Read Baltic Romani Bible 2019 – Библия - Пэ Балтитко Романи чиб (Романэс) 2019 Левито 7 Bible Online

Левито 7 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Левито 7

¹Ѓа́да, исын Зако́но пал свэ́нто дыибэ́н пал грэ́хо: дава́ исын бари свэнтыма;

²свэ́нто дыибэ́н пал грэ́хо трэй тэ зачхинэн пэ дова́ штэ́то, кай зачхинэна цэ́ло схачкирибэ́н, и ла́кирэ ратэ́са трэй тэ брызгинэс пэ алта́рё сарэ́ ригэ́ндыр;

³кон янэ́ла, одолэ́скэ трэй тэ сыкавэ́л ла́тыр саро́ чэкэ́н (ту́ко), курдюко и чэкэ́н (ту́ко), саво́ учхакирэ́ла андратунэ́ маса́,

⁴и дуй букорэ (почки) и чэкэ́н (ту́ко), саво́ исын пэ лэ́ндэ, саво́ исын пэ стёгны, и сальнико, саво́ исын пэ кало́ буко (печонка); букорэнца (почкэнца) мэк ёв тэ роскэдэл дава́;

⁵и схачкирэ́ла дава́ раша́й пэ алта́рё пал грэ́хо Ра́скэ-Дэвлэ́скэ: акэ, исын свэ́нто дыибэ́н пал грэ́хо.

⁶Сарэ́ рашаскирэ-родоскирэ мурша́ сашты́ (могинэ́на) тэ хан лэс; пэ свэ́нто штэ́то трэй тэ хан лэс: дава́ исын бари свэнтыма.

⁷Сыр пал грэхоскиро свэ́нто дыибэ́н, адя́кэ и пал свэ́нто дыибэ́н пал чорипэ́н Зако́но исын екх: ёв отлыджалапэ раша́скэ, саво́ жужакирэла лэ́са.

⁸И ке́ли раша́й янэ́ла вари-конэ́скиро свэ́нто дыибэ́н цэлонэ́ схачкирибнаскиро, а цы́па цэлонэ́-схачкирибнаскирэ свэнтонэ́ дыибна́стыр, сави́ ёв янэ́ла, отлыджалапэ раша́скэ;

⁹и кажно маруно́ яныбэ́н, саво́ исын пэкно дро бов, и кажно кэрадо дрэ пири́ ци пэ скороведа (хич), отлыджалапэ раша́скэ, савэ́скэ янэ́на лэс;

¹⁰и кажно маруно́ яныбэ́н, саво́ исын пиримешындло елеёса и исын шуко, отлыджалапэ сарэ́ Аароно́скирэ чхавэ́нгэ, сыр екхэ́скэ, адя́кэ и явирэскэ.

¹¹Ѓа́да, исын Зако́но пал ми́рно (раманёно) свэ́нто дыибэ́н, саво́ янэ́на Ра́скэ-Дэвлэ́скэ:

¹²ко́ли вари-кон дро парикирибэн лэс янэ́ла, тэды кхэтанэ́ парикибнаскирэ свэнтонэ́ дыибнаса лэ́скэ трэй тэ янэл пресна марэ́, пиримешындлэ елеёса, и пресна марикля, помакхнэ елеёса, и яржо́ парнэ́ гивэстыр, почхудо елеёса, марэ́, пиримешындлэ елеёса;

¹³апри́ч марикля мэк ёв тэ янэл дрэ пэ́скиро яныбэ́н квашэно маро́, кхэтанэ́ парикирибнаскирэ мирнонэ свэнтонэ́ яныбнаса;

¹⁴екх вари-со сарэ́ яныбнастыр пэскирэстыр, мэк тэ янэл ёв дро ґаздыпэн Ра́скэ-Дэвлэ́скэ: дава́ отлыджалапэ раша́скэ, саво́ брызгинэла мирнонэ-жэртвакирэ (раманёнэ-свэнтонэ́ дыибнаскирэ) ратэ́са;

¹⁵а мас раманёнэ-свэнтонэ́ дыибна́стыр дро парикирибэн трэй тэ хан дро лэ́скиро яныбнытко дывэ́с, нашты́ тэ ячкирэл лэ́стыр кэ ра́нко (кэ зло́ко).

¹⁶Ко́ли вари-кон янэ́ла свэ́нто дыибэ́н пир совла́х ци илэ́стыр, тэды лэ́скиро свэ́нто дыибэ́н трэй тэ хан дро яныбнытко дывэ́с, и пэ яви́р дывэ́с, со ячэ́лапэ лэ́стыр, лэс сашты́ тэ хан,

¹⁷а со ячэ́лапэ алтарёстыр, мас, кэ три́то дывэ́с трэй тэ схачкирэн пэ яг;

¹⁸ко́ли явэ́на тэ хан мас мирнонэ-жэртвакиро пэ три́то дывэ́с, тэды ёв на явэ́ла лачхо́; кон ла янэ́ла, одолэ́скэ ни дрэ со на загинэлапэ: дава́ исын магирипэ́н, и кон явэ́ла лэс тэ хал, одова́ лыджа́ла пэ пэ́стэ грэ́хо;

¹⁹дава́ мас, ко́ли ёв причилавэлапэ кэ вари-со, со исын нажужо, нашты́ тэ хан, нэ трэй тэ схачкирэн лэс пэ яг; а мас жужо́ могинэ́ла тэ хас кажно жужо́ ману́ш;

²⁰ко́ли вари-саво́ ди, конэ́стэ исын пэ пэ́стэ нажужыпэн, явэ́ла тэ хал мас мирнонэ-жэртватыр Ра́скирэ-Дэвлэ́скирэ, тэды хасёла дова́ ди пэ́скирэ манушэ́ндыр;

²¹и ко́ли вари-саво́ ди, кон причилавэла кэ вари-со нажужо, кэ нажужыпэн Манушэ́скиро, ци кэ нажужо кхэри́тко мурда́л (кэ ското), ци кэ вари-саво́ нажужо ґадо (ползуно), явэ́ла тэ хал мас мирнонэ Ра́скирэ-Дэвлэ́скирэ свэнтонэ́ дыибна́стыр, тэды хасёла дова́ ди пэ́скирэ манушэ́ндыр.’”

²²И пхэндя́ Рай Дэвэ́л Мойза́скэ, ракири́:

²³“Пхэн Израилёскирэ чхавэ́нгэ: нисаво́ чэкэ́н (ту́ко) ни гурувэстыр, ни бакрятыр, ни бузнэстыр (козлостыр) тэ на хан.

²⁴Чэкэ́н мулэстыр и чэкэ́н, саво́ роскустя рискирибна́скиро мурда́л (зверё), сашты́ тэ мэкэ́н пэ кажно рэ́ндо; а ваш хабэ́н, на хан лэс;

²⁵пал-дова́ со, кон явэ́ла тэ хал чэкэ́н кхэритконэ́ мурдалэстыр, саво́ янэлапэ дро свэ́нто дыибэ́н Ра́скэ-Дэвлэ́скэ, то хасёла дова́ ди пэ́скирэ манушэ́ндыр;

²⁶и нисаво́ рат на хан дрэ сарэ́ тумарэ́ кхэра́ ни чириклендыр, ни кхэритконэ́ мурдалэстыр;

²⁷а кон явэ́ла тэ хал вари-саво́ рат, хасёла дова́ ди пэ́скирэ манушэ́ндыр.”

²⁸И пхэндя́ Рай Дэвэ́л Мойза́скэ дасавэ́ лава́:

²⁹“Пхэн Израилёскирэ чхавэ́нгэ: кон янэ́ла пэ́скиро ми́рно свэ́нто дыибэ́н Ра́скэ-Дэвлэ́скэ, одова́ мирнонэ свэнтонэ́ дыибна́стыр паш трэй тэ янэл дро яныбэ́н Ра́скэ-Дэвлэ́скэ;

³⁰пэ́скирэ вастэ́нца исын банго́ ёв тэ янэл дро свэ́нто дыибэ́н Ра́скэ-Дэвлэ́скэ: чэкэ́н колынэса исын банго́ ёв тэ янэл, соб (кай) ёв тэ тринскирэл колынэса анги́л Растэ-Дэвлэ́стэ;

³¹а чэкэ́н схачкирэ́ла раша́й пэ алта́рё, а колы́н отлыджалапэ Аароно́скэ и лэ́скирэ чхавэ́нгэ;

³²и чачо́ (право) псико́, сыр ґаздыпэн, мирнонэ тумарэ́ свэнтонэ́ дыибнэндыр жэртвэндыр отдэ́н раша́скэ;

³³кон Аароно́скирэ чхавэ́ндыр янэ́ла рат мирнонэ жэртватыр и чэкэ́н (ту́ко), одолэ́скэ и чачо́ (право) псико́ пэ до́ля;

³⁴пал-дова́ со Мэ ла́ва Израилёскирэ чхавэ́ндыр мирнонэ свэнтонэ́ дыибнэндыр лэ́нгиро колы́н тринскирибнаскиро и псико́ ґаздыпнаскиро, и Мэ отда́ва лэн Аароно́скэ раша́скэ и лэ́скирэ чхавэ́нгэ сыр ве́чно паш Израилёскирэ чхавэ́ндыр.

³⁵Ѓа́да, исын паш Аароно́скэ и паш лэ́скирэ чхавэ́нгэ Ра́скирэ-Дэвлэ́скирэ жэртвэндыр пэ яг дывэсэ́стыр, ке́ли ёнэ явэ́на анги́л Растэ-Дэвлэ́стэ ваш свэ́нто буты́,

³⁶саво́ пхэндя́ Рай Дэвэ́л тэ дэл лэ́нгэ дывэсэ́стыр лэ́нгирэ макхибнастыр Израилёскирэ чхавэ́ндыр. Дава́ исын ве́чно упхэныбэ́н дрэ лэ́нгирэ ро́ды.

³⁷Ѓа́да, исын Зако́но пал цэ́ло схачкирибэ́н, пал маруно́ яныбэ́н, пал свэ́нто дыибэ́н пало́ грэ́хо, пал свэ́нто дыибэ́н пал чорипэ́н, пал свэ́нто дыибэ́н высвэнцякирибнаскиро и пал ми́рно свэ́нто дыибэ́н,

³⁸саво́ дыя́ Рай Дэвэ́л Мойза́скэ пэ Синаёскири бэ́рга, ке́ли пхэндя́ Израилёскирэ чхавэ́нгэ, пэ Синаёскири чхучи́ пхув, тэ янэ́н Ра́скэ-Дэвлэ́скэ лэ́нгиро яныбэ́н.”