Read Baltic Romani Bible 2019 – Библия - Пэ Балтитко Романи чиб (Романэс) 2019 Левито 13 Bible Online

Левито 13 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Левито 13

¹И пхэндя́ Рай Дэвэ́л Мойза́скэ и Аароно́скэ:

²“Ке́ли конэ́стэ ячэ́ла пэ лэ́скирэ-масэнгири цы́па шулыпэн, ци лишаё ци пляма, и пэ лэ́скирэ-масэнгири цы́па ячэ́ла, хай, проказакиро фра́нсо, тэды трэй тэ янэ́н лэс кэ Ааро́но, раша́й, ци кэ екх лэ́скирэ чхавэ́ндыр, рашандыр;

³раша́й обдыкхэла фра́нсо пэ цы́па пэ маса́, и ко́ли бала́ пэ фра́нсо парудынэ дрэ парнэ́, и фра́нсо исын хор (глубоко) дрэ лэ́скирэ-масэнгири цы́па, тэды дава́ исын прока́за; раша́й, обдыкхи лэс, дэ́ла тэ джинэ́н пал лэ́стэ, со ёв исын нажужо.

⁴А ко́ли пэ лэ́скирэ-масэнгири цы́па пляма (пятно) исын парны, нэ ёй нанэ хор дрэ цы́па, и бала́ пэ лэ́стэ на парудынэпэ дрэ парнэ́, тэды раша́й пхандэла манушэ́с, савэ́стэ исын фра́нсо пэ эфта́ дывэса́;

⁵пэ эфта́то дывэ́с раша́й лэс обдыкхэла, и ко́ли фра́нсо ячэ́лапэ дасаво, сыр сыс, и на розджалапэ фра́нсо пир цы́па, тэды раша́й банго́ тэ пхандэл лэс пэ яви́р эфта́ дывэса́;

⁶пэ эфта́то дывэ́с раша́й нэвэ́стыр обдыкхэла лэс, и ко́ли фра́нсо тыкнэды́р бицяло́, и на розгия́пэ фра́нсо пир цы́па, тэды раша́й исын банго́ тэ пхэнэ́л манушэ́нгэ, со ёв исын жужо́: дава́ исын лишаё, и мэк ёв тэ выморэл пэ́скирэ и́ди, и явэ́ла жужо́.

⁷Ко́ли лишаё ячэ́ла тэ розджалпэ пир цы́па, коригэды́р (позже) дова́, сыр ёв псирдя́ кэ раша́й тэ жужакирэлпэ, тэды ёв яви́р мо́ло банго́ тэ явэ́л кэ раша́й;

⁸о раша́й, дыкхи́, со лишаё розджалапэ пир цы́па, ёв дэ́ла тэ джинэ́л манушэ́нгэ, со ёв исын нажужо: дава́ исын прока́за.

⁹Ко́ли явэ́ла пэ вари-конэ́стэ фра́нсо кэ прока́за, тэды трэй лэс тэ янэл кэ раша́й;

¹⁰о раша́й обдыкхэла лэс и, ко́ли шулыпэн пэ цы́па исын парно́, и бал парудыя дрэ парно́, и пэ шулыпэн исын джидо́ мас,

¹¹то дава́ исын ґаратуны прока́за пэ лэ́скирэ-масэнгири цы́па; и раша́й приґалёла лэс нажужэса и пхандэла лэс; пал-дова́ со ёв исын нажужо.

¹²Ко́ли фра́нсо розбуґлёла пэ цы́па, и учхакирэ́ла прока́за сари́ цы́па насвалэскири, лэ́скирэ шэрэстыр кэ ґэра́, ци бут могинэн тэ дыкхэ́н рашаскирэ якха́,

¹³и дыкхэ́ла раша́й, со фра́нсо учхакирдя́ сарэ́ лэ́скирэ маса́, то тэды ёв приґалёла насвалэс жужэса, пал-дова́ со саро́ кэрдя́пэ дро парно́, ёв исын жужо́.

¹⁴Ке́ли ячэ́ла пэ лэ́стэ джидо́ мас, тэды ёв исын нажужо;

¹⁵и о раша́й, дыкхи́ джидо́ мас, приґалёла лэс нажужэса, пал-дова́ со джидо́ исын мас нажужо: дава́ исын прока́за.

¹⁶Ко́ли джидо́ мас парудёла и пиририсёла дро парно́, мэк ёв тэ явэ́л кэ раша́й;

¹⁷и о раша́й обдыкхэла лэс, и ко́ли фра́нсо обрисия дро парно́, раша́й приґалёла насвалэс жужэса; ёв исын жужо́.

¹⁸Ко́ли конэ́стэ пэ масэнгири цы́па, сыс чыльчако (нарыво) и ёв задживдя,

¹⁹и пэ чыльчакоскиро штэ́то яця́ парно́ шулыпэн, ци пляма парны ци лоловато, тэды ёв исын банго́ тэ явэ́л кэ раша́й;

²⁰и раша́й обдыкхэла лэс и, ко́ли чыльчако явэ́ла тэл цы́па, и бал лэ́скиро парудыя дро парно́, тэды раша́й пригалёла лэс нажужэса: дава́ исын проказакиро фра́нсо, ёв росцвэцындя (розлулудия) пэ чыльчако;

²¹нэ ко́ли раша́й дыкхэ́ла, со бал пэ фра́нсо исын напарно, и ёв нанэ тэл цы́па, и на́бут (куты́) исын бицялы, тэды раша́й пхандэла лэс пэ эфта́ дывэса́;

²²ко́ли ёв ячэ́ла древа́н тэ розджалпэ пир цы́па, тэды раша́й приґалёла лэс нажужэса: дава́ исын проказакиро фра́нсо;

²³ко́ли пляма ячэ́лапэ пэ пэ́скиро штэ́то и на розджалапэ, тэды дава́ исын чыльчакоскиро шулыпэн, и раша́й приґалёла лэс жужэса.

²⁴И, ко́ли конэ́стэ пэ масэнгири цы́па явэ́ла обхачкирибэн, и пэ задживдо обхачкирибнаскиро ячэ́ла лоловато ци парны пляма,

²⁵и раша́й удыкхэ́ла, со бал пэ пляма (пятно) пирипарудыя дро парно́, и ёв ячэ́ла хор дрэ цы́па, тэды дава́ исын прока́за, ёй зацвэцындя пэ обхачкирибэн; и раша́й приґалёла лэс нажужэса: дава́ исын проказакиро фра́нсо;

²⁶ко́ли раша́й дыкхэ́ла, со бал пэ пляма напарно, и ёв нанэ тэл цы́па, и нанэ древа́н бицяло́, тэды раша́й пхандэла лэс пэ эфта́ дывэса́;

²⁷пэ эфта́то дывэ́с раша́й обдыкхэла лэс, и ко́ли ёй древа́н розджалапэ пир цы́па, тэды раша́й приґалёла лэс нажужэса: дава́ исын проказакиро фра́нсо;

²⁸ко́ли пляма ячэ́лапэ пэ пэ́скиро штэ́то, и на розджалапэ пир цы́па, и на́бут со нанэ бицялы, тэды дава́ шулыпэн обхачкирибнастыр; раша́й приґалёла лэс жужэса, пал-дова́ со дава́ шулыпэн обхачкирибнастыр.

²⁹Ко́ли муршэстэ ци джувля́тэ явэ́ла фра́нсо пэ шэро́ ци пэ чхора (брода),

³⁰и тэ́ньчи обдыкхэла раша́й фра́нсо, и ёв ячэ́ла хор дрэ цы́па и бал пэ ла́тэ жылто сано, тэды раша́й приґалёла лэн нажужэнца: дава́ исын пархима, дава́ исын прока́за пэ шэро́ ци пэ чхора (брода);

³¹ко́ли раша́й обдыкхэла фра́нсо пархимакиро, и ёй на ячэ́ла хор дрэ цы́па, и бал пэ ла́тэ исын на кало́, тэды раша́й одолэ́с, конэ́стэ исын фра́нсо пархимакиро, пхандэла пэ эфта́ дывэса́;

³²пэ эфта́то дывэ́с раша́й обдыкхэла фра́нсо, и ко́ли пархима на розджалапэ, и нанэ пэ ла́тэ жылто бал, и пархима на ячэ́ла хор дрэ цы́па,

³³тэды насвалэстэ трэй тэ обчхинэн бала́, нэ штэ́то, кай пархима тэ на обчхинэн, и раша́й исын банго́ пархатонэс яви́р мо́ло тэ запхандэл пэ эфта́ дывэса́;

³⁴пэ эфта́то дывэ́с раша́й обдыкхэла пархима, и ко́ли пархима на розгия́пэ пир цы́па и на ячэ́ла хор дрэ цы́па, тэды раша́й приґалёла лэс жужэса; мэк ёв тэ выморэл пэ́скирэ и́ди, и явэ́ла жужо́.

³⁵Нэ ко́ли пало́ лэ́скиро жужакирибэн явэ́ла бут тэ розджалпэ пархима пир цы́па,

³⁶и раша́й удыкхэ́ла, со пархима розджалапэ пир цы́па, тэды раша́й мэк тэ на родэ́л жылто бал: ёв исын нажужо.

³⁷Ко́ли пархима ячэ́лапэ, сыр сыс, и сыкавэлапэ пэ ла́тэ кало́ бал, тэды пошара прогия́, ёв исын жужо́; раша́й приґалёла лэс жужэса.

³⁸Ко́ли муршэстэ ци джувля́тэ пэ лэ́нгирэ-масэнгири цы́па явэ́на ярка плямы, ярка парнэ́ плямы,

³⁹и раша́й дыкхэ́ла, со пэ лэ́нгирэ-масэнгири цы́па бледна-парнэ́ плямы, тэды дава́ исын лишаё, со росцвэцындя пэ цы́па: ёв исын жужо́.

⁴⁰Ко́ли конэ́стэ пэ шэро́ вырэснэ бала́, тэды дава́ исын плешо: ёв исын жужо́;

⁴¹а ко́ли анги́л пэ чыкат вырэснэ бала́, тэды ёв исын лысо: ёв исын жужо́.

⁴²Ко́ли пэ плешо ци пэ лысина явэ́ла парны ци лоловато пляма, тэды пэ лэ́скиро плешо ци пэ лэ́скири лысина росцвэцындя проказакиро фра́нсо.

⁴³И о раша́й обдыкхэла лэс и, ко́ли дыкхэ́ла, со пэ шулыпэн пэ фра́нсо парно́ ци лоловато пэ лэ́скиро плешо ци пэ лэ́скири лысина, бицялы со подджа́ла пэ масэнгирэ-цыпакиро прока́за,

⁴⁴тэды адава́ ману́ш исын проказытко, нажужо ёв исын; раша́й исын банго́ тэ приґалёл лэс нажужэса, лэ́стэ пэ шэро́ фра́нсо.

⁴⁵Проказытконэстэ, пэ савэ́стэ исын дава́ фра́нсо, трэй, соб (кай) пэ лэ́стэ тэ явэ́л розкушны и́дя, и лэ́скиро шэро́ исын банго́ тэ явэ́л на учхакирдо, и кэ ушта́ ёв банго́ тэ явэ́л учхакирдо и тэ дэл го́дла: ‘Нажужо! нажужо!’

⁴⁶Дрэ сарэ́ дывэса́, пака пэ лэ́стэ исын фра́нсо, ёв исын банго́ тэ явэ́л нажужо, нажужо исын ёв; ёв исын банго́ тэ дживэ́л екхджино́, пал ста́но тэ явэ́л лэ́скиро джиибэ́н.

⁴⁷Ко́ли явэ́ла проказакиро фра́нсо пэ и́ди, ци пэ и́дя вылна́тыр (шэрсятыр), ци пэ и́дя лёностыр (ґандладэстыр),

⁴⁸ци пэ основа тхавэнгири, савэ́ джа́на упралэстыр, ци пэ утоко тхава, со джа́на пир буґлыпэ́н лёностыр (гандладэстыр) ци вылна́тыр, ци пэ цы́па, ци пэ вари-саво́ саво́ цыпитко кэрибэн,

⁴⁹и франсакири пляма (пятно) явэ́ла зэлэновато ци лоловато пэ и́дя, ци пэ цы́па, ци пэ основа, ци пэ утоко, ци пэ вари-саво́ цыпитко урибэ́н, — тэды дава́ исын фра́нсо кэ прока́за: трэй тэ сыкавэ́н ла раша́скэ;

⁵⁰о раша́й обдыкхэла фра́нсо, и запхандэла насвалы и́дя проказаса пэ эфта́ (битринэ́нгиро дэш) дывэса́

⁵¹пэ эфта́то дывэ́с раша́й продыкхэла фра́нсо, и, ко́ли фра́нсо розгия́пэ пир и́дя, ци пэ основа, ци пэ утоко, ци пир цы́па, ци пир вари-со, со кэрдо́ цыпатыр, тэды дава́ исын прока́за захалы, нажужо исын фра́нсо;

⁵²ёв исын банго́ тэ схачкирэл и́дя, ци основа, ци вылнакиро утоко ци ґандладэскиро (лёноскиро), ци сави́ да тэ на явэ́л, сави́ кэрды цыпатыр, пэ сави́ явэ́ла фра́нсо, пал-дова́ со дава́ исын захалы прока́за: трэй тэ схачкирэн ла пэ яг.

⁵³Ко́ли раша́й дыкхэ́ла, со фра́нсо на розгия́пэ пэ и́дя, ци пэ основа, ци пэ утоко, ци пэ сави́ б тэ на явэ́л риза, со кэрды цыпатыр,

⁵⁴тэды раша́й упхэнэла тэ обморэн дова́, пэ сави́ исын фра́нсо, и яви́р мо́ло запхандэла пэ эфта́ дывэса́;

⁵⁵ко́ли коригэды́р (позжэды́р) насвалэ-идякиро выморибнастыр раша́й удыкхэ́ла, со фра́нсо на парудя пэ́скиро бицялыбэн и фра́нсо на розгия́пэ, тэды ёй исын нажужы, схачкирла и́дя пэ яг; дава́ исын выхано штэ́то пэ муитко риг ци пэ палатуны;

⁵⁶ко́ли раша́й дыкхэ́ла, со фра́нсо пир ла́киро морибэн яця́ тыкнэды́р бицяло́, тэды раша́й мэк тэ откушэл штэ́то франсоса идятыр, ци цыпатыр, ци основатыр, ци утокостыр.

⁵⁷Ко́ли ёв нэвэ́стыр сыкадёла пэ и́дя, ци пэ основа, ци пэ утоко, ци пэ вари-со кэрдо́ цыпатыр, тэды дава́ исын прока́за, сави́ розджалапэ: хачкир пэ яг дава́, пэ со прока́за исын.

⁵⁸Ко́ли и́дя, ци основа, ци утоко, ци вари-со со кэрдо́ цыпатыр выморэса, и джа́ла криг лэ́ндыр фра́нсо, тэды трэй тэ выморэн лэн яви́р мо́ло, и ёнэ явэ́на жужэ́.

⁵⁹Ѓа́да, исын зако́но пал фра́нсо кэ прока́за пэ вылнакири ци ґандладэскири (лёнытко) и́дя, ци пэ основа ци пэ утоко ци пэ вари-со, со кэрдо́ цыпатыр, сыр тэ приґалёс ла жужэса ци нажужэса.