Read Baltic Romani Bible 2019 – Библия - Пэ Балтитко Романи чиб (Романэс) 2019 Левито 12 Bible Online

Левито 12 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Левито 12

¹И пхэндя́ Рай Дэвэ́л Мойза́скэ дасавэ́ лава́:

²“Пхэн Израилёскирэ чхавэ́нгэ: ко́ли джувлы́ пхарьёла и биянэ́ла чхаворэс (биято́с), тэды ёй явэ́ла нажужы эфта́ (битринэ́нгиро дэш) дывэса́; сыр дрэ дывэса́ ла́кирэ жужакирибнаскирэ мэ́ньки, ёй явэ́ла нажужы;

³пэ охто́то (бидуе́нгиро дэ́што) дывэ́с обчхинэлапэ лэ́стэ (чхаворэстэ) лэ́скири лоч (плоть) пэ яго́ро (пэ краё);

⁴и трия́нда трин дывэса́ банги ёй тэ бэшэ́л тэ жужакирэлпэ пэ́скирэ ратэндыр; нисо́, со исын свэ́нто, ла́кэ нашты́ тэ чилавэл, и кэ свэ́нто штэ́то нашты́ тэ явэ́л, пака проджа́на ла́кирэ-жужакирибнаскирэ дывэса́.

⁵Ко́ли ёй биянэ́ла чхаёрья, то тэды дрэ пэ́скирэ-жужакирибнаскирэ дывэса́ ёй явэ́ла нажужы дуй куркэ, и шовдэша́ шов дывэса́ ёй исын банги тэ бэшэ́л тэ жужакирэлпэ пэ́скирэ ратэндыр.

⁶Сыр проджа́на ла́кирэ жужакирибнаскирэ дывэса́ пал чхавэ́стэ ци пал чхатэ, ла́кэ трэй тэ янэл екхэ-бэршытконэс бакрорэс ваш цэ́ло схачкирибэ́н и тэрнэ́ голумбицос ци горлица дро свэ́нто дыибэ́н пал грэ́хо, кэ загиибэ́н дрэ скэдыибна́скири ша́тра кэ раша́й;

⁷ёв янэ́ла дава́ анги́л Растэ-Дэвлэ́стэ, и жужакирэла ла, и ёй явэ́ла жужы пэ́скирэ ратэскирэ тхадыпнастыр. Ѓа́да, исын Зако́но пал чхаворэскиро ци чхаёрьякиро бияныпэ́н.

⁸Ко́ли ёй нашты́ тэ янэл бакрорэс, то тэды мэк тэ лэл дуе́н горлицэн ци дуе́н тэрнэн ґолумбэн, екхэ́с ваш цэ́ло схачкирибэ́н, а явирэ́с дро свэ́нто дыибэ́н (жэ́ртва) пал грэ́хо, и жужакирэла ла раша́й, и ёй явэ́ла жужы.”