Read Baltic Romani Bible 2019 – Библия - Пэ Балтитко Романи чиб (Романэс) 2019 Левито 5 Bible Online

Левито 5 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Левито 5

¹Ко́ли вари-кон кэрэ́ла грэ́хо долэса, со шундя́ прокошыбнаскири зан и сыс якхи́тко, ци дыкхця́ ци джиндя́, нэ на пхэндя́ дава́, тэды ёв лыджа́ла пэ пэ́стэ грэ́хо.

²Ци, ко́ли вари-кон чилавэлапэ кэ вари-со нажужо, ци кэ нажужэ́ рискирибна́скирэ мурдалэскиро (зверёскиро) тру́по, ци кэ нажужэ́ кхэритконэ́ мурдалэскиро (скотоскиро) тру́по, ци кэ нажужэ́-ґадоскиро тру́по, нэ ёв на джиндя́ дава́, тэды ёв исын нажужо и явэ́ла банго́.

³Ци ко́ли ёв чилавэлапэ кэ манушэ́скиро нажужыпэн (начыстота), саво́ тэ на явэ́л дава́ нажужыпэн, савэ́стыр магирэнапэ, и ёв на джиндя́ дава́, нэ коригэды́р (позжэды́р) ёв уджинэла, тэды ёв явэ́ла банго́.

⁴Ци, ко́ли вари-кон, на подумины пэ́скирэ уштэ́нца, совлахадя́ тэ кэрэ́л вари-со на́лачхо ци лачхо́, саво́ б тэ на явэ́л дава́ рэ́ндо (де́ло), дрэ саво́ на думины мануша́ совлахана, и ёв на джиндя́ дава́, нэ коригэды́р уджинэла, тэды ёв дро дава́ явэ́ла банго́.

⁵Ко́ли ёв исын банго́ дро вари-со далэ́стыр, и приджиндя банг, дрэ со ёв кэрдя́ грэ́хо,

⁶тэды мэк тэ янэл Ра́скэ-Дэвлэ́скэ пал пэ́скиро грэ́хо, саво́ ёв кэрдя́, свэ́нто дыибэ́н сы́рбы пал банг тыкнэ́ кхэритконэ́ мурдалэ́ндыр (ското́стыр), бакря́ ци бузня, пал грэ́хо, и выжужакирэ́ла лэс раша́й лэ́скирэ грэхостыр.

⁷Ко́ли ёв на могинэ́ла тэ янэл бакря́, тэды дрэ банг пал пэ́скиро грэ́хо, мэк тэ янэл Ра́скэ-Дэвлэ́скэ дуе́н горлицэн ци дуе́н тэрнэн голумбэн, екхэ́с дро свэ́нто дыибэ́н пал грэ́хо, а явирэ́с дро цэ́ло схачкирибэ́н;

⁸мэк тэ янэл лэн кэ раша́й, и раша́й тэ янэл англэды́р доя́ далэ́ чириклендыр, сави́ тэ явэ́л пал грэ́хо и отрискирэла ла́кэ шэро́ мэнятыр лакирьятыр, нэ тэ на откэдэл;

⁹и побрызгинэла далэ́-жэртвакирэ ратэ́са пал грэ́хо пэ алтарёскири ва́нта, а палатуно́ рат, саво́ ячэ́лапэ, вытасавэла кэ алтарёскирэ ґэра́: дава́ исын свэ́нто дыибэ́н пал грэ́хо;

¹⁰а явирья мэкэ́ла дро цэ́ло схачкирибэ́н пир упхэныбэ́н; и адя́кэ выжужакирэ́ла лэс раша́й лэ́скирэ грэхостыр, саво́ ёв кэрдя́, и отмэкно лэ́скэ явэ́ла.

¹¹Ко́ли ёв на могинэ́ла тэ янэл дуе́н горлицэн ци дуе́н тэрнэ́ голумбэн, мэк тэ янэл пал дава́, со кэрдя́ грэ́хо, дэ́што паш (эфа) дрэ свэ́нто дыибэ́н пал грэ́хо; мэк тэ на чхувэ́л пэ ла́тэ елеё, и ливано, мэк тэ на чхувэ́л пэ ла́тэ, пал-дова́ со дава́ исын пал грэ́хо;

¹²и янэ́ла лэс кэ раша́й, а раша́й ла́тыр лэ́ла пхэрды́ бурнык (жменя) дро рипирибэ́н, и схачкирэ́ла пэ алта́рё дро дава́ свэ́нто дыибэ́н Ра́скэ-Дэвлэ́скэ: дава́ исын свэ́нто дыибэ́н пал грэ́хо;

¹³и адя́кэ выжужакирэ́ла лэс раша́й лэ́скирэ грэхостыр, саво́ ёв кэрдя́ дро вари-со далэ́ ваканцыендыр (случаендыр), и отмэкно лэ́скэ явэ́ла; а со ячэ́лапэ, дова́ явэ́ла раша́скэ, сыр маруно́ яныбэ́н.

¹⁴И пхэндя́ Рай Дэвэ́л Мойза́скэ дасавэ́ лава́:

¹⁵“Ко́ли вари-кон кэрэ́ла чорипэ́н и пир наджиныбэн кэрэ́ла грэ́хо проти дова́ предмето, со сыс обсвэнцындло Ра́скэ-Дэвлэ́скэ, мэк пал пэ́скири банг ёв тэ янэл Ра́скэ-Дэвлэ́скэ бакрэ́нгирэ стадатыр бакрэ́с бидошэнгирэс, пир тыри́ тими́н, рупувэ́ шэкеленца пир шэ́келё свэнтонэскиро, дро свэ́нто дыибэ́н (жэ́ртва) пал чорипэ́н;

¹⁶пал доя́ свэнтыма, проти сави́ ёв кэрдя́ грэ́хо, мэк ёв тэ отдэ́л и тэ дочхувэл кэ дова́ па́нджто паш (до́ля), и тэ отдэ́л ла раша́скэ, и раша́й выжужакирэ́ла лэс бакрэскирэ яныбнаса пал чорипэ́н, и отмэкно лэ́скэ явэ́ла.

¹⁷Ко́ли вари-кон кэрэ́ла грэ́хо и кэрэ́ла вари-со проти Ра́скирэ-Дэвлэ́скирэ припхэныбэна́, со на трэиндя́ тэ кэрэ́л, и пир наджиныбэн кэрэ́лапэ бангэса и лыджа́ла пэ пэ́стэ грэ́хо,

¹⁸мэк тэ янэл кэ раша́й дро свэ́нто дыибэ́н пал чорипэ́н бакрэ́с бидошэнгирэс, пир тыри́ тими́н и выжужакирэ́ла раша́й тырэ́ чорипна́стыр, со ёв кэрдя́ пир наджиныбэн, и отмэкно лэ́скэ явэ́ла.

¹⁹Акэ, исын свэ́нто дыибэ́н пал банг, саво́ ёв кэрдя́ анги́л Растэ-Дэвлэ́стэ.”