Read Baltic Romani Bible 2019 – Библия - Пэ Балтитко Романи чиб (Романэс) 2019 Левито 24 Bible Online

Левито 24 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Левито 24

¹И пхэндя́ Рай Дэвэ́л Мойза́скэ дасавэ́ лава́:

²“Припхэн Израилёскирэ чхавэ́нгэ, соб (кай) ёнэ тэ янэ́н ту́кэ жужо́, вымардо елеё (дзэт) ваш дуд (свэ́то), соб (кай) саро́ часо тэ хачол момолы́тко (свети́льнико);

³пал шы́рма анги́л ковчэго досыкаибна́са (откровенияса) дрэ скэдыибна́скири ша́тра Ааро́но и лэ́скирэ чхавэ́ исын бангэ́ тэ чхувэ́н лэс анги́л Растэ-Дэвлэ́стэ ўса́ды (сак) бэльвэлятыр кэ ра́нко (кэ зло́ко): дава́ явэ́ла векоскиро упхэныбэ́н дрэ тумарэ́ ро́ды.

⁴Пэ жужо́ шандало (подсвечнико) трэй лэ́скэ тэ чхувэ́л момолы́тко (свети́льнико) ўса́ды (сак) анги́л Растэ-Дэвлэ́стэ.

⁵И лэ пшэнично яржо́ и спэк лэ́стыр дэшуду́й марэ́; дро кажно маро́ трэй тэ явэ́л дуй дэшта эфатыр;

⁶и чхув лэн дрэ дуй ряды, пир шов дро рядо, пэ жужо́ сками́нд анги́л Растэ-Дэвлэ́стэ;

⁷и чхув пэ кажно рядо жужо́ ливано, и явэ́ла дава́ пашы́л маро́, дро рипирибэ́н, дро свэ́нто дыибэ́н Ра́скэ-Дэвлэ́скэ;

⁸дро кажно саватоскиро (суботакиро) дывэ́с саро́ часо (цы́ро) трэй лэ́скэ тэ чхувэ́л лэн анги́л Растэ-Дэвлэ́стэ Израилёскирэ чхавэ́ндыр: дава́ явэ́ла векоскиро доракирибэ́н;

⁹ёнэ явэ́на ваш Аароно́скэ и ваш лэ́скирэ чхавэ́нгэ, савэ́ явэ́на тэ хан лэн (марэ́) пэ свэ́нто штэ́то, пал-дова́ со дава́ исын бари свэнтыма ваш лэ́нгэ Ра́скирэ-Дэвлэ́скирэ свэнтонэ́ дыибна́стыр: дава́ исын векоскиро упхэныбэ́н.”

¹⁰И выгия́ чхаво́ екхэ Израильтянкакиро, саво́ бия́ндыя Египтяниностыр, кэ Израилёскрэ чхавэ́, и роскостяпэ дрэ ста́но Израильтянкакиро чхаво́ Израильтяниноса;

¹¹и костя Израильтянкакиро чхаво́ Ра́скирэ-Дэвлэ́скиро лав и обракирдя. И яндлэ́ лэс кэ Мо́йза;

¹²и чхудэ́ лэс дрэ бэшыбэн кэ дава́ часо, пака явэ́ла пхэндлы лэ́скэ Ра́скирэ-Дэвлэ́скири во́ля.”

¹³И пхэндя́ Рай Дэвэ́л Мойза́скэ, ракири́:

¹⁴“Вылыджа манушэ́с, саво́ обракирдя Ра́скирэ-Дэвлэ́скирэ лав яври́ станостыр, и сарэ́, кон шунэ́ла, лэс мэк тэ чхувэ́н пэ́скирэ васта́ пэ лэ́скиро шэро́, и саро́ скэдыибэ́н тэ домарэл лэс барэ́нца;

¹⁵и Израилёскирэ чхавэ́нгэ пхэн: ‘Кон явэ́ла тэ обракирэл пэ́скирэ Рас-Дэвлэ́с, одова́ лыджа́ла пэ́скиро грэ́хо;

¹⁶и одова́ ману́ш, саво́ кошэла Ра́скирэ-Дэвлэ́скирэ лав исын банго́ тэ мэрэ́л, барэ́нца замарэла лэс саро́ скэдыибэ́н: ци ману́ш, саво́ явдя́ явирэ рига́тыр, ци пэ́скиро ману́ш лэ́ла тэ кошэл Ра́скирэ-Дэвлэ́скирэ лав, адасаво́ отдыно́ явэ́ла мэрибна́скэ.

¹⁷Кон замарэла вари-савэ́ манушэ́с, одова́ явэ́ла отдыно́ мэрибна́скэ.

¹⁸Кон замарэла кхэритконэ́ мурдалэс (ското), одова́ исын банго́ тэ заплэскирэл пал лэ́стэ, мурда́л пал мурдалэ́стэ.

¹⁹Кон кэрэ́ла пэ́скирэ пашатунэскэ дош (шкода) пэ маса́, одолэ́скэ трэй тэ кэрэ́л дова́-паць, со ёв кэрдя́:

²⁰пхагирибэн пал пхагирибэн, якх пал якх, данд пал данд; сыр ёв кэрдя́ дош пэ явирэ-манушэ́скирэ маса́, адя́кэ и лэ́скэ трэй тэ кэрэ́с.

²¹Кон замарэла кхэритконэ́ мурдалэс, одова́ исын банго́ тэ заплэскирэл пал саро́; а кон замарэла манушэ́с, одолэ́с манушэ́с исын бангэ́ тэ отдэ́н мэрибна́скэ.

²²Екх сэ́ндо исын банго́ тэ явэ́л тумэ́ндэ, сыр ваш манушэ́скэ, саво́ явдя́ явирэ рига́тыр, адя́кэ и ваш пэ́скирэ манушэ́скэ; пал-дова́ со Мэ сом Рай Дэвэ́л, Дэвэ́л тумаро́.’”

²³И пирипхэндя Мо́йза Израилёскирэ чхавэ́нгэ; и вылыджинэ́ манушэ́с, саво́ обракирдя Ра́скирэ-Дэвлэ́скирэ лава́ яври́ станостыр, и домардэ́ лэс барэ́нца, и кэрдэ́ Израилёскирэ чхавэ́, сыр припхэндя́ Рай Дэвэ́л Мойза́скэ.