то) тыро́ хачола дрэ цямлыпэ́н, калыпэ́н тыро́ явэ́ла сыр паш-дывэ́с.

¹¹И Рай Дэвэ́л явэ́ла тэ лыджа́л тут саро́ часо (цы́ро), ко́ли на явэ́на брышында и пхув шутёла, Рай Дэвэ́л чалякирэла тыро́ ило́ и маса́, ту явэ́са сыр шука́р у́нта (садо), сыр ґаны́нг, кай пани́, саво́ николи на шутёла.

¹²Пэ чхучэ́ пхувья́ явэ́на тэ кэрэ́н буты́ тырэ́ чхавэ́, кон явэ́ла анги́л; ту дэ́са зор кэ барэ́ ро́ды; пал ту́тэ пхэнэ́на, со ту ґаздыян роспхагирдо, тэ кэрдя́н нэвэ дрома́ ваш манушэ́нгэ.

¹³Ко́ли ту вырикирэс са́вато (субо́та), соб (кай) тэ на кэрэ́с пир тыро́ ило́ дро Миро свэ́нто дывэ́с; ту явэ́са тэ кхарэс са́вато радыныпнаса, свэнтонэ́ Ра́скирэ-Дэвлэ́скирэ дывэсэса, патывалэ́ дывэсэса; ко́ли ту дэ́са паты́в лэ́скэ, на явэ́са тэ кэрэ́с тырэ́ рэ́нды и тэ кэрэ́с пир пэ́скири годы́ и тэ пхэнэ́с чхучэ́ (пуста) лава́.

¹⁴Тэ́ньци ту явэ́са радымакиро (тэ радынэспэ дрэ Растэ-Дэвлэ́стэ), Мэ ґазда́ва тут пэ пхувья́киро вучипэ́н, Мэ да́ва ту́кэ дова́, со прилыя́ Яково, тыро́ дад! Ушта́ Ра́скирэ-Дэвлэ́скирэ пхэндлэ́ дава́.”