Read Baltic Romani Bible 2019 – Библия - Пэ Балтитко Романи чиб (Романэс) 2019 Левито 22 Bible Online

Левито 22 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Левито 22

¹И пхэндя́ Рай Дэвэ́л Мойза́скэ, ракири́:

²“Ра́кир Аароно́скэ и лэ́скирэ чхавэ́нгэ, соб (кай) ёнэ ракхибнаса тэ рикирэ́н пэс анги́л Израилёскирэ-чхавэ́нгирэ свэнтыма, и тэ на магирэ́н Миро свэ́нто лав дро дова́, со ёнэ ракирэ́на Ма́нгэ. Мэ сом Рай Дэвэ́л.

³Пхэн лэ́нгэ: ‘Ко́ли вари-кон сарэ́ тумарэ́ манушэ́ндыр дрэ тумарэ́ ро́ды, тэ рикирэ́л пэ пэ́стэ нажужыпэн, тэ подджа́л кэ свэнтыма, савэ́ посвэнцынэна Израилёскирэ чхавэ́ Ра́скэ-Дэвлэ́скэ, тэды тэ хасёл дова́ ди Мирэ́ мо́стыр. Мэ сом Рай Дэвэ́л.

⁴Ние́кх Аароно́скирэ родо́стыр проказаса ци конэ́стэ тхадэ́ла, одолэ́скэ нашты́ тэ хал свэнтыма, пака ёв на выжужакирэлапэ; и кон чилавэ́ла вари-со нажужо мулэстыр, ци конэ́стэ вычхувэлапэ семё (сал),

⁵ци ко́ли вари-кон чилавэ́ла вари-саво́ создыибэн, со ползынэла, савэ́стыр ёв ячэ́ла нажужо, ци чилавэ́ла манушэ́с, савэ́стыр ёв ячэ́ла нажужо, саво́ тэ на явэ́л нажужыпэн,

⁶одова́, кон чилавэ́ла саро́, нажужо явэ́ла ёв кэ бэльвэ́ль, и лэ́скэ нашты́ тэ хал свэ́нто англэды́р, сыр ёв обморэла пэ́скирэ маса́ пане́са;

⁷нэ ке́ли заджа́ла кхам и ёв явэ́ла жужо́, тэды ёв могинэ́ла тэ хал свэнтыма, пал-дова́ со дава́ сыс лэ́скиро хабэ́н.

⁸Падаль и мас, со яця́пэ рискирибна́скирэ мурдалэстыр (зверёстыр) ёв тэ на хал, соб (кай) тэ на магирэлпэ далэ́са. Мэ сом Рай Дэвэ́л.

⁹Мэк тэ ракхэ́н ёнэ Мирэ́ упхэныбэна́, соб (кай) тэ на лыджа́н пэ пэ́стэ грэ́хо, и тэ на мэрэ́н дрэ лэ́стэ, ке́ли ёнэ пхагирэна дава́. Мэ сом Рай Дэвэ́л, саво́ свэнцякирэла лэн.

¹⁰Никонэ́скэ явирэ манушэ́скэ нашты́ тэ хал свэнтыма: саво́ дживэ́ла кэ раша́й и налыно бутярно нашты́ тэ хал свэнтыма;

¹¹ко́ли раша́й кинэла пэ́скэ манушэ́с пал руп, тэды ёв сашты́ (могинэ́ла) тэ хал свэнтыма; адя́кэ-паць и лэ́скирэ кхэри́тка сашты́ тэ хан лэ́скиро маро́.

¹²Ко́ли рашаскири чхай выджа́ла палоро́м пал явирэ манушэ́стэ рига́тыр, тэды ёй нашты́ тэ хал, со янэ́на дрэ свэнтыма;

¹³ке́ли рашаскири чхай ячэ́лапэ пивляса (удоваса) ци розджалапэ ромэса, и чхавэ́н ла́тэ нанэ, и рисёла дрэ пэ́скирэ дадэ́скиро кхэр, сыр сыс дро пэ́скиро тэрныпэн, тэды ёй сашты́ (могинэ́ла) тэ хал пэ́скирэ-дадэ́скиро маро́; а ние́кх явирэ рига́тыр нашты́ лэс тэ хал.

¹⁴Кон дэ́лапэ дукха́ (кэрэ́ла доша) и ха́ла вари-со свэнтыматыр, одова́ исын банго́ тэ отдэ́л раша́скэ свэ́нто и тэ дочхувэл кэ ёй ла́кири па́нджто паш.

¹⁵Рашангэ кокорэнгэ нашты́ тэ магирэ́н Израилёскирэ-чхавэнгири свэнтыма, саво́ ёнэ янэ́на Ра́скэ-Дэвлэ́скэ,

¹⁶и лэ́нгэ нашты́ тэ выкхарэн пэ пэ́стэ банг дро чорипэ́н, ке́ли явэ́на тэ хан пэ́скири свэнтыма, пал-дова́ со Мэ сом Рай Дэвэ́л, Саво́ свэнцынэла лэн.’”

¹⁷И пхэндя́ Рай Дэвэ́л Мойза́скэ дасавэ́ лава́:

¹⁸“Ра́кир Аароно́скэ и лэ́скирэ чхавэ́нгэ и сарэ́ Израилёски-рэ чхавэ́нгэ, и пхэн лэ́нгэ: ‘Ко́ли вари-кон Израилёскирэ кхэрэ́стыр, и манушэ́ндыр, савэ́ явнэ́ явирэ рига́тыр, и дживэ́на машки́р Израильтянэндэ, ци пир сави́ совла́х, ци пир ило́ янэ́ла пэ́скиро свэ́нто дыибэ́н, саво́ янэ́на Ра́скэ-Дэвлэ́скэ дро цэ́ло схачкирибэ́н,

¹⁹тэды, соб (кай) лэ́нгэ тэ явэ́л Ра́стыр-Дэвлэ́стыр ла́ска, свэ́нто дыибэ́н трэй тэ явэ́л бидошэ́нгиро, мурш, барэ́ мурдалэстыр, бакрэ́ндыр и бузнэндыр (козлэндыр);

²⁰нисаво́ мурда́л (жывотно), пэ савэ́стэ исын дош, тэ на янэ́н; пал-дова́ со дава́ на дэ́ла тумэ́нгэ Ра́стыр-Дэвлэ́стыр ла́ска.

²¹И ко́ли вари-кон янэ́ла ми́рно свэ́нто дыибэ́н Ра́скэ-Дэвлэ́скэ, соб (кай) тэ кэрэ́л пир совла́х, ци пир ило́, барэ́ мурдалэстыр ци тыкнэстыр, тэды свэ́нто дыибэ́н исын банго́ тэ явэ́л бидошэ́нгиро, соб (кай) тэ явэ́л лачхо́ Ра́скэ-Дэвлэ́скэ: нисави́ дош нашты́ пэ лэ́стэ тэ явэ́л;

²²корорэс мурдалэс, ци савэ́с домардэс, ци уродос, ци насвалэс, ци ґэралэс, ци джувалэс, дасавэн на янэ́н Ра́скэ-Дэвлэ́скэ, и дро свэ́нто дыибэ́н на дэн лэн пэ Ра́скирэ-Дэвлэ́скиро алта́рё;

²³гуруво́рэс и бакрэ́с членэнца древа́н длэнгонэнца ци тыкнэнца, сыр свэ́нто дыибэ́н пэ́скирэ илэ́стыр ту могинэ́са тэ янэс; а ко́ли пир совла́х, тэды дава́ на явэ́ла пир ла́ска Дэвлэ́скэ;

²⁴мурдала́, савэ́стэ ятры ростасадэ, розмардэ, откушнэ ци вычхиндлэ́ на янэ́н Ра́скэ-Дэвлэ́скэ, и пэ тумари́ пхув дава́ на кэрэ́н;

²⁵и явирэ-пхувья́кирэ манушэ́нгирэ вастэ́ндыр на янэ́н сарэ́н дасавэн мурдалэ́н дро свэ́нто дыибэ́н тумарэ́ Ра́скэ-Дэвлэ́скэ, пал-дова́ со пэ лэ́ндэ исын дош; ёнэ на янэ́на тумэ́нгэ ла́ска Дэвлэ́стыр.’”

²⁶И пхэндя́ Рай Дэвэ́л Мойза́скэ дасавэ́ лава́:

²⁷“Ке́ли бияндёла (лотёла) гуруворо, ци бакроро́, ци бузноро, тэды эфта́ дывэса́ лэ́скэ трэй тэ явэ́л пашы́л пэ́скирэ датэ, а охтотонэ (бидуенгирэ дэштонэ) дывэсэ́стыр явэ́ла лачхо́ ваш яныбэ́н дро свэ́нто дыибэ́н Ра́скэ-Дэвлэ́скэ;

²⁸нэ ни гурумня, ни бакря́ на чхинэн дро екх дывэ́с лэ́нгирэ даса.

²⁹Ко́ли янэ́на Ра́скэ-Дэвлэ́скэ парикирибнаскиро свэ́нто дыибэ́н, тэды янэ́н лэс адя́кэ, соб (кай) ёв тэ дэл тумэ́нгэ ла́ска;

³⁰дрэ дова́-паць дывэ́с трэй лэс тэ хан, на ячкирэн ла́тыр кэ ра́нко (кэ зло́ко). Мэ сом Рай Дэвэ́л.

³¹И ракхэ́н Мирэ́ припхэныбэна́ и кэрэ́н саро́ пир лэ́ндэ. Мэ сом Рай Дэвэ́л.

³²На магирэ́н Миро свэ́нто лав, соб (кай) Мэ тэ явав свэнтонэса машки́р Израилёскирэ чхавэ́ндэ. Мэ сом Рай Дэвэ́л, Саво́ свэнцякирэла тумэн,

³³Саво́ вылыджия́ тумэн Египто́скирэ пхувья́тыр, соб (кай) тэ явэ́л тумаро́ Дэвэ́л. Мэ сом Рай Дэвэ́л.”