Read Baltic Romani Bible 2019 – Библия - Пэ Балтитко Романи чиб (Романэс) 2019 Левито 15 Bible Online

Левито 15 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Левито 15

¹И пхэндя́ Рай Дэвэ́л Мойза́скэ и Аароно́скэ, ракири́:

²“Ракирэ́н Израилёскирэ чхавэ́нгэ и пхэнэ́н лэ́нгэ: ‘Ко́ли конэ́стэ явэ́ла тэ тхадэл лэ́скирэ масэ́ндыр, тэды лэ́скирэ тхадыпнастыр ёв исын нажужо.

³И ґа́да, исын зако́но пал лэ́скиро нажужыпэн лэ́скирэ тхадыпнастыр: ке́ли тхадэ́ла лэ́скирэ масэ́ндыр лэ́скиро тхадыпэн, и ке́ли зарикирэлапэ дрэ лэ́скирэ маса́ лэ́скиро тхадыпэн, дава́ исын лэ́скиро нажужыпэн.

⁴Кажно пасиндлы (чхуибэ́н), пэ саво́ пасёла адава́ ману́ш, савэ́стэ тэ явэ́л тхадыпэн, нажужо, и кажно предмето, пэ саво́ ёв бэшэ́ла, исын нажужо;

⁵и кон чилавэ́ла лэ́скиро чхуибэ́н, одолэ́скэ трэй тэ выморэл пэ́скирэ и́ди (ризы) и тэ обморэлпэ пане́са, и нажужо явэ́ла ёв кэ бэльвэ́ль;

⁶кон ёв бэшэ́ла пэ вари-со, пэ саво́ сыс бэшто́ ману́ш, савэ́стэ тэ явэ́л тхадыпэн, одова́ исын банго́ тэ выморэл пэ́скирэ и́ди и тэ обморэлпэ пане́са, и ёв нажужо явэ́ла кэ/жы́ко бэльвэ́ль;

⁷и кон чилавэ́ла манушэ́скирэ маса́, савэ́стэ исын тхадыпэн, одова́ исын банго́ тэ выморэл пэ́скирэ и́ди и обморэлпэ пане́са, и нажужо явэ́ла ёв кэ бэльвэ́ль;

⁸ко́ли ману́ш, савэ́стэ исын тхадыпэн, чунгардэла пэ жужэ́ манушэ́стэ, тэды адава́ ману́ш исын банго́ тэ выморэл пэ́скирэ и́ди и тэ обморэлпэ пане́са, и нажужо явэ́ла ёв кэ бэльвэ́ль;

⁹и кажно ґлябо (повозка), дрэ саво́ традыя́ ману́ш, савэ́стэ исын тхадыпэн, нажужо явэ́ла кэ/жы́ко бэльвэ́ль;

¹⁰и кажно, кон чилавэ́ла вари-со, со сыс тэл лэ́стэ нажужэстэ, нажужо явэ́ла кэ бэльвэ́ль; и кон лыджа́ла дава́, исын банго́ тэ выморэл пэ́скирэ и́ди и тэ обморэлпэ пане́са, и нажужо явэ́ла кэ бэльвэ́ль;

¹¹и кажно, кон чилавэ́ла манушэ́с, савэ́стэ исын тхадыпэн, намори пэ́скирэ васта́ пане́са, исын банго́ тэ выморэл пэ́скирэ и́ди и тэ выморэлпэ пане́са, и нажужо явэ́ла кэ бэльвэ́ль;

¹²кхоро́ ґлэятыр (глиняно сасудо), кэ саво́ чилавэлапэ ману́ш, савэ́стэ исын тхадыпэн, трэй тэ розмарэс, а кажно кхоро́ вэшэ́стыр трэй тэ выморэс пане́са.

¹³А ке́ли ману́ш, савэ́стэ сыс тхадыпэн, явэ́ла во́льно пэ́скирэ тхадыпнастыр, тэды ёв исын банго́ тэ отгинэл пэ́скэ эфта́ дывэса́ ваш пэ́скиро жужыпэн, и тэ выморэл пэ́скирэ и́ди (ризы), и тэ обморэл пэ́скирэ маса́ джидэ́ пане́са, и явэ́ла ёв жужо́;

¹⁴и пэ охто́то (бидуе́нгиро дэ́што) дывэ́с ёв лэ́ла пэ́скэ дуе́н горлицэн ци дуе́н тэрнэ́ голумбэн, и явэ́ла анги́л Растэ-Дэвлэ́стэ кэ загиибэ́н дрэ скэдыибна́скири ша́тра и отдэ́ла лэн раша́скэ;

¹⁵и янэ́ла раша́й далэ́ чириклендыр екха далэ́ чириклендыр дро свэ́нто дыибэ́н пал грэ́хо, а явирья дро цэ́ло схачкирибэ́н, и жужакирэла лэс раша́й анги́л Растэ-Дэвлэ́стэ лэ́скирэ тхадыпнастыр.

¹⁶Ко́ли вари-саво́ мурш вычхувэла пэ́скири сал (семё), тэды ёв исын банго́ тэ обморэл пане́са сарэ́ пэ́скирэ маса́, и нажужо явэ́ла ёв кэ бэльвэ́ль;

¹⁷и кажно и́дя и кажно цы́па, пэ сави́ пэрэ́ла семё, банго́ исын тэ явэ́л выморды пане́са, нажужи явэ́ла кэ бэльвэ́ль;

¹⁸ко́ли мурш пасёла джувля́са и явэ́ла лэ́стэ сал (семё) тэ вычхувэлпэ, тэды ёнэ исын бангэ́ тэ обморэнпэ пане́са, и нажужэ́ дуйджинэ́ ёнэ явэ́на кэ бэльвэ́ль.

¹⁹Ко́ли джувля́тэ чхувэ́лапэ рат, саво́ тхадэ́ла ла́кирэ масэ́ндыр, тэды ёй исын банги тэ бэшэ́л эфта́ дывэса́ дрэ пэ́скиро часо тэ жужакирэлпэ, и кажно, кон чилавэ́ла ла, нажужо явэ́ла кэ бэльвэ́ль;

²⁰и саро́, пэ со ёй пасёла дро часо (цы́ро) ла́кэ тэ жужакирэлпэ, явэ́ла нажужо; и саро́, пэ со ёй бэшэ́ла, нажужо;

²¹и кажно, кон чилавэ́ла ла́кири пасиндлы (чхуибэ́н), исын банго́ тэ выморэл пэ́скирэ и́ди и тэ обморэлпэ пане́са, и нажужо явэ́ла кэ бэльвэ́ль;

²²и ко́ли вари-кон чилавэ́ла вари-со пэ чхуибэ́н, ци пэ дова́ предмето, пэ саво́ ёй сыс бэшты, нажужо явэ́ла кэ бэльвэ́ль;

²³и ко́ли вари-кон чилавэ́ла вари-саво́ предмето, саво́ сыс пэ лэ́скиро чхуибэ́н, пэ саво́ ёй сыс бэшты, нажужо явэ́ла кэ бэльвэ́ль

²⁴ко́ли пирисовэла ла́са ром, тэды ла́киро нажужыпэн явэ́ла пэ лэ́стэ, ёв нажужо явэ́ла эфта́ дывэса́, и кажно чхуибэ́н, пэ саво́ ёв пасёла, явэ́ла нажужо;

²⁵ко́ли джувля́тэ бут дывэса́ тхадэ́ла рат на дро ла́киро джувликано часо, ци ко́ли ла́тэ тырдэлапэ тхадыпэн ґарэдыр (длугэдыр) ла́кирэ-джувликанэ ужакирибнастыр, сыр прилыно ужакирибнаса, то тэды дрэ сарэ́ дывэса́ ла́кирэ тхадыпнаскирэ, и адя́кэ-паць, ке́ли ёй жужакирэлапэ, ёй явэ́ла нажужы;

²⁶кажно чхуибэ́н, пэ саво́ ёй пасёла дрэ сарэ́ дывэса́ дро ла́киро джувликано часо, ёй — явэ́ла нажужы, адя́кэ-паць сыр чхуибэ́н дрэ ла́киро жужакирибнаскиро часо; и кажно любо предмето, пэ саво́ ёй бэшэ́ла, явэ́ла нажужо, сыр нажужо дава́ предмето дрэ ла́киро часо, ке́ли ёй жужакирэлапэ.

²⁷И кажно, кон чилавэ́ла лэн, явэ́ла нажужо, и лэ́скэ трэй тэ выморэл пэ́скирэ и́ди и тэ обморэлпэ пане́са, и ёв нажужо явэ́ла кэ бэльвэ́ль.

²⁸А ке́ли ёй явэ́ла во́льно пэ́скирэ тхадыпнастыр, тэды исын банго́ тэ отгинэл пэ́скэ эфта́ дывэса́, и коригэды́р (позжэды́р) ёй явэ́ла жужы;

²⁹и пэ эфта́то дывэ́с лэ́ла ёй пэ́скэ дуе́н горлицэн ци дуе́н тэрнэн голумбэн, и янэ́ла лэн кэ раша́й дрэ ша́тра;

³⁰и янэ́ла раша́й екхэ чириклендыр дро свэ́нто дыибэ́н пал грэ́хо, а явирья дро цэ́ло схачкирибэ́н, и выжужакирэ́ла ла раша́й анги́л Растэ-Дэвлэ́стэ ла́кирэ нажужакирдэ тхадыпнастыр.

³¹Адя́кэ ракхэ́н Израилёскирэ чхавэ́н лэ́нгирэ нажужакирибнастыр, соб (кай) ёнэ тэ на мэрэ́н дро пэ́скиро нажужыпэн, магири Миро кхэр (ша́тра), саво́ исын машкира́л лэ́ндэ.

³²Ѓа́да, исын зако́но пал манушэ́ндэ, савэ́ндэ тхадэ́ла масэ́ндыр и пал дова́, сыр вычхувэлапэ семё, саво́ кэрэ́на лэс нажужэса,

³³и пал одолэ́ндэ, кон пиридживэла пал пэ́скиро жужыпэн, и пал манушэ́ндэ, савэ́ндэ масэ́ндыр тхадэ́ла, муршэскэ ци джувля́кэ и пал ромэстэ, саво́ пирисовэла нажужэ́ джувля́са.